Read Khiamniungan Naga 2 Ateng Chhi 35 Bible Online

2 Ateng Chhi 35 - Khiamniungan Naga bible

2 Ateng Chhi 35

¹Nokpao Josiaüh APAOU hau alomsan nou kiukü Yirusalem nai Aasantsün sümai saohekü noiküla; Chongting alei nouko ajekhaiu chekü pelenyi nai ngüsoüh sümai thaiutha thainian nouso loat.

²Apaüh mesonhoi nouso hau Am- kham Tsam nai ngüsoüh chhisiya au noitsün chhisiya sonkiuküta ngüsotü nung chhisiya nouso meikü chhisiya au lotsüokiu.

³APAOU hau thumkü losiokü taiutsün Israelhai atsande- hoi, Levihoi nouso hau apaüh nungso ayamhan lüko kium: “David thso Nokpao Solomonüh lahtsün Am- kham Tsam nai nung asio Athalou-e Ngiokhem Paidan lütaiu. Asamüh loto nung athang tsak ainou tsakai ta tsükankeishi-e, lüko asamüh asam Goa APAOU naiuso apa khaiunia Israelhai yathsüoau noin.

⁴Nokpao David naiuso apa thso Nokpao Solo- monüh asam hau haoson kiutaiutsün lingkü, kau kau lingekü Amkham Tsam nai asam noithang lülo,

⁵naiuso asam Israel khaiuniahoi pothso pungkü nai ahachu epeau shiokü hau asam ajantso asam ongko lüshingtaiu.

⁶Asamüh Aasantsün sümai hau onnemok naiuso won nouso loatau noin. Nungtiphe APAOU nou Mosa tsangkü ayamhantsün ko asam Israel paisihaisoüh hoilutau thaiutha aloat chaithio nouso lükhemlo naiuso asam pem amkham yamko yanthsüokü lütaiu.”

⁷Aasan sümai nouko khaiuniahoi nou kankeiau thaiutha, Nokpao Josiaüh apa tengkhaiu thainianhoi naiuso onnemokhoi ainou onnemok, onnemok apong, naiuso won athso nouso heng aosam naiuso jang- tsopong heng süme kiukü noiküla.

⁸Apa khemko asonghoi nousoüh lüko khaiuniahoi nouso thaiutha, meson nouso thaiutha, naiuso Levihoi nouso thaiutha shisankü kium. Amkham Tsam paotsangtsün asonghoi nouso- Akhengting meson Hilkia, Zekaria naiuso Jehielsoüh sümai taoko aloat chaithio au thaiutha mesonhoi hau onnemok apong naiuso wontso 2, 600, naiuso jangtsopong tsom süme kiukü noiküla.

⁹Levihoi ahei nouso: Konania, Shemaia, naiuso apa nio Nethanel, Hasabia, Jiel, naiuso Jejabalsoüh Levihai thaiutha aloat chaithio kiuau onnemok apong naiuso wontso heng pungo naiuso jangtso- pong tsom pungo kiukü noiküla.

¹⁰Tilai Aasan Sümai thaiutha alum lingthakhem, nokpao tsangkü thoiluttsünli, meson nouso si Levihoi nousoüh ngüso noithang lokü noi- küla.

¹¹Onnemokthso naiuso wontso nouso loatkütün phiai, Levihoi nou akhun nou khek, naiuso meson nousoüh she nou amthang nouta satlut.

¹²Mosa Ngiokhem nai ayam- hankü noitsün tsangkü ngüsoüh chaithio kiuau thaiutha, ngüso khaiunia ongko pothso lingkü, nung thainian nouso jahkü chaithio nouso kiuau thaiutha janthatkü noiküla.

¹³Ngiokhem tsangkü nai, Levihoi nou aasan sümai aloat chaithio nouso in nai sanghkü noiküla; naiuso nung asio chaithio nouso lak nai, mekhaklak nai, naiuso lak asong nai thengküta shakta nung nyih nou khaiuniahoi hau sonkiu.

¹⁴Nung chhi khemkütünphiai, Levihoi nou ngüso si Aron ainou chetsinyimtsün meson nouso thaiutha nyih khemsan tititenai aloat chaithio ainou i-iuüh naiuso thainian pemthum jahkü kiutsün in nai jah au meson nouso aso noutü thalutkü tsükengtengkü noiküla.

¹⁵Nokpao David ayamhan tsangkü Levihai nou Asaf kau jihanghoi nouso ngüso hau kiu- taiutsün athang nai noiküla: Ngüso Asaf, Herman, naiuso nokpao ün nou e-po Jeduthun noiküla. Amkham Tsam bekhan nouso nai ehühoi nou ngüso noithang wankü khuau tsünoi, tiautenai Levihoi amao nousoüh ngüso thaiutha Aasan Sümai khem- sankium.

¹⁶Nungti, nokpao Josiaüh thoiluttsünli, Aasan Sümai shantsün naiuso amthang nai ajah chaithio nouso chaithiokiuau, nou alum nung ajekhaiu ko chhisiyakü noiküla.

¹⁷Ajekhaiu chinyatnyi Israelhai khaiunia chikü sauhai nungko noikü thaküla ngüsoüh Aasan Sümai naiuso phoplao Tsüthiokün Themtsai Sümai nou saohe.

¹⁸E-po Samuel ajekhaiu ainou Aasam Sümai nung khekkü tilaitso saohekü tsüshiküla. Nung khako nouso nokpaohoi sauüh- tso Nokpao Josia, Mesonhoi Levihoi, naiuso Yihuda khaiuniahoi, Israel- hai, naiuso Yirusalem nai noitsün- soüh.

¹⁹Josia nokshing pon chekü petjei nouko Aasan Sümai saohetsün tsak khekkü saohekü tsüshi.

²⁰Nokpao Josiaüh Amkham Tsam thaiutha nung chhisiya chikü khemküta phiai, Ijiphai Nokpao Nekoüh Karkemis nai Eufrates Haiu saiai apa thako ehli tsalokü süpaihoi nialokü khu. Nokpao Josiaüh apa lolaoau kowe.

²¹Lüko Nekoüh Josia dongai nung ngiongem hongkü noi- küla: “Yihudahai Nokpao nung ehli ngo li-etsünto akuothe tsüde. Ngo niko ehli au tsüshi, lüko jü ehoi ko li-eau shin, naiuso Goa nou ngütü liukü lüthe ta ngiokü noin. Goa jüdongai nai noin, nungtiphe ngü lakhengshi, tsüdekünaito apaüh ni lüko lomowan-e.”

²²Lüko Josiaüh ehli au khemlokü noiküla. Goa nou Nokpao Neko tsangkü ti ngiokü noiküla apaüh ngio tsü ang, nungti apa meshen chija kausailoküta Megiddo tsamei nai ehli khu.

²³Ehli taoko Nokpao Josia tü Ijiphai uokop chonüh pek. Apaüh apa yathsüotsünso tü ngiom, “Ngü akan- lükhun; ngo thsüokü tawai-iu!”

²⁴Ngüsoüh apa ün ehli tsamkei ainou loklo, küta sübao apaüh amao tsamkei nungko taiuküla nungko lokthio, küta apa Yirusalem nai kankü khuwan. Nungko apa ean naiuso apa nokpaohoi etam nai khankü wan, Yihuda naiuso Yirusalem khaiunia chikü nou apa ean thaiutha mongsaiukü noiküla.

²⁵E-po Yerimiaüh Nokpao Josia thaiutha amongsaiu tsak kamsankütaiu. Tilai ngüso apa thaiutha mongsaiu-e, Israel nai melo menyiu jihanghoi nousoüh nung jihang nai kankeiau saisile tsak iula. Nung jih nou among- saiu kamsantaiutsün nouko eppe.

²⁶Josia chhisiya alum: apa APAOU tü thumkü kiutsün, apaüh Ngiokhem ngio angtsün,

²⁷naiuso apa ngiolat aya ainou athonthe saokü nou apem Israelhai si Yihudahai Nokpaohoi Ngiolat Thsam nai satkü taim.