Read Khiamniungan Naga Nehemia 3 Bible Online

Nehemia 3 - Khiamniungan Naga bible

Nehemia 3

¹Noknio lungpe nungti shankü shin. Akhengting meson Eliashib si apa paiusihai meson nousoüh Onnemok Bekhan nou shanshi, nung losioküta bekhan nouso losat. Ngüsoüh nung lungpe Tsamthong Tsom tsak ta jontsün naiuso Hananel Tsamthong saokü losio.

²Nungtü than nou Yeriko haiüh shan. Imri thso Zakkurüh nungtü than nou shan.

³Hassena hai pothsoüh Ngou Bekhan nou shan. Ngüsoüh satpao nouso si bekhan nouso shanlut, naiuso bekhan kiapao thaiutha kou-ang nouso si koukhop nouso shanlut.

⁴Hakkoz thsao Uria thso Meremotüh nungtü than nouso shan. Meshezabel thsao Berekia thso Meshullamüh nungtü than nouso shan. Baana thso Zadoküh nungtü than nouso shan.

⁵Tekoa haiüh nungtü than petab nou shan lüko noknio aheihoi ta chhi haoson thaisan kiutsünsoüh kiutsün phasihok chhi nouko tsümongchio.

⁶Pasea thso Joiada naiuso Besodeia thso Meshullam neüh Jeshana Bekhan shanshi. Ngüsoüh satpao nouso si bekhan nouso lolut, naiuso kou-ang nouso si koukhop nouso shanlut.

⁷Gibeon hai nou Melatia, Meronot hai nou Jadon, naiuso Gibeon si Mizpa haiüh nungtü than nou Ajenap Eufrates nokshingpao tsam saongoi- kü shanlut.

⁸Lakkeng langtsün Harhaia thso Uzzielüh, nungtü than nou shan. Angannyam shantsün Hananiaüh nungtü than nouso Pe Apun ta jontsün tü thalutkü shan.

⁹Yirusalem khiamkhan apaitso nouko nokpao Hur thso Refaiaüh thetsün, nungtü than nou shan.

¹⁰Harumaf thso Jedaiaüh nungtü than nou shan, nung apa tsam dongko noiküla. Hashabneia thso Hattusüh nungtü than nou shan.

¹¹Harim thso Malkija naiuso Pahat Moab thso Hashub neüh nungtü than nou si pulak saitsün Tsamthong shan.

¹²Hallohes thso Shallum sau Yirusalem Khiamkhan apaitso nouko nokpao noiküla, apaüh nungtü than nou shanlut. (Apa menyiuthsosoüh chhisiya nai hachukü noiküla.)

¹³Hanum naiuso Zanoa hai noknio nai kihtsünsoüh Tsamei Bekhan nou shan. Ngüsoüh bekhan nouso lolut naiuso nung bekhan kiapao kou-ang nouso si koukhop nouso lolut, küta Achinyan Bekhan tü thalutkü pe nou ak-e 400 ngoikü lomeishi.

¹⁴Rekhab thso Malkija, sau Bet Hakkherem khiamkhan nai nokpao noiküla, apaüh Beisikin Bekhan shanshi. Apaüh bekhan nouso losat, naiuso bekhan Kiapao kou-ang si koukhop nouso lolut.

¹⁵Kolhoze thso Shallum, sau Mizpa khiamkhan nai nokpao noiküla apaüh Haiuchet Bekhan nou shanshiküta nung lapukkü taiu, kou, kouang, naiuso koukhup nouso lolut. Shela temkhao nai apaüh nokpao pemong tü saokü lungpe nou shan, nung David Noknio ainou saotsün hokthengpho nouso tü yangkü noiküla.

¹⁶Azbuk thso Nehemia sau Betzur khiamkhan apaitso nouko nokpao noiküla, apaüh nungtü than nou, nokpao David etam khako ainou temkhao naiuso süpaihoi kihtsün tsam thalutkü shankiu.

¹⁷Nung tü than lungpe nouso shantsün Levihai nungso noiküla: Bani thso Rehumüh nungtü than nou shan. Keila khiamkhan apaitso nai nokpao Hashabiaüh apa khiamkhan tsako nung tü than nou shan.

¹⁸Henadad thso Bavvai, sau Keila khiamkhan apaitso nai nokpao noi- küla, apaüh nungtü than nou shan.

¹⁹Mizpa hai nokpao, Jeshua thso Ezerüh sahsingio taiutsün khako pe kumloyatsün athang saokü nouko shanshi.

²⁰Akhengting meson Eliashib tsamai naptsün koukhan tü thalutkü nungtü than nou Zabbai thso Baruküh shanshi.

²¹Eliashib tsamthun tü thalutkü, nungtü than nou Hakkoz thsao, Uria thso Meremotüh shan.

²²Nungtü than lungpe nouso shantsün mesonhoi nungso noiküla: Yirusalem lemkü noitsün mesonhoi nou nungtü than nouso shan.

²³Benjamin naiuso Hashub neüh ngüne tsam khako noitsün lungpe shan. Anania thsao Maaseia thso Azariaüh apa tsam khako noitsün lungpe nou shan.

²⁴Nungtü thankü Azaria tsam ainou Pe aniokun saokü lungpe nou Henadad thso Binnuiüh shan.

²⁵Dio ai aniokun naiuso asongthon nokpao tsamthong ehühoi mikhem tsam saokü nou Palal thso nou Uzaiüh shan. Nung ajepek nai Khiam Bekhan ta jontsün naiuso Amkham tsam hütsünso tsamthong saokü Paros thso nou Pedaiaüh shan.(Nung amkham tsamai chhitsünso kihtsün, Ofel noknio ta jontsün athang tsak shimkü noiküla.)

²⁷Tekoa khaiuniahoi nou ngüso chhi müjam nou Amkham Tsam ehü tsamthang asong tü lalutkü nouko yalo nou Ofel shimkü lungpe saokü nungthan petab nou shanshi.

²⁸Mokthso Bekhan ainou ajenapki ai khutsün petab nou mesonhoi tsaküh shan, khaiunia pungkü nou momo tsam khako nou pe

²⁹Nungtü than nou Immer thso Zadoküh apa tsam khako noitsün pe. Loüh nungthan petab nou Ajepek Bekhan jimtsün Shekania thso Shemaiaüh shan.

³⁰Shelemia thso Hanania naiuso Zalaf thsoso ongko luok nou Hanan neüh ngüne chhi haoson müjam nou nungthan petab nou shan. Berekia thso Meshullamüh apa tsamkha ko noitsün nungthan, petab nou shan.

³¹Apa tü thankü chaiou lakkeng langtsün Malkijaüh amkham tsam ai naiuso chailehoi nouso tsamai yathsüotsünso tsam saokü naiuso Mokthso Bekhan tü lalutkü noitsün asongthon tsampai aniokun saokü nou shan.

³²Aniokun tsampai ainou Onnemok Bekhan saokü nou athonting petab nung chaiou lakkeng langtsün naiuso chailehoi nousoüh shan.