Read Khiamniungan Naga Nehemia 2 Bible Online

Nehemia 2 - Khiamniungan Naga bible

Nehemia 2

¹Alei püle phiai nyitso Nokpao Artaksasta thaisam noitao ngo apa dongai theng kankü khu. Apaüh ngo nung khako tilaitso tsü- monglingkü tsüep,

²Nungtiphe, apaüh ngü tü sangh, “Ni tiauta tsümonglingto? Ni akia tsüde, lüko ni tsoühto tsümonglingkü noi-e.” Nungai ngo lekkat

³kü thalakü ngiom, “Nokpao aakih laiukü lünoi! Jü paosiposo khantaiutsün noknio alothe nai taiukü naiuso bekhan nouso jekthiowankü noikü ngo monglingkü noiau shio-e süne?”

⁴Nokpao nou sangh, “Ni ti in mongchioji?” Ngo Aün Goa nou tü misao sao

⁵küta nokpao tü thashin, “Nokpao nou ngü tü atsüojinyang epsankü ngo kojatsün thalaau mongchio naito, ngo jü paosiposo khantaiutsün nok- nio shanshiau Yihuda hai goumchi nai akhu-i.

⁶Nokpao nou apa tsammongnyiu apa dongko moknoi hatsün tao ngo, kojatsün thalan. Apaüh ngü tü tilek- tso noi-iu-e naiuso titaoko laoshi-e ta sangtsün ngo apa hau chiten.

⁷Nungaih Ajenap Eufrates khiamkhan ai noitsün nokshingpaou dongai, Yihuda nai ngü tsakei-au yam asopkiu ta thsamsat hongkü koja.

⁸Ngo loüh nokpao ün liutsa lang jimtsün Asaf hau kiuau, Amkham Tsam ehüpuo bekhan nouso shanau, noknio pe nouso shanau, naiuso ngo kih au jü tsam thaiutha khiu nouso kiuau alotsüo thsamsat tsak sao. Nokpao nou ngü saotsün chikü kiu, tiautenai Goa ngüko hakü noiküla.

⁹Nokpao nou ngüko hakü süpai asong ajantso naiuso mokthso kankeitsün hoi tsak hong, naiuso ngo Ajenap Eufrates ai khuau tsalou. Nungai ngo nokpao nou sattsün thsamsat nouso nokshingpaou nouso hau kiu.

¹⁰Lüko Bet Horon noksong ainou Sanbalat, naiuso Ammonhai khiamkhan ainou asong tsak Tobia, neüh Israelhai khaiunia thaiutha chhisiya amei chhiau khaiunia ajantso shikü noin ta lulakü thatü mongmat.

¹¹Ngo tsülaokü Yirusalemai khu, naiuso ajekhaiu samnyi nouko.

¹²Goa nou Yirusalem thaiutha ngü tü ti chhiau lotsüo nung ngo sau hau lüko tsüchite. Nungaih ah-wem ngo chuküta ngüko jühaiso ajantso nialokü khu. Samüh kanlükhuntsün thainian nung ngo moknoitsün gado noulu noiküla.

¹³Ngo noknio wankü ajenap nai Tsamei Bekhan yankü khuküta ajepekki nai Dragon Temkhao ainou beisikin Bekhan dongai khutsün tao loüh ah nyakhemkülu noiküla. Ngo khutsün tao, noknio pe nouso lotheankü ep.

¹⁴Nungphiai, ngo ajepek nai, ajenapki nai Haiuchet Bekhan naiuso Nokpao ün Temkhao ai khu. Nungai ngo moknoitsün gado nou lungpe loipengtaiutsün yankü khuau tsüshio,

¹⁵nungtiphe ngo gado chiai moknoikü lungpe nouso tü thapkü Kidron Tsamei saokü khuwan. Nungphiai, ngo, ngü saotsün yam tü sungküta Tsamei Bekhan yankü noknio nai nap.

¹⁶Ngo tiai khu naiuso ti chhin, nungai noitsün ashehoi nousoüh ti tsünge. Nungtao saokü nouko ngo meshen Yihuda paiusihaiso, Meson nouso, ahei nouso, asonghoi nouso, tsüdekünai chhisiya nai sauhaiüh haoson lokü chhiau noiküla ngüso tsak hau lüko titso tsüchite.

¹⁷Lüko loh ngo ngüso tü ngiom, “Athaplu sam ti aküo nai noin, tiautenai Yirusalem nyi-ankü noin! Naiuso nung Bekhan nouso lotheaniu! Sam amiam tsünoi shiau samüh noknio lungpe nouso shanshiko.

¹⁸Nungai ngo ngüso hau Goa titi ngüko hakü noiküla naiuso ngü hachukü shin, naiuso nokpao nou ngü tü ti-in ngiokü noiküla nungso chiten. Ngüsoüh thalakü ngiom, “Samüh nung shanshiao tsalouko!” Naiuso nung chhisiya tsalouau ngüso khemlo.

¹⁹Tilai Sanbalat, Tobia, naiuso Arab hai nou Geshem soüh samüh ti chhisiya au ayang noin nung lula, sam tü nyailutkü ngiom, “Asamüh ti-in chhiji ta yangji? Asamüh nokpao tü khengshiji süne?”

²⁰Ngo thalakü ngiom, “Aün Goa nou sam hau ashiolotsün kiu-e. Sam Apa yathsüotsünso noin, naiuso samüh nung chhi nou tsalowane. Lüko Yirusalem nai ti haosonko lünou asam shiohakü tsünoi, naiuso kikiyam nai lüko asam tiko tsüha.”