Read Khiamniungan Naga Nehemia 4 Bible Online

Nehemia 4 - Khiamniungan Naga bible

Nehemia 4

¹Tilai Sanbalatüh sam Yihuda haiüh lungpe nou shanshitsün chhisiya tsalo-iu ta lula, apa mong- mat sungküta sam lochilotsaoau yalou.

²Apa paiusihaiso naiuso Samaria hai süpai hoi khako apaüh ngiom, “Nungso tiau tsüthekün Yihuda haiüh ti chhisane ta yangji? Ngüsoüh noknio nou shanshi-e ta yang taim süne? Aloat chaithio kiutsün tsangkü ngüsoüh nyitsokolu chhisiya khemau yangji süne? In nou jekpeng taiutsün kamshi noi nou ngüsoüh tsamlahtao lung shanau shio-e süne?”

³Tobiaüh lüko apa dongko tsakü noikü ngiohan, “Ngüsoüh ti in lungpe siudekü pesankü shin? Chiu tsaküh lüko nung thungloian au shiom!”

⁴Ngü misao sao, “O Goa, ngüsoüh sam tü lochi lotsaotsün tü anglu! Ngüso alochi lotsao, ngüso khütha nai lünoi-i. Ngüsoüh taiutsün alum lükaolükhunan; naiuso ngüso goh- mao goumchi tsakai akhothiotsünsoli lükanlükhunan-i.

⁵Ngüso hau tsümeikün lawankiu, naiuso ngüso angei nouso labean, tititenai ngü- soüh sam lungpe shantsünso lochi lotsao-iu.”

⁶Nungtiphe samüh lungpe petsün tsülaokü chhi naiuso khaiuniahoi nou chhi chhiao mongchio nou shioko, atsok nai athang awem ano shakta sungngoi-an.

⁷Sanbalat, Tobia, Arab hai, Ammon hai, naiuso Ashdad haiüh Yirusalem lungpe chhisiya samüh ashio epji, naiuso lungpe ajet nyomantsünso asat nou saophanganiu ta lulanai ngüso thatü mongkia.

⁸Nungtiphe ngüso chikü kamlokü Yirusalem komkü ta angem losanau that,

⁹lüko samüh sam Goa tü misao küta ngüso ainou kipsanao ehü asoh si anyi taiukiu.

¹⁰Yihuda haiüh hangtsün jih tsak nungti noiküla: “Thsale nouso kantsün tsangko sam outsükongkü iulawanji; Lungpe loithiotsün beisikin nouso piakü kankü khuau noin. Naito samüh lonyi lungpe nou titi pesanau shio-e?”

¹¹Ngüsoüh sam chi-ai shikü sam loatküta chhi nouso mo lomowankün lektso sam ehsoüh sam tsüdekünai sam tü ti thawaoji nung tsüepshi-e ta yang.

¹²Lüko atao atao nouko Yihuda hai sauhai sam ehoiso ongko kihakü noiküla ngüso shikü sam thako sam ehoiso mongyang chitekü sam lotsüo.

¹³Nungtiphe chhisiya tilüsongai losaokü mokhemkü noin ngo khaiuniahoi nouso hau sah- singio, naiuso uokop pai lukkü pothso lingkü lungpetü patkü ngüso tsa-i.

¹⁴Ngo khaiuniahoi nouso yange- lattsün ep, küta ngüso ahei nouso tü ngiom, “Sam ehso lun hatkü lanoi. APAOU titi asong naiuso ahat au noin, naiuso asam paiusihaiso, asam thso- so, asam tsammongnyiuso, naiuso asam tsamkhaiu thaiutha titi eh likiukü shin nung lüyangsan.”

¹⁵Sam eh soüh ngüso akausai mongthat nouso samüh epsaniu ta lula-iu, naiuso Goa nou ngüso ayang shioheaniu ta ngüsoüh ngela, nungai sam lungpe nou shanshiau laokü khu.

¹⁶Nungai yakü jü khaiuniasoüh awetso nou chhi nai, awetso nou laih, shii, naiuso uokop semkü ehli sheitho thokü ehükü tsa. Naiuso sam aheihoi nousoüh lungpe petsün khaiuniahoi tü thumkü jung.

¹⁷Lungpe peau jengtsaiu kankeitsünsoüh lüko pha tsak nou chhi chhin naiuso pha tsak nou dun semkü noiküla.

¹⁸Naiuso chhisiya nai noitsün khaiunia pungkü nou sah tsak tsak ngüso om ai sup. Naiuso jangong matkü eh pungkiuau noitsün khaiunia nou to jü dongko noi.

¹⁹Ngo khaiuniahoi, ashe naiuso aheihoi nouso hau chitekü ngiom, “Chhi nou yak- pengpengkü noi-an, naiuso sam lungpe chhi nai tsak si tsak jetko laiukü jettekü noin.

²⁰Asamüh jangongmat ngem nou lunai, ngü lemkü akamshi. Sam Goa sam thaiutha eh likiu-e.”

²¹Nungtiphe ajekhaiu pungkü ahshiochan ainou asoh kianthsüo mosungkün lektso, samhoi awetso nou lungpe nou pe, naiuso hoi awetso nou laih lokkü hükü noi.

²²Asoh taoko samüh noknio nou tü hükü naiuso anyi taoko chhi chhikü hau, nung taokonai ngo chhi nai aheihoi naiuso ngüso hachutsünso tü asoh Yirusalem noknio ai noiau ngio.

²³Ngo asoh lüko jü sheitho tsüngiowan nungti jü haiso jü tsamkiso naiuso jü ehüüh lüko tsüngiowan. Nungti sam chikü nou meshen dun semkü taiu. Naiuso sam chikü nou sam dunsiyam nouso sam shimkü taiu.