Read Khiamniungan Naga 2 Ateng Chhi 32 Bible Online

2 Ateng Chhi 32 - Khiamniungan Naga bible

2 Ateng Chhi 32

¹Nung chhisiya nouso phiai, Nokpao Hezekiaüh APAOU mongtsamkü yathsüokü noitsünko, Asiriahai nokpao Senakeribüh Yihuda komhean. Apaüh noknio lomongshikü taiutsünso thaloküta apa süpaihoiso tü lungpe nouso thsatkü ngüso yam khuau apaüh ngiokhem kium.

²Tilai Hezekiaüh nokpao Senakeribüh Yirusalem lüko komheau yangtsün ep,

³apa si apa songhoi nousoüh tilai Asiriahai Yirusalem shimkü shi-e ngüsoüh khiam epau ainou lolaokü wanau noknio pechiai lolutkü taiuau thatlo. Asonghoi nousoüh khaiuniahoi piakü nialokü khuküta haiungantso nouso khiam saotsün ainou loyangkü wan.

⁵Nokpao nou lungpe chiai ehüpuo nouso lahtsün tsangkü naiuso achiai lungpe petsün tsangkü noknio ehü lokongshikü noiküla. Nungko hakü apaüh goh pokthiokü taiutsün Yirusalem akeng nou dongai ajepek nai ehü puo nouso shan meishin. Apaüh loüh shisilai nouso piakü shantaiu küla.

⁶Apaüh khaiuniahoi nouso chikü noknio nai süpaihoi ahei khemko taiukiu küta ngüsotü noknio bekhan kengpun nouko kamshi-iau ngiokhem kium. Apaüh ngüsotü ngiom.

⁷“Mong nyankü naiuso monglamkü lüthe, naiuso Asiriahai nokpao naiuso apaüh niakeitsün süpaihoi nouso lun hatkü lanoi. Apa dongai apaüh taiutsün oukong ko naito samüh sam dongai taiutsün ou- kong songtso noin.

⁸Apaüh khaiunia oukong taium, lüko sam hachuau naiuso sam thaiutha ehli kiu-au APAOU sam Goa samüh taium.” Khaiuniahoi nouso nung ngüso nokpao ngio tsangkü mongsongkü iula.

⁹Atao intso phiai, Senakerib si apa süpaihoiso Lakis nai noitsün laoko, apaüh Hezekia naiuso Yihuda khaiuniahoi nouso sauhai Yirusalem nai apako aikü noiküla ngüso dongai nung ngiongem hong.

¹⁰“Ngo, Sena- kerib, sau Asiriahai Nokpao noin, nungüh asam thalokü lüko Yirusa- lem nai mongsong noiau akhaiuniaso hau ti kiukü noin ta sangji.

¹¹Hezekiaüh asam hau APAOU asam Goaüh sam oukong ainou kipsane ta chiteji, lüko Hezekiaüh asam sapthio-iji naiuso asam anaiu si ale nou ean-iau noin.

¹²APAOU amkham tsam naiuso amthang nouso lothean küta Yihudahai si Yirusalem haitü amthang tsak kolu angannyam jahkü amkhamau ngiotsün nung tsak nou apa noin.

¹³Amao mele khaiuniahoi nousotü jüpaosiposo naiuso ngo ti chikü shin nung asamüh tsüngeso? Asiriahai nokpao ainou amao mele goa nouso ajantsoüh ngüso khaiunia kipsankü noimo?

¹⁴Sam ainou nungso goumchi ün goa nousoüh jam lüko ngüso goumchi kipsankü noimo? Nungaito asam goaüh asam kipsane ta ti tsangkü asam hau ayangau kiuji?

¹⁵Lo, Hezekia hau asam lasapthio-i tsüdekünai nungli ayam tsüthakü nai lanialükhun-i. Apatü lamonglam! Ti mele goaüh lünou Asi- riahai nokpao ainou apa khaiuniaso kipsankü tsüshi. Nungtiphe, atsüoting, nung asam goaüh asam kipsanau tsüshio-e!”

¹⁶Asiriahai asonghoi nousoüh APAOU Goa naiuso APAOU yathsüotsün Hezekia thaiutha loüh tekkü thsüokü ngiom.

¹⁷Nokpao ün thsamsat nou APAOU Israel Goa lochikiu. Nungko nungti ngiokü noiküla, “Melehoi goa nousoüh ngüso jüphamong ainou tsükipsan, nungaito Hezekia goaüh lüko apa khaiuniaso ngü ainou tsükipsan-e.”

¹⁸Noknio nou siudekü thalowanau Yirusalemai noitsün khaiuniahoi sauhai noknio lungpe nou chiai noiküla ngüso hatat- kü naiuso monghenikü hau thaiutha asonghoi nousoüh Ibri ngioko sang asong nou vekü ngiom.

¹⁹Ngüsoüh Yirusalemhai Goa thaiutha amao khaiuniahoi nou pha tsangkü shan- tsün sotsom nouso thaiutha ngem- tsünlilu vekü nai chitekü noiküla.

²⁰Nungai Nokpao Hezekia naiuso Amoz thso e-po Isaia neüh Goatü ahachu thaiutha vekü misao saokü noiküla.

²¹APAOU nou hongthon tsak hongkü nungüh Asiriahai süpai naiuso asonghoi loatkü wan. Nungti nokpao nou Asiria ai amiam epkü laokü khuwan. Ajekhaiu tsakko tilai apa apa ün goa amkham tsamai noiküla, apa thsoso ongko ajantsoüh apa ngüso salaiu nou loatkü wan.

²²Nungti APAOU nou Nokpao Hezekia naiuso Yirusalemhai Asiria- hai nokpao Senakerib oukong ainou naiuso amao ehoi nouso ainou kip- sankü noiküla. Apaüh khaiuniahoi nouso chenpa goumchi nouso chikü nouko aalo nai kih-i.

²³Khaiunia piakü Yirusalemai APAOU hau chaithio naiuso Hezekia hau paopei nouso kankü shin, nungti nungko yako mele chikü nou Hezekia hau asuhat alomsan kiukü noiküla.

²⁴Nungtaoko nai Nokpao Hezekia eanau lümeikü kiakü noiküla. Apaüh misao sao, naiuso apa meila au APAOU nou apa hau ii tsak han.

²⁵Lüko APAOU nou apa thaiutha ti chhikium nung thaiutha amongleng hanshi au Hezekia thatü bülomkü noiküla; naiuso nung thaiuthako Yihudahai Yirusalemhai angja epkü noiküla.

²⁶Aphinai, Hezekia naiuso Yirusalem khaiuniaso ngüso chija tsamlokü iula, naiuso Hezekia ean phiai saokü APAOU nou khaiuniahoi hau angja tsükiu.

²⁷Nokpao Hezekia thatü memeikü iulan, naiuso khaiunia pungkü nou apa hau asuhatkiu. Apaüh chaiou lakkeng, tangka, chaiou lung, angan- nyamtsün, Shii nouso naiuso amao chaiou jengtsaiu thaiutha akamtaiu au tsampai nouso lahkü taiuküla.

²⁸Nungko hakü apaüh khülam, theng, naiuso olip khiam thaiutha tsampai nouso lahkü taiuküla, apa jangtso thaiutha pei nouso; naiuso apa onnemokhoi thaiutha pekü taiutsün pemong nouso taiuküla.

²⁹Nungso ko tsüvethiohakü APAOU nou apa hau onnemok naiuso jangtso naiuso amao chaiou jengtsaiu piakükiu naiuso apaüh noknio piakü shanshin.

³⁰Gihon haiu tsangtsün loyangküta gohkhei khiamyam tsak tsangkü khiam kankü shiküta Yiru- salem lungpe mongai tsangthiotsün nung Nokpao Hezekia noiküla. Hezekiaüh apa chhisiya alum ko ashio nou epm,

³¹naiuso tilai Babilonhai goumchi hong nouso goumchi nai ashithawao au tsüdekün shithawaotsün thaiutha sangluau shin, goa nou Hezekia apa saisile lilu au apa mongthat the-iau kium.

³²Nokpao Hezekiaüh chhisiyakü shitsün alum naiuso apa APAOU tü thumkü kiutsün apem Amoz thso Isaia e-po ün Atsangshei Thsam naiuso Yihuda si Israelhai Nokpaohoi Ngiolat Thsam nai satkü taium.

³³Hezekia ean naiuso apa nokpao asungthonhoi etam nouso nai khanan. Apa eantsün taoko Yihuda si Yirusalem khaiunia chikü nou apa hau asuhat asong kium. Apa thso Manaseüh apa nokpao liloum.