Read Khiamniungan Naga Esther 1 Bible Online

Esther 1 - Khiamniungan Naga bible

Esther 1

¹Nokpao Ahasurus Persiahai noknio ateng Susa ko apa nokpao noikham ai noikü khiamkhan 127 khako India ainou Sudan saokü nokshingkü noiküla.

³Apa nokshing sampon nouko nai apaüh asonghoi naiuso nokpao nok- shinghoi chikü thaiutha sümai tsak shan. Persiahai si Mediahai süpaihoi loüh khiamkhan nai nokshingpaou nouso naiuso lengsiyahoi nouso kamhakü noiküla.

⁴Apa ün ajinka nokshing, jengtsaiu, akhengting asuhat naiuso nianlom nou alei louk thumkü hankü noiküla.

⁵Nungphiai, nokpao nou Susa noknio nai noitsün khaiunia memei si tsosilu chikü thaiutha sümai tsak shan. Nung sümai nokpao tsam aimongko anojet tsak thumkü noiküla.

⁶Nung Pemong nou paipun asangnya tsüdekünai athaio nou alengyam shanküta Marbel kheam nouso chiai ne ashethop nou tang- kason khiaptso nouso tü thsanlut. Chaiou lakkeng naiuso tangkason nou shantsün then nouso marbel nou shantsün kemongko taiu, asangnya naiuso anyaching nou nung chiai noiküla.

⁷Chaiou lakkeng thengkam nousoko theng nou kium, nungko thengkam nime lüko emekü tsünoiküla, naiuso nokpao nou theng mongchiokü senkü noiküla.

⁸Nungko athat ti tsüyangkü shiu-ikü noiküla; khaiunia pungkü ngüsoüh aiutsün litso shiuau nokpao nou nokpao tsamai ayathsüotsünso tü ngiokhem kiukü noiküla.

⁹Nungtaoko, nokpao tsam mongai Nokpao tsammongnyiu Vashtiüh menyiuhoi hau sümai tsak kiukü noiküla.

¹⁰Nokpao sümai chinyatnyi nouko nai nokpao nou theng shiuküta monglengkü iula, nungtiphe apaüh apa tengkhaiu ayathsüotsünso thsülemkü taiutsün ngüso khaiunia chinyat: Mehuman, Biztha, Harbona, Bigtha, Abagtha, Zethar naiuso Karkas so jonkü noiküla.

¹¹Apaüh ngüsotü apa tsammongnyiu Vashti apa khaiu nai kandio keiloküta nialokü shiau ngiokhem kiu. Nung menyiu aleng ameiteng tsak noiküla, küta nokpao nou apa alengmei asonghoi nouso si apa mesanso chikü hau hanau mongchiokü noiküla.

¹²Lüko tilai ayathsüotsünsoüh Vashti hau nokpao nou ngiotsün chiten, menyiu nou ashiau tsümong- chio, nungüh nokpao mongmat sungikü noiküla.

¹³Nungaih nokpao saisileli kikiyamko aküo ngetsünso sauhaiüh ngiokhem ngen nungso ta mikhem kiuau sang.

¹⁴Nung ange khaiu- niahoi sauhai apaüh paikü ayamhan thaiutha kankeikü noitsün: Kar- shena, Shethar, Admatha, Tarshis Meres, naiuso Memukan nung Persea naiuso Mediahai asonghoi chinyat nouso apa nokshing nai asonghoi ongko atsokteng noikham nai noitsünso noiküla.

¹⁵Apaüh nung khaiunia nousotü ngiom, “Ngo, Nokpao Ahasurus yathsüotsünso athoiluttsün tsak hakü tsammong- nyiu Vashti dongai hongküla, naiuso apaüh nung chhiau tsüthalokü shanan! Samüh apa da ti chhiau ngiokhem nou ngioji?”

¹⁶Nungai Memukanüh Nokpao naiuso apa asonghoi khako nge-ikü ngiom, “Menyiu Vashtiüh nokpaolu tsüde lüko apa asonghoiso lüko lo- miamiu-atsüoting tünaito nokshing mongko noitsün khaiunia apem lochi-iu.

¹⁷Vashtiüh ti chhin nung lula naito menyiu pungkü nou meshen tsammongpo tü lonyapkü thapau yalou-e. Ngüsoüh ngio-e, ‘Nokpao Ahasurus tsammongnyiu Vashti tü apa dongai shiau jon, naiuso apaüh tsümongchiokü shanan.’

¹⁸Tilai Persiahai si Mediahai nokpao khemko asonghoi nouso tsammong- nyiuüh nokpao tsammongnyiu saisile thaiutha lula-e, ngüsoüh ngüso tsammongpo hau nung ajekhaiukolu chite-e, naiuso ngüsoüh tsammongpo nouso ta ngüso tsammongnyiuso mongmate.

¹⁹Asuhatkü noitsün Nokpao nung potha naito, nokpao nou Vashti tilaitso nungphiai nokpao khako tsüshi-iau epung tsak ahong. Nung ngio nou Persia si Mediahai ngiokhemai tilaitso tsüli-eshi-iau satkü taiu au ngiokhem lükiu küta nung Menyiu Nokpao noikham nou menyiu amei ajantso hau lükiuwan.

²⁰Tilai nung ngiokhem nou nokshing nou thapekkü ngelakü iula-e, menyiu pungkü nou momo tsammongpo memei lüko tsüdekünai tsosilu lüko wekü paotsangkü kankei-e.”

²¹Nokpao naiuso apa khemko asonghoi nousoüh nung mongyang mongchiokü noiküla, naiuso Memu- kanüh ayang kiutsün nung nokpao nou chhin.

²²Nokpao khiamkhan pungkü dongai momo khiamkhan thsamsat saisile naiuso ngio ai satküta ngiongem kantsünso hongkü ngiom, tsammongpo pungkü apa tsamkhaiu ko APAOU naiuso apa da athonting oukong sonkü noi-e ta ngiokü noiküla.