Read Khiamniungan Naga Ezra 7 Bible Online

Ezra 7 - Khiamniungan Naga bible

Ezra 7

¹Pon piakü phiai Persia hai nokpao Artaksasta nokshing taoko Ezra ta niankü khaiunia tsak noiküla. Apa paosiposo Akhengting meson Aron ainou noiküla: Seraia thso Ezra, Hilkia thso, Azaria,

²Shallum Zadok thso Ahitub thso,

³Amaria thso, Azaria thso, Meraiot thso.

⁴Zerahia thso, Uzzi thso, Bukki thso,

⁵Abishua thso, Finehas thso, Eleazer thso, Akhengting meson Aron thso.

⁶Ezra nung Israel Goa APAOU nou Mosa hau kiutsün Ngiokhem thathaiukü ngetsün ange amon khaiunia tsak noiküla. Ezra da apa Goa APAOU ouk noi nou shioko, nokpao nou apa hau apaüh sangtsün alum kiu. Artaksasta nokshing pon chinyat nouko nai, Ezra Babilon ainou Yirusalem ai khuau apako meson hoi, Levi hoi, amkham tsam jihanghoi, amkham tsam ehühoi, naiuso chhisiya nai noitsünso hakü Israel hai hoi tsak tsalokü noiküla.

⁸Ngüso Babilon goumchi ainou chongting alei nouko ajekhaiu ayanyap tsalo naiuso Goa ahachu tsangkü ngüso Yirusalem nai alei pungo nou tü aya ajekhaiu nouko shingoi.

¹⁰Ezraüh apa aa APAOU Ngiokhem yamtsün naiuso nung chhitsün, naiuso Israel hai hau nung Ngiokhem naiuso ayamhan apem tsandetsün nai thumkü wan.

¹¹Artaksastaüh APAOU nou Israelhai hau kiutsün ngiokhem naiuso athoiluttsün thanekü ngetsün meson Ezra hau kiu.

¹²“Aün Goa Ngiokhem Thsam nai a-nge amon meson Ezra dongai-Nokpao Artak- sasta ainou —

¹³“Jü nokshing chikü ai noitsün Israel khaiuniahoi, meson- hoi, naiuso Levihoi sauhaiüh niko hakü Yirusalem ai khuau mongchioji khuau shio-e ta ngo ayam sopkiukü thoilutji.

¹⁴Ngo ko, jümongyang losaiukiutsün khaiunia chinyat hakü ni tü thoiluttaiutsün, Goa ngiokhem nouso titi meikü angio angkü kankeiji nungtü thapau, Yirusalem si Yihuda hai aküo tsangshei au, ni hongji.

¹⁵Israelhai Goa Amkham Tsam sübao Yirusalem nai noin nungai kiuau thaiutha jü mongyang losaiukiutsünsoüh chaiou lakkeng si tangkason chaithio nouso kiutsün ni kankü khuau noin.

¹⁶Ni loüh Babilon khiamkhan chikü nai shilotsün chaiou lakkeng naiuso tangkason nouso, naiuso Israel hai si mesonhoi nou Yirusalem nai ngüso Goa Amkham Tsam thaiutha kiutsün chaithio nouso kankü khuau noin.

¹⁷“Ni nung chai paotsangkü kan- keiküta nungüh jangtsopong nouso, chonglam naiuso theng tuhloküta nungso Yirusalem Amkham Tsam amthang nai chaithio kiuau noin.

¹⁸A Goaüh mongchiotsünli ni naiuso apaiusihaisoüh titi mongchioji nung apoi tangkason naiuso chaiou lak- keng nou kankeiau shio-e.

¹⁹Am- kham Tsam chhisiya nai kankeiau ni hau kiutsün chiusilak, nouso Goa khako kankü shiau noin.

²⁰Naiuso ni Amkham Tsam thaiutha loüh tso tü poh nai, ni nokpao chaitaiutsam ainou loau shio-e.

²¹“Ngo Ajenap Eufrates khiam- khan nai noitsün chai yamko asong- hoi nouso tü Aün Goa Ngiokhem nai meson naiuso ange amon Ezra hau apaüh sangtsün

²²ko alum lükiu tangkason nai tsoi 3, 400, whet nai tsoi 10, 000, theng nai liter 2, 000, olip khiam nai 2, 000, naiuso jem nou to titithatso pokü noi-e nungtitso kiuau ngo thoilutji.

²³Aün Goa nou apa Amkham Tsam thaiutha tititso pokü noi-e nungko ni alum tsüokü lükiu, naiuso apa ngüko, naiuso jüphiai shitsün nokpao nouso thaiuthako, tilaitso tsümongmati au yangkü athe.

²⁴Asamüh mesonhoi, Levi hoi, jihanghoi, ehühoi, achhitsünso sau ainou lüko liukim titso shiloau tsünoi.

²⁵“Ezra, ni hau a-Goaüh mongthat mongsai kiutaiutsün kankeikü, Ajenap Eufrates nai sauhai a-Goa Ngiokhem tsangkü kihkü noin nung khaiunia nouso khako nokshingau mikhemhoi naiuso nokpaohoi nouso lüsingthio. Nung Ngiokhem sauhaiüh tsünge, ni ngüso hau lütsande.

²⁶Khaiunia ajantsoüh a-Goa Ngio- khem naiuso nokshing ngiokhem nouso tsüang nai, aloattsün, amao goumchi ai kankü khuwantsün, apa jengtsaiu lowantsün, tsüdekünai liukü akhou tsamai wantsün tsangkü apa hau alohat kiuau noin.”

²⁷Ezraüh ngiom, “Sam paosiposo Goa APAOU lülomsan! Apaüh Nokpao hau Yirusalem nai APAOU ün Amkham Tsam asuhatau mongchio- san-in.

²⁸Goa atsüojinyang tsangkü ngo nokpao, apa hau ayamhan- tsünso, naiuso apa khemko asonghoi chikü, atsüojinyang shiolo-iu; APAOU jü Goaüh ngü hau mongsong nou kium, küta ngo Israel hai kau ahei nouso khaiunia piakü ngüko hakü laokü yashiau mongchio-i.”