Read Khiamniungan Naga 2 Ateng Chhi 33 Bible Online

2 Ateng Chhi 33 - Khiamniungan Naga bible

2 Ateng Chhi 33

¹Manase Yihudahai nokpao tsalo taoko apa achetpon chekü nime noiküla, naiuso apa Yirusalem nai pon aopungokü pungo nokshing.

²Apa khaiuniaso khutsün taoko APAOU nou nung goumchi ainou komantsün mele nousoüh chhi- siyatsün achinyan chhisiya nousotü hoilutkü Manaseüh APAOU thako angei nou chhin.

³Apa po Hezekiaüh lotheantsün paisilung amkham athang nouso apaüh lahsanshikü noiküla. Apaüh Baal amkham au thaiutha amthang nouso shan, menyiu Ashera sotsom shanshin, naiuso kianthsüo nouso amkhamkü noiküla.

⁴APAOU nou apa hau athontsüyangkü amkham kiuau ngiotaiutsün athang Amkham Tsam nai apaüh paisilung amthang nouso shanshin.

⁵Amkham Tsam pemong nimeko apaüh kianthsüo nouso amkhamau amthang nouso shan.

⁶Apaüh Hinnom Tsamei nai apa melothsoso ajahtsün chaithio li aloat chaithio kium. Apaüh mea-onko chitetsün chhisiya chhin, athesankiu tsün misao chhin, mea-on ko chite- tsün khaiunia dongai khu, naiuso akuo ngekiutsün khaiunia dongai khukü chhin. Apaüh APAOU thako angei thsüokü chhin naiuso apa amongmat losankü noiküla.

⁷Apaüh David naiuso apa thso Solomon tü Goa nou chitetsün athang Amkham Tsam nai sotsom tsak taiuküla: “Nung Yirusalem ko, nung Amkham Tsam nouko, ngo Israel mele chekü nime ainou chikü ongko nung athang ngo amkham kiuau thaiutha chosan.

⁸Naiuso Israel khaiuniahoi nou jü athoilut nouso chikü angio angkü naiuso ngüso hau jütsamki Mosaüh kiutsün Ngiokhem athum kankei naito, nungaito ngo ngüso paosiposo hau kiutaiutsün goumchi ainou ngüso tsükoman-i-e.”

⁹APAOU nou apa khaiuniaso khutsün taoko koman- tsün mele nousoüh suntsün angei tü tekkü phopkü Manaseüh Yihuda khaiuniahoi hau angei sunlo-in.

¹⁰APAOU nou Manase si apa khaiuniaso tü alotsüo kiu lüko, ngüsoüh apatü tsü-ang.

¹¹Nungtiphe APAOU nou Asiriahai süpai aheihoi hau Yihudahai koman-ikü noiküla. Ngüsoüh Manase thaloukü apatü paitsangkhu nou naiuso sonkhiang nou thio, küta Babilon nai apa kankü khuwan.

¹²Apa angja omhetsün ko apa meshen chija tsamloshikü iula, apa goa dongai mong phokle, küta apatü ahachu thaiutha saokü noiküla.

¹³Goa nou Manase misao thalaküta apa Yirusalem nai laokü khukü loüh nokshing shing-i shin. Nungüh Manase hau APAOU nung Goa noin ta tsangsheikü ngela-ishikü noiküla.

¹⁴Nungphiai, Manaseüh David Noknio ün lungpe ajepek dong ainou a-chipe nou lotsokshi Gihon haiutso shimkü tsamei tsak ainou Ngoh Bekhan saokü naiuso nung noknio athang nou ta Ofelta jonkü noiküla. Yihudahai noknio nouso pungkü apaüh süpai ahei thoilutkiutkü taiu- kium.

¹⁵Apaüh gohmao goa nouso sübao apaüh amkham Tsamai sotsom nouso taiuküla nungso lowan, naiuso Amkham Tsam lahtaiutsün athang king chiai nou paisilung amthang nouso naiuso Yirusalem nai amao athang nouso ainou; nungso chikü apaüh noknio ainou lowanküta yak- kan.

¹⁶Apaüh APAOU amkhamtsün amthang nou lüko shanshi, naiuso apaüh nungko aalo chaithio naiuso nianlomkiu chaithio nouso kium. Apaüh Yihuda khaiuniahoi apem ta Israel Goa, APAOU amkhamau thoilut.

¹⁷Khaiuniahoi nouto athang nouso ai amkhamkiu lüko, ngüsoüh nungso APAOU hau lu chaithio kium.

¹⁸Manaseüh chhisiyakü shitsün alum; apa Goa dongai misao hongtsün e-po hoi sauhaiüh apatü APAOU Israel Goa nianko ngiongem chitekü shin, nungso chikü Israelhai Nokpaohoi Ngiolat Thsam nai satkü taium.

¹⁹Nokpao ün meson naiuso nungtü goa nou thalatsün, apa mong mophoklekün khako apaüh suntsün angei thaiutha, apa chhisiya tsü- meikü chhitsün, paisilung amkham athang nouso, naiuso menyiu Ashera sotsom apaüh amkhamkü shitsün- chikü E-po nouso Ngiolat Thsam nai satkü taium.

²⁰Manase ean naiuso nokpao tsam nai apa khanan, naiuso apa thso Amonüh apa nokpao liloum.

²¹Tilai Amon Yihudahai nokpao tsalo apa achetpon kheikü nime noiküla, naiuso apaüh Yirusalem nai pon nime nokshing.

²²Apa po Manase khekkü, apaüh APAOU thako angei nou chhin, naiuso apa poüh amkhamtsün sotsom nouso ta apaüh amkhamkü noiküla.

²³Lüko apa po li apa tsamlokü tsüiula naiuso APAOU dongai mong phoklekü tsüshi; apa chhisiya apa po tü thsüokü tsaokü angei noiküla.

²⁴Amon khemko asonghoi nou- soüh apa thako khengshi küta apa nokpao tsamko loatküwan.

²⁵Nungai Yihuda khaiuniahoi nousoüh Amon loatkü wantsünso loüh loatkü wanshi küta apa thso Josia nokpao au tsalo i-kü noiküla.