Read Khiamniungan Naga 2 Ateng Chhi 36 Bible Online

2 Ateng Chhi 36 - Khiamniungan Naga bible

2 Ateng Chhi 36

¹Yihuda khaiuniahoi nou Josia thso Joahaz chosanküta apa Yirusalem nai nokpao theau taiukiu.

²Tilai apa Yihuda hai nokpao tsalo, Joahaz achetpon kheikü süme noiküla, naiuso apaüh Yirusalem nai alei süme nokshing.

³Ijip hai Nokpao Nekoüh apa sothso au kankü khuwanküta Yihuda hai hau apaüh tsüshiokün kothako tangkason tsoi heng 3, 4000 naiuso chaiou lakkeng tsoi 34 ta kiu-in.

⁴Nokpao Nekoüh Joahaz nio Eliakim nung Yihuda hai nokpao the-iküta apa nian Jehoiakim ta leankiu. Joahaz to Nekoüh Ijip nai kankü khuwan.

⁵Tilai apa Yihudahai nokpao tsalo, Jehoiakim achetpon kheikü pungo noiküla, naiuso apaüh Yirusalem nai pon chekü tsak nokshing. Apaüh apa Goa APAOU thako angei sunlou.

⁶Babilon hai Nokpao Nebukat- nezarüh Yihuda koman, Jehoiakim thalowan, küta apa Babilon goumchi ai son auo nou kekü kankü khuwan.

⁷Nebukadnezarüh Amkham Tsam jengtsaiu chaiou ajantso kankü khuküta nung apa nokpao tsam Babilon nai wanan.

⁸Jehoiakimüh chhisiyatsün alum, apa achinyan chhisiya naiuso apaüh tsümeikü chhitsün lüko hakü Israel hai si Yihuda hai Nokpaohoi nouso Ngiolat Thsam nai satkü taium. Apa thso Jehoiachinüh apa nokpao noikham liloum.

⁹Tilai apa Yihuda hai nokpao tsalo, Jehoiachin achetpon chekü pet- jei noiküla, naiuso apaüh Yirusalem nai alei süme küta ajekhaiu chenyih nokshing. Apaüh lüko APAOU thako angei nou chhin.

¹⁰Tilai thsanyan nyimtao shin, Nokpao Nebukadne- zarüh Jehoiachin Babilon nai sothso tsakau kankü khuwan, naiuso Amkham Tsam chaiou jengtsaiu nouso kankü khuwan. Küta Nebu- kadnezarüh Jehoiachin po ehen nou Zedekia nung Yihuda si Yirusalem nai nokpao au shankium.

¹¹Tilai apa Yihuda hai nokpao tsalou, Zedekia achetpon kheikü tsak noiküla, naiuso apaüh Yirusalem nai pon chekü tsak nokshing.

¹²Apaüh APAOU thako angei sunhe naiuso APAOU ngio chitetsün e-po Yirimia tü nyapkü shikü tsü-anglo.

¹³Sauüh apatü mongyang saitha noiau Goa nianko ngiomongshing shanau kojakü noiküla nung Zedekiaüh Nokpao Nebukadnezar thako khengshi. Apa mongkong nou shioko APAOU Israel hai Goa dongai mongphoklekü laokü shiau tsüaiu.

¹⁴Nungko hoithiokü, Yihuda aheihoi nouso, meson nouso, naiuso khaiu- niahoi nousoüh ngüso lemkü noitsün chenpa goumchi nouso angei saisile tü hoilut, ngüsoüh sotsom nouso tü amkham, nungti ngüsoüh APAOU pemüh asio shantaiutsün Amkham Tsam nou longeian.

¹⁵APAOU ngüso paosiposo Goa nou e-po hoi apa khaiuniaso lotsüoau tsülaokü hong, tiautenai apaüh ngüso si Amkham Tsam nou poitaiuau aiukü noiküla.

¹⁶Lüko ngüsoüh Goa ün ngiongem kantsünso lochi lotsao, apa ngio nouso tsülusanshi naiuso apa e-po nousotü nyaikiu, nungai aphiting nai APAOU amongmat apa khaiunia thako thatü sungkü shin naiuso nungko asoloau tsünoiküla.

¹⁷Nungtiphe APAOU nou ngüsotü pha pou au Babilon hai nokpao kan- küshin. Nung nokpao nou Amkham Tsam nai saokü Yihuda oumhoi loatküwan. Petche si methso, melo si menyiu, akia si ameili apatü sau khako atsüojinyang tsülepkü noiküla.

¹⁸Babilon hai nokpaoüh Amkham Tsam kamhean, amkham tsam jangtsaiu kamhean, naiuso nokpao si apa asonghoiso ün chaiou jengtsaiu nouso alum loküta Babilon ai kankü khuwan.

¹⁹Apaüh Am- kham Tsam nou, noknio nou, nokpao tsam si nungko noitsün chaiou jengtsaiu nouso in nai jahthiowan, naiuso noknio lungpe nou lothean.

²⁰Apaüh aa poi nouso apem Babilon nai kankü khuwan, nungko ngüsoüh apa naiuso thsaosithsoso Persia hai Nokshing mosungkün lektso yathsüoau kankü khuwan.

²¹Naiuso nungti APAOU nou e-po Yerimia tsangkü ti khapiam ngiokü noiküla nung thawaokü shin: “Yihuda Ano aalo nou tsükankeitsün thathamau, nung goumchi nou pon aochinyat thaiutha aodangkü noian-e.”

²²Persia hai nokpao Sairus nokshing chongting pon nouko nai APAOU nou ti apaüh e-po Yerimia tsangkü khapiam ngiotaiukü noiküla nung atsüo nai shithawao-iau shan. Apaüh Sairus tü apa nokshing alumai sang asong nou wekü thsamsat lühongpeng ta liukü chhiau thsoichukü noiküla:

²³“Persia hai Nokpao Sairusüh thoiluttsün nungti noiküla. APAOU aün Goa nou, apaüh ngü goumchi athum khako nokshing au shankiu naiuso Yihuda goumchi Yirusalem nai apa thaiutha amkham tsam tsak lahsanau apaüh ngü hau thsale kiuwaniu. Nungtiphe, lo asam Goa ün khaiunia nouso chikü, nungai lukhu, naiuso APAOU asam Goa asam ko hakü lünoi.”