Read Khiamniungan Naga Nehemia 13 Bible Online

Nehemia 13 - Khiamniungan Naga bible

Nehemia 13

¹Tilai Mosa Ngiokhem khaiuniahoi hau sang asong nou weten, nungai Ammon hai si Moab hai goa khaiuniahoiko ha-iau tilaitso ayam tsüsopau sattaitsün epsan.

²Nung tiautenai Israel hai Ijip ainou shikhutsün taoko Ammon hai naiuso Moab haiüh eheshiu tsükiu. Nungliko ngüsoüh Israel hai tü athesan kiuau Balaam hau chai kium, lüko sam Goaüh nung athesan nou ouk tsak hau iula-in.

³Tilai Israel haiüh nung ngiokhem vetsün lula, ngüsoüh gohmao khaiunia chikü ngüso haove nai tsüha-ikü ke-an.

⁴Amkham Tsam tsampai nouso tü paotsangtsün meson Eliashib, nung Tobia ko atao laiukü mei-ekü shin.

⁵Apaüh Tobia hau tsampai asong nou kankei-iau ayam sopkiu: nungh tsampai nou chonglam naiuso angan nyamtsün chaithio, Amkham Tsam nai kankeitsün jengtsaiu, meson hoi thaiutha chaithio Levi hai hau kiutsün, amkham tsam jihanghoi hau kiutsün, ehühoi hau kiutsün chonglam, theng, naiuso olip-khiam ekve nouso, kamtaiu aulu thetsün noiküla.

⁶Nung thawaotsün taoko ngo Yirusalem nai tsünoiküla, tiautenai Babilon hai nokpao Artaksasta nokshing pon aosamkü nime nouko nai ngo apa hau ngiongem kiu au laokü khukü noiküla. Atao intso noiküta,

⁷ngo Yirusalem ai laokü shiau ngiokhem ep. Nungko ngo lekkat tiautenai Eliashibüh Amkham Tsam nai Tobia hau tsampai tsak kankei-au ayam sopkiu taiukü epsan.

⁸Ngü thatü mongmat küta Tobia ün jengtsaiu nouso chikü kengchiai yakkan.

⁹Ngo tsampai nouso losio küta, Amkham Tsam jengtsaiu, khülam chaithio naiuso angan nyamtsün laokü kamtaiu shiau ngiokhem kiu.

¹⁰Ngo loüh amkham tsam jihanghoi nouso si Levi hai Yirusalem wankü ngüso eiuai laokü khuwaniu ta lula, tiautenai khaiuniahoi nou ngüsoüh heshiu au saiukü tsükiu- shikü noiküla.

¹¹Amkham Tsam nou tsüpaotsangkü wantsün thaiutha ngo asonghoi nouso tü thsüokü thut. Küta Levi hoi si amkham tsam jihanghoi nouso Amkham Tsamai laokü shikü tsalo-ishi.

¹²Nungphiai Israel hai chiküüh amkham tsam tsampai nouso ai chonglam, theng, naiuso olip-khiam ekve nouso kankü shitsün tsaloshin.

¹³Ngo nung jengtsaiu taiutsün tsampai nou tü paotsangau meson Shelemia, Ngiokhem nai a-nge Zadok, naiuso Levihai tsak nou Bedaia, naiuso Mattania thsao, Zakkur thso nou Ha- nan soüh ngüso tü hachu au taiukiu. Nung khaiunia nousoüh chhisiya nai noitsün ngüso paiusihaiso hau eheshiu janewaotsün nai ngiotsüo noi-e ta monglamkü noiküla.

¹⁴Oh jü Goa, ngo ni nou amkham tsam naiuso amkham thaiutha tilüsong chhikü shin nung apem ayangsan.

¹⁵Nungtaoko ngo Yihuda nai Anuonyi nouko sainaoshep khiam thepsan thepsankü ep, amaohaiüh chonglam, theng, sainaoshep, phiushep naiuso amao jengtsaiu nouso Yirusalem ai gadohoi chiai thsa kanlutkü hongtsün epküta chinyatnyi nouko titso tsüjanau lotsüo.

¹⁶Tair noknio ainou khaiunia ajantso Yirusalem nai kihkü noiküla, naiuso ngüsoüh Anuonyi nouko sam khaiunia hau jankiuao nguo naiuso jengtsaiu in diodio noknio nai kankü shikü noiküla.

¹⁷Ngü Yihuda hai ahei nouso tü thsüokü thutkü ngiom, “Asam chhi tsümeikün tü athaplu! asamüh chinyatnyi nou tiauta tsüsiokü iula-iji.

¹⁸Nung shiokolu nung noknio nou chiai aküothe thawao-ikü Goa nou asam paosiposo angja-in. Nung asamüh chinyatnyi nou lothetsün tsangkü Goa amongmat Israel hai chiai tsülaokü shi-iji.”

¹⁹Nungtiphe ngo, chinyatnyi ya- loutsün ajenap taoko, noknio bekhan nouso kiapanau naiuso chinyatnyi nou moyankün lektso nung tsüsopau ngiokhem kiu. Chinyatnyi nouko noknio mongai titsüo kankü tsünapi- au, bekhan nouso ko jü khaiunia ajantso hau jimkü noi-i-e.

²⁰Jam si müjamto jengtsaiu in diodio jantsün chaile khaiuniahoi nou, pungonyi soh nai noknio lungpe nouso chiai shamkü noiküla.

²¹Ngü ngüso lohatkü ngiom, “Ahom nou shi-iau thaiutha bechiai taiukü noiau pohkü tsünoi. Asamüh loüh nungti chhishi nai, ngo asam thako oukong kankei-e.” Nungko yaküto ngüso chinyatnyi nai tsüshishikü laowan.

²²Ngo Levihai tü ngüso chija losio loküta khukü chinyatnyi nou siokü taiu si tsütaiu tsangsheiau bekhan nouso tü eh hükü lüthe ta ngiokhem kiu. Oh jü Goa, nung thaiutha lüko ngo ayangsan, naiuso ni nou atsüojin asong tsangkü ngo akipsan.

²³Nungtaoko Yihuda pohai hoi piaküüh Asdod, Ammon naiuso Moabhai menyiu tsamsigoh yangkü thasan.

²⁴Ngüso thso awetsoüh sam ngio tsüngeshikü Asdod hai ngio tsüdekünai amao mele ngio chitekü noiküla.

²⁵Ngo pohai nouso tü thsüokü thut, küta ngüso khütha ai athesan shanlutkü ngüso tü woi, naiuso ngüso khaiuou sekkankiu. Nungphiai ngo ngüso si ngüso thsoso gohmao khaiuniahoi nouko tsamsigoh laitso tsüyangshi au, Goa nianko ngiomongshinge tsak shanlou-in.

²⁶Ngo ngiom, “Gohmao menyiuhoi tsamsigoh yangtsün shioko Solomon nokpaoüh angei sunhe, Amao goumchi nokpao hoiko naito apa songtsokü noiküla, Goa nou apa tü tsüojin naiuso Israel hai apem chiai apa nokpao the-in, mungti lüko apa angei nouko sali.

²⁷Nungaito samüh asam saisile tü hoilutkü, gohmao hai menyiu tsamsigoh yangkü sam Goa tü angio tsüang-e süne?”

²⁸Joiada nung Eliashib thso Akhengteng meson noiküla, lüko apa thsoso ongko tsaküh Sanballat thso menyiuthso Beth Horon noksong ainou tsamsigoh yang, nungtiphe ngo Joiada Yirusalem ainou soian-in.

²⁹Oh Goa, nung khaiunia nousoüh mesonhoi si Levi hoiko ni athalou-e shantaiutsün longei-aniu nung lüyangsan.

³⁰Ngo khaiuniahoi nou gohmao jengtsaiu apem ainou losiokiu, küta mesonhoi naiuso Levihoi thaiutha khaiunia pungkü nou chaithio nouso jah au,

³¹pai nou atao tongtü nouko kanjikanau, naiuso ngüsoüh chong- ting yamhetsün chonglam naiuso chongting semhetsün pai-eiu chai- thio kankü shi au, nung momo hao- son ngeau ngiokhem shantaiukiu, Oh Goa, nungso chikü yangsan küta nung thaiutha ngü hau amai nou akiu.