Read Khiamniungan Naga Nehemia 5 Bible Online

Nehemia 5 - Khiamniungan Naga bible

Nehemia 5

¹Atao intso noikütün phiai melo menyiuhoi chiküüh meshen dei- sinio Yihudahai thako khengshiau tsalou.

²Ajantsoüh ngiom, “Sam tsammong songkü iula-iu, nungtiphe sam aa kih au khülam pohji.”

³Ajantsoüh ngiom, “Samüh khülam saiukü epküta sam naiusile ainou thakhukü noiau samüh eiu nouso, sainaoshep eiu nouso naiuso tsam nouso shankiuwanao sungji.”

⁴Loüh ajantsoüh ngiom, “Sam eiu naiuso sainaoshep eiu nouso kotha nou nokpao liukim thamao samüh chai laiuao sungji.

⁵Sam deisinioso Yihudahai lilu sam lüko khaiuniale tsak ainou lu noin. Sam thsoso lüko ngüso thsoso lilu me-in tsüde süne? Lüko samüh sam thsoso sua au iula-iaulu sungji. Sam menyiuthsoso ajantso to sua iulakü jananiu. Tiautenai sam eiu si sainaoshep eiu nouso sam ainou kankü khuwanphe, samüh ti chhiau tsüshio.”

⁶Tilai ngo ngüso mongtsütsamkü anamnamtsün lulan, ngo mongmatkü noiküla,

⁷küta ngo chhi nou chhiau yanglou. Ngo aheihoi naiuso asong nouso ta thutkü ngiom, “Asamüh asam deisinioso thangmangji!” Ngo nung thsale tü thalouau nyong ngiokam tsak jonkam.

⁸Küta ngiom, “Samüh shiotsün lektsoto, sam deisinioso sauhai gohmaohai hau janankü noin samüh ngüso laokü tuhshiau noin. Lo, asamüh meshen deisinioso ngüso chija asam hau janthiowanau thoiji!” Nungaih ahei hoi nouso ti ngio au tsüshiokü tsamkü iula.

⁹Nungaih ngo ngiom, “Asamüh ti chhiji nung tsütha! Asamüh to Goa ngio a-ngaulu noin naiuso ayamtha nou chhiau noin. Nungaito asamüh sam ehso Melemaohai hau sam tikokota lochilotsao-iau tsünoi.

¹⁰Ngo khaiuniahoi hau chai naiuso khülam ngü ainou alaiulo-in, nungti jü paiuso lüko naiuso ngü hau chhikiutsün khaiuniahoi hau laiulo- in. Lo, samüh athamshiau alaiu lotaiutsün apem wankiuwanko.

¹¹Ngüsoüh asam tü laiulotsün Chai- laiu, khülam, theng, Olip-khiam, chikü tsüsaoshikü lüwanan. Naiuso ngüso eiu, sainaoshep eiu, olip-shep, naiuso tsam nouso loyakü lülaokiuwan!”

¹²Naiuso ahei nousoüh thalan, “Ni ngiotsünli samüh chhi-e. Samüh jengtsaiu nouso laokü kiuwane naiuso chailaiu nouso tsüsaoshi-e.” Ngo mesonhoi nouso jonküta ahei nousoüh ngüso khako ngiomongshinge, thaloutsün ngüsoüh kankeiau shanlou-i.

¹³“Nungaih ngo jü omlemkü thetaiutsün omkhi losankü sowane. Nungli sauhaiüh meshen athalou tsükankei-e asam saulünou Goa nou sowane.” Ngo ngiom “Goa nou asam tsam naiuso asamüh taiutsün alum ti tsütaiukiukü kankü khuwane.” Kamshikü noitsün pungkü nou ngiom, “Amen!” Küta APAOU hau nianlom kium. Naiuso aheihoi nousoüh ngüso athaloutsün chhin.

¹⁴Yihudahai goumchi ai ngo nokshingpaou chosan küta pon chekü nime nouko, nung nokpao Artaksasta pon khei ainou pon aosamkü nime tü thalutkü, jü deisinioso si ngo nokshingpaou nou heshiuau haoson noitsün tsühede.

¹⁵Jü khako chhisiyakü shitsün nokshingpaou pungkü eheshiu naiuso theng thaiutha ajekhaiu tsakko tangkason aopüle saokü noitsün shioko khaiunia nouso thsale tsak iulakü noiküla. Ngüso tsamkisoüh lüko khaiuniahoi thangmangkü kankei. Lüko ngo nungli tsüchhi, tiautenai ngo APAOU asuhatkü noiküla.

¹⁶Ngo jü oukong chikü lungpe shanshiau thaiutha lu wan naiuso chaiou jengtsaiu titso tuhkü tsütaiu. Jü thaiutha chhitsün khaiunia pungkü nou lungpe shanshitsün nouko hakü shin.

¹⁷Lemkü noitsün chenpa ainou shikü khaiunia sauhaiüh hachukiu nungso chikü, chiai ngo Yihudahai khaiunia naiuso ngüso ahei nouso 150 asaita jü thaisam puo nai tsad.

¹⁸Ajekhaiu pungkü ngo jangtsopong tsak, onnemok ameiting ongko luok, naiuso waio piakü nou tsadkü taiu, naiuso ajekhaiu che nou mongko ngo theng ayan shen. Lüko khaiuniahoi nousoüh kannau thsa nou thatü lethsangkü noin ta ngephe, nokshingpaou nou epau maikü noitsün haoson tsülokü wan.

¹⁹O Goa, nung khaiunia nouso hau ngo alum chhisiyakiukü shitsün thaiutha ngü ayangsankiu ta ngo ni tü misaoji.