Read Khiamniungan Naga Nehemia 6 Bible Online

Nehemia 6 - Khiamniungan Naga bible

Nehemia 6

¹Tilai lungpe nou shankhemiu, loto mothawaokü to poikü tsü- noishi ta Sanbalat, Tobia, Geshem, naiuso sam eh apoi nousoüh lula, nungtaoko nai loüh bekhan nai kou nouso moshankü noiküla.

²Nungko Sanbalat si Geshem neüh ngo ngüso ko Ono Tsamei nai nok tsakko pheteau ayang kiukü jü dongai ngiongem tsak hong. Nungko ngü loatau ngüso akausai mongyang tsak noiküla.

³Ngü ngüso dongai ngiongem hongkü ngiom, “Ngo asam dongai shi au thaiuthako chhisiya nou lolaokü taiu au tsünoi.”

⁴Ngüsoüh nung ngiongem lu jüdongai atao pülejam hongshin, naiuso nungtao pungkü ngo ngüso hau nung ngiongem lu laokiushi.

⁵Nungaih Sanbalatüh ngiongem pungo nou kankü apa yathsüotsünso ongko tsak tsangkü thsamsat tü ii tsüthaolutkü jü dongai hongshin.

⁶Nung thsamsat nungti satkü noiküla:

⁷“naiuso nung shioko ni Yihudahai nokpao ta Yirusalem nai pungpengau thaiutha e-po ajantso khemkü taim ta ngioji. Nokpao nou nung thaiutha anglu au noin, nungtiphe ngü yangkiutsün nung aküo thaiutha je epekü chitekü hau noin.”

⁸Ngo apa dongai ngio tsak laoshi: “Ni ngiotsün nung titso thawaokü tsünoi. Ni nung chikü achija shanlotsünlu noin.”

⁹Ngüsoüh sam chhi lolaowanau sam lohatkiukü kowetsün noiküla. Ngo misaokü ngiom, “Goa, lo ni ngü ou akong-i!”

¹⁰Nungtao thatso nai, tsam wankü khuau tsüshiokü noitsün Mehatabel thsao, Delaia thso Shemaia sailuau ngo khu. Apaüh ngütü ngiom, “Ni naiuso ngo khuküta Amkham Tsam Asio-Thang nai kou nouso kiapshikü aikü pamanau noin, tiautenai ngüso ni loatau shi-e. Lo yakü nouko titaoko lünou ni loatao ngüso shi-e.”

¹¹Ngo thalakü ngiom, “Ngo khukeikü pamtsün khaiunia tsak tsüde. Amkham Tsam nai pamlotsün tsangkü jü aah kipsane ta ni yangji süne? Ngo nung laitso tsüchhi-e.”

¹²Tilai ngo nung ngio nou tü yanglushi, ngo nung Goa nou Shemaia tü tsüchite ta seisan, lüko ngü hau nung alohat kiuau Tobia si Sanbalat neüh apa hau nekhem paopei kiukü noitaim ta seisan.

¹³Ngüsoüh jünian mei lothekü naiuso lomiamkü ngü lohatkü angei sunhe-iau apa tuhkü noiküla.

¹⁴Ngo misao saokü ngiom, “Goa, Sanbalat si Tobia neüh tilüsong chhikü noin nung lüyangsan küta ngüso hau angja akiu. Ngo lohatau kowetsün nyiuhai Noadia naiuso amao e-po nouso apem sauhaiüh ngü lohat au koweji nung lüyangsan.”

¹⁵Noknio lungpe chhisiya athum nung ajekhaiu aopungokü nime Elul alei kheikü pungonyi nouko khem.

¹⁶Tilai chenpa mele sam ehoi nousoüh nung lula, ngüsoüh amiam ep-iu ta seisan, tiautenai khaiunia pungkü nou nung chhisiya Goa ahachu hakü noin ta nge-en.

¹⁷Nung atao chikü nouko Yihudahai aheihoi nouso Tobia ko ngioyappekü noiküla.

¹⁸Yihuda nai khaiunia apia nou apako ha, tiautenai apa kaiu Ara thso Shekania nung Yihudahai noiküla. Nungko hakü, apa thso Jehohananüh Berekia thso nou Meshullam thso menyiu- thsoko tsamsigoh yang.

¹⁹Khaiu- niahoi nou Tobiaüh chhi amei chhitsün chikü khaiuniahoi nousoüh jü khako chite naiuso ngo ngiotsün alum ngüsoüh apa hau chite. Naiuso apaüh ngü lohatau sattsün thsamsat nouso hongshitekü noiküla.