Read Khiamniungan Naga Ezra 6 Bible Online

Ezra 6 - Khiamniungan Naga bible

Ezra 6

¹Nungtiphe Nokpao Dariusüh Babilon nai nokpaohoi ngiolat nai noitsünli yamchuau ngiokhem kiu.

²Naiuso nung Media hai khiamkhan ai Ekbatana noknio nouko thsamlai tsak epsan, naiuso nungko nungti sattaiukü noiküla:

³“Nokpao Sairus chongting nokshing pon nouko nai chaithio nouso jaau naiuso aloat chaithio nouso kiuau Yirusalem nai Amkham Tsam lah au ngiokhem kiu. Nung Amkham Tsam atsok nai ak-e kheikü chinyat naiuso apun nai ak-e kheikü chinyat theau noiküla.

⁴Dioai nouso lung aphan süme chiai pai aphan tsak thekü laau noiküla. Chaisiou chikü nokpao chaitaiu tsam ainou wanau noin.

⁵Loüh Nokpao Nebukadnezarüh chaiou lakkeng, tangkason, chiusilak nouso Yirusalem Amkham Tsam ainou Babilon ai kankü shikü noiküla nung Yirusalem Amkham Tsam nai lu taiushiau noin.”

⁶Nungai Dariusüh athashitsün ngio nung hong: “Ajenap Eufrates hai nokshingpaou Tattenai si Shethar Bazenai, naiuso asam aikü chhitsünso Amkham Tsam ainou soikü lünoi

⁷naiuso tsam latsünso hau ashiosung lakiu. Nung khako noitsün thang nai, Yihuda hai nokshingpaou naiuso ahei nouso hau Amkham Tsam nou lülashi-i.

⁸Ngo asam tü ngüso chhi nai lühachu ta ngioji. Nung chhisiya tsüjanpekau thaiutha ngüsoüh Eufrates Ajenap goumchi nai liu- kim shisantaiutsün nokpao chai ainou saitha thamane.

⁹Naiuso ngüsoüh pohtsün, tilüsong noin, jangtsopong, onnemoktso, aün Goa hau ajah chaithio nouso kiuao thaiutha whet, jem, theng, naiuso olip khiam nouso Yirusalem nai e-po nousoüh, saotsünli chikü tsüphiokü lükiu.

¹⁰Nung Aün Goa khako aloau lümeikü aloat chaithio nouso kiuau asamüh nung chhiau noin, naiuso apa ün ouk ngü naiuso jü thsoso da noiau mi asaokiu.

¹¹Ngo loüh ngiokhem kiushiji, ajantsoüh nung ngiokhem tsüangkü paikheam tsak apa tsam ainou tensanküta athun tsak ai senoküta nungso pe tsatkü tenshiau noin. Naiuso apa tsam hepengkü wanane.

¹²Nung athoilut sauüh lochinyane, naiuso Amkham Tsam lotheau nungai noitsünso sau kowe-e, nokpao lüko mele lüko, Goa sauüh Apa amkham au Yirusalem chosan nungüh lomowane. Ngo Dariusüh nung ngiokhem kiuwaniu, naiuso nung thumkü ang-aulu noin.”

¹³Nungai nokshingpaou Tattenai, naiuso Shethar Boznai, naiuso ngüso paiusihai asonghoi nousoüh nokpao nou thoiluttsün khekkü tongtü chhikü noiküla.

¹⁴E-po Haggai naiuso Zakaria ne tsangkü monglo- sungküta, Yihuda hai aheihoi nou Amkham Tsam latsün nai meikü ashio ep. Ngüsoüh Amkham Tsam nou Israel hai Goa naiuso Persia hai nokpaohoi Sairus, Darius, naiuso Artaksasta soüh thoiluttsünli Tsamlahtsün chhisiya khemkü shin.

¹⁵Ngüsoüh Amkham Tsam latsün chhisiya nung nokpao Darius nokshing pon luok Adar alei ajekhaiu samnyi nouko khemkü noiküla.

¹⁶Nungai Israel hai Meson hoi, Levi hoi, naiuso thalokü khuwanküta lao- kü yashitsünso apemüh amongling asong nou Amkham Tsam losiokü noiküla.

¹⁷Amkham Tsam losioau ngüsoüh jangtsopong tsom tsak, onnemok tsom nime, naiuso aloat chaithio thaiutha onnemoktso tsom püle, naiuso Israel mele pungkü thaiutha angei thaiuthako chaithio won chekü nime ta kiu.

¹⁸Mosa thsam nai ayamhankü noitsünli Yirsalem Amkham Tsam nai yathsüoau thaiutha ngüsoüh loüh meson hoi si Levi hoi singtha.

¹⁹Khaiunia sauhai thaloukü khu- wantsün ainou laokü yashi, ngüsoüh Aasan Sümai nung pon thanko chongting alei ajekhaiu chekü pet- jeinyi nouko nai saohe.

²⁰Mesonhoi si Levihoi chikü nou amkham yamko ngüso chija losiolo. Laokü yashitsün khaiuniahoi, meson hoi, naiuso Levi hoi chikü thaiutha Levi hoi nou aasan sümai nai thainian nouso loat.

²¹Nung aloat chaithio nouso thalokü khuwantsün ainou laokü yashit- sünso, naiuso nung goumchiko kihkü sauhaiüh paisilung amtsün wankü noin, küta Israel hai Goa APAOU amkhamau shikü noin, nungso chikü nou ajah amkham ainou hekü noi- küla.

²²Ngüsoüh phoplao tsüthiokün Themtsai Sümai ajekhaiu chinyatnyi saohe. Nungko ngüso thatü mong- ling, tiautenai APAOU nou Asiria hai nokpao hau ngüso tü tsüojinkü iula-itsün tsangkü apaüh Israel hai Goa Amkham Tsam lahshitsün chhi nai ngüso tü jungkü noiküla.