Read Khiamniungan Naga 2 Ateng Chhi 5 Bible Online

2 Ateng Chhi 5 - Khiamniungan Naga bible

2 Ateng Chhi 5

¹Tilai Nokpao Solomonüh Am- kham Tsam chhisiya apem khemkü shin, apaüh apa po Davidüh APAOU hau losiokü taiutsün-tang- kason chaiou lakkeng, naiuso amao jengtsaiu nouso apem amkham tsam jengtsaiu nouso apem amkham tsam jengtsaiu taiutsün tsampai nai wanan.

²APAOU Athaloue Ngiokhem Paidan David Noknio Zion ainou Amkham Tsamai kankü shiau thaiutha Nokpao Solomonüh Israelhai mele naiuso kau nouso nai ahei nouso chikü Yirusalem ai jonkam.

³Ngüso chikü Asolotsün Sümai taoko kamshikü noiküla.

⁴Tilai ahei nouso apem kamshikhem, nungai Levihaiüh Athalou-e Ngiokhem Paidan nou pilo

⁵küta nung Amkham Tsam nai kankü khu. Mesonhoi naiuso Levihoi nou APAOU Nejenkhio naiuso jengtsaiu nouso apem Amkham Tsamai kankü khu.

⁶Nokpao Solomon naiuso Israel khaiuniahoi chikü Athalou-e Ngiokhem Paidan khako kamshiküta aveau thatü piakü onnemok naiuso tsam thainian nouso loatkü chaithio kiu.

⁷Nungai meson nousoüh APAOU ün Athalou-e Ngiokhem Paidan nou Thatü Asio Thang nai akoi potsün thainian nouso khemko Amkham Tsam nai kankü shikü taiu.

⁸Ngüso ekok nousoüh Asio Paidan naiuso apitsün api nouso lemlokü noiküla.

⁹Paidan athun nou Thatü Asio Thang khako tsakü nai sauühlünou epau shiokü, lüko amao ainou naito tiai naitso epau tsüshiokü noiküla. (Nung apitsün lonyi saokü nungko noin.)

¹⁰Nung Athalou-e Ngiokhem Paidan mongko APAOU nou apa khaiuniaso ko ngüso Ijip goumchi ainou shitsün taoko ngiomong shinge tsak shankü noiküla nung ngiokhem lungkhio nime Mosaüh Sinai King ai nai thiotsün tü simkü amao titso tsünoiküla.

¹¹Mesonhoi apem, ngüso ti hoiko thalünou nungti amothi avesan tsünoikü ngüso chija losiolokü noiküla. Naiuso Levi hai jihanghoi apem Asaf, Heman, naiuso Jeduthan so, naiuso ngüso kau nousoüh ne amatchai nou thokü noiküla. Levi hoi nouso amthang nouta ajepek nai shinkü ngüso la naiuso kokiang semkü tsakü noiküla, naiuso ngüso ko jangong mattsün mesonhoi 120 hakü noiküla. Jihanghoi nouko jangong mattsünso, lathiotsünso naiuso amao dun nouso hakü thatü jeiaikü ngüsoüh APAOU hau nianlom kiukü jih nungti hang: “APAOU lülom, tiautenai apa amei noin, Naiuso apa atsüojin athontsüyang.” Meson hoi nou Amkham Tsam wankü khukü taoko, alekta APAOU hatsün thengmea thatü okü tsak nou tsam nou mean nungai ngüso amkham lotsün atao khemkü loau tsüshiokü noiküla.