Read Khiamniungan Naga 2 Ateng Chhi 9 Bible Online

2 Ateng Chhi 9 - Khiamniungan Naga bible

2 Ateng Chhi 9

¹Shebahai Menyiu Nokpao nou Solomon niansong lula, küta apa asangau ngioyak achek ajantso kankü apatü theluau tsalokü Yirusalem ai shin. Nung menyiu nou apako ayathsüotsünso hoi apiateng nialohakü, naiuso loüh nungko hakü laoshang, chaiou naiuso chaiou lakkeng piakü ut hoi hau kan-ikü shin. Tilai apa naiuso Solomon ne phete, nungai apaüh apatü sangau yangtsün ngioyak achek nouso chikü nou apatü sangkü noiküla.

²Nungko Solomonüh apem thashikü noiküla; apa thaiutha asangtsün thashikü chiteau thatü achek to tsünoiküla.

³Shebahai menyiu nokpao nou Solomon ün mongthat mongsai lula naiuso apaüh lahtaiutsün nokpao tsam nouso ep.

⁴Nung menyiu nokpao nou Solomon thaisam puo nai taiukiutsün eheshiu ep, apa khemko asonghoi thaiutha akih tsam nouso ep, apa nokpao tsam nai chhisi- yatsünso lingthameikü shantsün neshe in tsaklu thotsün sümai thaisam nai ayathsüotsünso neshe, naiuso Amkham Tsam nai apaüh aloat chaithio kiutsünso epkü noiküla. Nungüh apa iloau tsüshiokü thangakü noiküla.

⁵Menyiu nokpao nou Solomon tü ngiom, “Ngo jügoumchi ainai athaiu- tha naiuso amongthat mongsai thaiutha ti lulakü noiküla nung ngiotsüo noin!

⁶Ngo jüpem shiküta moepkün lektso ngüsoüh ngü hau ti chiten ngo mongtsülamkü noiküla. Ngo amongthat mongsai apaitso lüko tsülulakü noiküla. Ni khaiuniahoi nou ngiotsün chiai shikü mongthat mongsai amei noin.

⁷Khaiunia sauhaiüh ni yathsüoji, sauhai asaita niko noiji naiuso ni nou mongthat mongsai ngiomei nou lulakü noiau akuo nai noin nung khaiunia nouso titengkü thaiumei!

⁸APAOU a-Goa nian lomkiuji! Apaüh ni apa nianko titi monglengji nung han-iu. Apaüh meshen khaiuniahoi Israel tsüojin naiuso asaita hau ngüso tsangsankü taiuau mongchiotsün shioko, ni ngiokhem naiuso ngiotsüo kankeiau thaiutha apaüh ni ngüso nokpao au shankium.”

⁹Apaüh Nokpao Solomon hau apaüh kankü shitsün paopei nouso kium: nungko chaiou lakkeng tsoi heng 4, 000 khengai naiuso amao chaiou lung nouso si laoshang angannyamtsün piakü kium. Nungko Shebahai menyiu nokpao nou Nokpao Solomon hau kiutsün angannyamtsün laoshang tü simkü meikü amao laoshang tilaitso tsüepkü noiküla.

¹⁰(Nokpao Hiram khaiuniahoi naiuso Nokpao Solomon khaiuniahoi nou Ofir hai goumchi ainou chaiou lakkeng loüh Junifer pai naiuso chaiou lung nouso lüko kankü shin.

¹¹Solomonüh nung Junifer pai nou Amkham Tsam hokthengpho nouso au, naiuso jihanghoi thaiutha poipoi naiuso kokiang au shankü noiküla. Yihuda goumchi nai nung khako tilaitso nungti tsüeptekü noiküla.)

¹²Nokpao Solomonüh Sheba hai menyiu nokpao hau apaüh sangtsün alum kium. Nungsoto apaüh Solo- mon hau paopei kankü shikiutsün maito thamankü phiai apoithio apa hau kiuhatsün noiküla. Nungai apa naiuso apako hatsün ayathsüotsünso Sheba hai goumchi ai laokü yashin.

¹³Pon pungkü Nokpao Solomonüh chaiou lakkeng tsoi heng 23, 000, thatso epkü noiküla,

¹⁴nung eptsün Chaile Oule haiüh liukim kiutsün chiai noiküla. Arabiahai nokpao nouso naiuso Israelhai khiamkhan nouso nokshingpaou nousoüh lüko apahau tangkason naiuso chaiou lakkeng kankiu shikü noiküla.

¹⁵Solomonüh shikhao apon tsom nime shan, nung pungkü chaiou lakkeng tsoi chinyat thatso nou langkü noiküla,

¹⁶naiuso shikhao ehen tsom süme shan, nung pungkü chaiou lakkeng tsoi süme thatso nou langkü noiküla. Nokpao nou nungso chikü Lebanon Liutsa Tsampai asong nouko taiuwan.

¹⁷Nokpao nou loüh Nokpao noikham asong tsak shankü noiküla. Nung noikham apaitso sempok huo nou lojei naiuso apaitso asangting chaiou lakkeng nou lojeikü noiküla.

¹⁸Nokpao noikham dongai sungtsün hokthengpho luok, naiuso nungtü ngamtaiutsün sonkü noiküla. Nungko phaduntaiutsün nemtso etsai pokü nung pungkü chongkhao sotsom nou tsanoikü sailutkü noiküla.

¹⁹Hok- thengpho pungkü athon chongkhao sotsom chekü nime sailutkü noiküla. Amao ti nokshingko nung nokpao noikham khekkü tilaitso tsünoiküla.

²⁰Nokpao Solomon ün thengkam nouso chikü chaiou lakkeng nou shan, naiuso Lebanon Liutsa Tsam- pai nai kankeitsün si lak nouso apem chaiou lakkeng asangting nou shan- kü noiküla. Solomon taoko tangkason nou apiamai nai tsüvethiohakü noiküla.

²¹Solomonüh khiamnok nai keitsün khenghoi Nokpao Hiram khenghoi ko hakü kamkü keitsün noiküla. Pon süme pungkü nouko apa khenghoi nou chaiou lakkeng, tang- kason, shenpok huo, mushei, naiuso mushuo nouso kankü laokü yashitsün noiküla.

²²Nokpao Solomon nung goumchi nai amao nokpao chiai memei naiuso mongthat mongsai suntsün noiküla.

²³Ngüso chikü nou Goa ainou mong- that mongsai apa hau kiutaiutsün lulaau apatü sangkü noiküla.

²⁴Ngüso pungkü nou Solomon hau tangkason, chaiou lakkeng phalaiu phakhut, dun, laoshang, mokthso, naiuso mokthso apong nouso piakü kankü shikü paopei kium. Nung chhisiya saisile pon pungkü kankeikü noiküla.

²⁵Nokpao Solomonüh apa ehli tsamkei nouso naiuso mokthso nouso thaiutha tsam heng 4, 000 noiküla, naiuso ehli mokthso nouso heng 12, 000 noiküla. Apaüh nungso ajantso Yirusalem nai taiu, naiuso apoi nouso amao noknio amomo nai taiu.

²⁶Eufrates Haiu ainou Filistia saokü naiuso Ijip hai elung saokü nouko nokpao nouso chikü khako apa atsokteng nokpao noiküla.

²⁷Apa nokshing taoko Yirusalem nai tangkason nou lung nouko vekü, naiuso Yihuda kinghok nouso nai phiopai athatha eptsünli cedar pai nouso tsükhemkü saiukü noiküla.

²⁸Solomonüh mokthso nouso Musri ainou naiuso amao goumchi pungkü ainou kankü shin.

²⁹Solomon Ngiolatpoi aya ainou athon saokü nou E-po Nathan Ngiolat Thsam nai, Shilo hai nou Ahija khapiam ngio nai, naiuso E-po Iddo Atsangshei eptsün Thsam nouso ai satkü noin, nungko Israel hai Nokpao Jeroboam nokshing thaiutha lüko ngiotaiukü eppe.

³⁰Solomonüh Israel hai apem khako Yirusalem nai pon aopüle nokshingkü noiküla.

³¹Apa ean küta David Noknio nai khanan, naiuso apa thso Rehoboamüh apa liko nokpao tsaloum.