Read Khiamniungan Naga Ezra 3 Bible Online

Ezra 3 - Khiamniungan Naga bible

Ezra 3

¹Alei chinyat nouko naito Israel hai chikü ngüso noksong nouso ko kihlokhem, naiuso ngüso chikü Yirusalem nai kamshin.

²Nungai Jehozadak thso Yihusua naiuso apa paiusihai meson nouso naiuso Shealtiel thso nou Zerubabel, apa tsammongso ko hakü tsaloküta, Goa khaiunia, Mosa Ngiokhem nai satkü taiutsün ayamhan nouso tsangkü ngüsoüh ajahtsün chaithio nouso kiuau Israel Goa amkhamao amthang nouso lashanshin.

³Laokü yashitsünso nung goumchi ko kihkü noitsün khaiuniahoi lun hatkü noi lüko, ngüsoüh amthang aya noitsün athang nouko lu shanshin. Naiuso ngüsoüh loüh jam nung amthang nai ahom asham asaita aloat chaithio kiutsün jahkü tsaloshin.

⁴Ngüsoüh ngiokhem nai noitsünli, Asolotsün Sümai saohe; ajekhaiu pungkü nung ajekhaiu thaiutha pohtsün chaithio ngüsoüh kiu;

⁵nungko hakü ngüsoüh athum jakü aloat chaithio nouso, naiuso Alei Yan sümai nouko jakü chaithio nouso kium, naiuso amao taoko asaita kamshikü APAOU am- kham nouso chhin, naiuso APAOU hau mongchiokü chaithio nouso apem kiu.

⁶Khaiuniahoi nousoüh Amkham Tsamla motsalo lüko, ngüsoüh alei chinyat nouko chongting ajekhaiu nai APAOU hau jahkü aloat chaithio kiutsün to tsalokü noiküla.

⁷Mesonhoi nouso hau Lebanon ainou Cedar pai nouso Joppa ai she- asong tsangkü kanjikanao noitsün helokü Tair naiuso Sidon noknio nai lunglanghoi naiuso pai mistri nouso hau tangka naiuso chih, khiam, naiuso olip-khiam nouso kiu. Nung chhisiya nouso apem Persia hai nokpao Sairusüh ayam sopkiutsün tsangkü chhin.

⁸Nungtiphe nungpon ngüso Yirusalem Amkham Tsam- thang nai laokü shiküta phiai, alei nime nouko ngüsoüh chhisiya nou tsaloum. Nungko Zerubabel, Yihu- sua, naiuso ngüso paiusihai chenpa nai noitsün, mesonhoi, naiuso Levihoi, thalokü khuwantsün ainou Yirusalem ai laokü yashitsünso apem, chhi nai han. Levihoi achetpon khei nouso chikü Amkham Tsam lahshitsün chhisiya nai ahei au taiukiu.

⁹Levihoi nou Jeshua naiuso apa melothsoso si tsammongso, naiuso Kadmiel apa thsoso (Hodavia kau) Amkham Tsam la shitsün nai thsale lokü ha. (Ngüso tü Levihai nou Henadad kau tsangkü hachu.)

¹⁰Tilai khaiuniahoi nou Amkham Tsam athanya chhisiya tsalo, mesonhoi nou ngüso asio phakhut khutkü ngüso pha nai jangong nouso semkü noithangnai noilo, naiuso Asaf kau Levihoi nou kokiang nouso semkü tsakü noiküla. Nokpao David taoko aiyakü lethiokü shitsün ayamhan nouso tsangkü ngüsoüh APAOU lomsan.

¹¹Ngüsoüh APAOU lomsantsün Jih, alaoshi nou laoshikü hangkü noiküla: “APAOU nou amei noin, naiuso Israel thaiutha Apa atsüojin athontsüyang.” Khaiunia pungkü nou ashiotsün lektso sang asong nou APAOU lomsan, tiautenai Amkham Tsam athanya chhisiya nou tsalokü noiküla.

¹²Mesonhoi, petche hoi, Levihoi, naiuso pothso nai ahei petche nouso piakü nou achong Amkham Tsam nou epkü shin, naiuso ngüsoüh nung Amkham Tsam athanya tsalo nou ta thap nai, ngüso sang thatü songkü wekü shapkü noiküla. Lüko amao nungko noinsoüh to amongling nou wekü noiküla.

¹³Khaiunia sauühtso amongling nou wetsün si ashaptsün jetko janthat au tsüshiokü noiküla, tiautenai ngüsoüh wetsün sang nung laiukü ainou lulakü noiküla.