Read Khiamniungan Naga 2 Ateng Chhi 7 Bible Online

2 Ateng Chhi 7 - Khiamniungan Naga bible

2 Ateng Chhi 7

¹Tilai Nokpao Solomon misao khem, aün ainou in saokü aloat chaithio nouso chethe-an, naiuso APAOU hatsün aawon ajinka nou Amkham Tsam mean.

²Amkham Tsam nou aawon ajinka nou meankü noi nou shioko meson nouso nungko napau tsüshiokü noiküla.

³Tilai Israel khaiuniahoi nou aün ainou in saotsün naiuso aawon nou Amkham Tsam meantsün ep, ngüso kha goh ai thaothiokü, apa amei naiuso atsüojin athontsüyangtsün thaiutha apa hau nianlom kiukü Goa tü amkham.

⁴Nungai Solomon naiuso khaiunia chikü nou APAOU hau aloat chaithio kium.

⁵Apaüh jangkhaiu heng 22, 000, naiuso onnemok heng 120, 000 nou aalo chaithio nungso aloat chaithio kium. Nungh apa naiuso khaiunia chikü nou Amkham Tsam losiokü noiküla.

⁶Mesonhoi nou ngüso tsa au athang khemtaiutsünko tsa, naiuso ngüso tü lalutkü Levi hoi nou Nokpao Davidüh shantsün jihang dan nouso hakü APAOU nianlom jihang nungti hang, “Apa Atsüojin to Athontsüyang!” ta ngüso Davidüh losiokiutsünli noiküla. Khaiunia chikü tsakünoi taoko meson nousoüh jangong nou matkü noiküla.

⁷Solomonüh Amkham Tsam khako khengtaiu awem nou losiokiu, küta nungko aloat chaithio athum jahkü kiutsün chaithio nouso, khülam chaithio nouso, aalo chaithio ainou eiu chaithio kium. Apaüh nungso taoson amthang sübao apaüh shankü noiküla nung chaithio in apem thaiutha nailo thatü henkü noitsün shioko chhikü noiküla.

⁸Solomon naiuso Israel hai khaiunia chikü nou Asolotsün Sümai ajekhaiu chinyatnyi saohe, nungko Hamat Aoyan ajenapki saokü ainou ajepekki nai Ijip hai elung saokü nouko khaiuniahoi asongting tsak kamshikü noiküla.

⁹Ngüsoüh am- thang losiotsün thaiutha ajekhaiu chinyatnyi naiuso wankü noiküla. Aphiteng nyi nai ngüsoüh athonlotsün sümai saohe,

¹⁰naiuso nungthan ajekhaiu nai, alei chinyat ajekhaiu kheikü süme nouko, Solomonüh khaiuniahoi nou tsamai hongan. Ngüso apa khaiunia Israel hai hau, David hau, naiuso Solomon hau APAOU nou ouk nouso chikü kiutsün thaiutha monglengkü noiküla.

¹¹Nokpao Solomonüh Amkham Tsam naiuso nokpao tsam nungso thaiutha apa ayangtaiu apem ashio epkü khemkütün phiai,

¹²APAOU nou apa dongai asoh sungh. Apaüh Solomon tü ngiom, “Ngo amisao lula-iu, naiuso ngo nung Amkham Tsam ngühau aloat chaithio nouso kiu au athang theau lou-iu.

¹³Tilai ngo ah-ou nou lolaokü wan-e tsüde- künai chihsikhiam hean au jongku nouso hong-e tsüdekünai jü khaiuniaso khako imkia tsak hong-e,

¹⁴ngüsoüh ngütü misaokü naiuso ngü- soüh tsümeikü chhisiyakü noitsün ainou mongphoklekü shi-etünaito ngo ngüso misao aün nai lula-e, ngüso angei wankiu küta ngüso goumchi loüh memei shanshi-e.

¹⁵Ngo nung Amkham Tsam khako jiokü noi-e naiuso nungko misao hongtsün chikü tü lula-au khemlokü noi-e,

¹⁶Tiautenai ngo nung athang athontsüyangkü ngo hau amkham kiuau chosankü losiowaniu. Ngü nung khüthako jiokü noi-e naiuso atao chikü thaiutha nung kipsankü taiu-e.

¹⁷Ni ngo apo Davidüh chhitsünli mongkiukü yathsüo naito, jü ngiokhem nouso angio angkü naiuso ngo nitü thoiluttaiutsün alum chhisiyakü naito,

¹⁸ngo apo Davidtü Israel nai apa thsaosithsoso tsangkü asai nokshinge ta apatü ngiotsün athalou nou chhi-e.

¹⁹Lüko ni naiuso akhaiuniasoüh ngo nihau kiutsün athoilut nouso naiuso ngiokhem nouso angio tsü angkü khuwan naito, naiuso amao hai goa nouso am- khamkü naito,

²⁰nungaito ngo nihau kiutaiutsün guomchi ainou wane, naiuso ngo nung Amkham Tsam sübao ngo amkham kiu-iau athang losiokü taium nung wan-e. Nungai khaiunia alum ainou nung alonyaiau thean-e naiuso tsümeikün yamko athatluao tsak iula-i-e.

²¹“Nung Amkham Tsam loto thatü asuhatkiukü noin, lüko nungphiai khaiunia pungkü sauhai nung yankü khu-e ngüso ngakü sange, ‘APAOU nou nung goumchi naiuso nung Amkham Tsam tü tiauta nungti chhin!’

²²Nungai khaiuniahoi nou thalakü ‘Nung goa ngüso paosiposo Ijip ainou sauüh niasankü noiküla, ngüsoüh nung APAOU nou wanan shioko ta ngio-e. Ngüsoüh amaohai goa nousotü piplo naiuso nungso amkhamkü noiküla. Nung shioko APAOU nou ngüso khako nung akuothe nou kankü shikü noin.’”