Read Khiamniungan Naga Esther 3 Bible Online

Esther 3 - Khiamniungan Naga bible

Esther 3

¹Atao intso noiküta Nokpao Aha- surusüh khaiunia tsak Haman ta niankü nokpao nokshing yamko ayathsüopao noikham nai noiau noi- thang lotsok kiukü noiküla. Haman nung Hammedatha thso Agag thsaosithso tsak noiküla.

²Nokpao nou apa khemko apa yathsüotsün asonghoi chikü tü singkaungam langthiokü kautsün tsangkü ngüsoüh Haman hau asuhat kiuau ngiokhem kium. Ngüso chiküüh angiotsünli chhin, lüko Mordekaiüh nung tsüchhiha.

³Nokpao khemko ayathsüotsün asonghoi apatü nokpao ngiokhem tiauta angio tsü-ang ta sangkü noiküla;

⁴ajekhaiu pungkü ngüsoüh apatü nung chhiau koja- keikü noiküla, lüko apaüh ngüsoüh ngiotsün tü tsü-ang. Apaüh ngüso hau chitekü ngiom, “Ngo Yihudahai tsak noin,” naiuso ngo Haman khako kauau tsüshio. “Nungtiphe ngüsoüh nung Haman hau chite, naiuso Mordekai saisile thaiutha Hamanüh jeilo-e süne tsüjeilo-e ta ngüso chitekü noiküla.

⁵Mordekaiüh apa hau kaukü asuhat tsükiu ta ngiotsün tilai Hamanüh lulan, apa thatü mongmat sung,

⁶naiuso tilai apaüh Mordekai nung Yihudahai ta ngela, apaüh Mordekai pemsa tsüdekü Persiahai nokshing mongko noitsün Yihudahai chikü loatkü wanau mongkhemkü noiküla.

⁷Nokpao Ahasurus nokshing pon chekü nime nouko, chongting Nisan alei nouko nai, Hamanüh ngüso ngioko “Purim” ta jontsün phongde tsangkü apaüh thattaiutsün chhisi- yakü khuau ti alei naiuso ajekhaiu nou awaoteng noi-e ta dekü noiküla. Nung Adar alei chekü nime nou da ajekhaiu chekü süme nouko nai apaüh thattaiutsün chhiau thatsan.

⁸Nungtiphe Hamanüh nokpao hau chitekü ngiom, “Anokshingko khaiu- nia mele tsak alumai pengpunkü naiuso ngüso khiamkhan pungkü nai epji. Ngüsoüh saisile amao sau khaiuniako tsüemkü hanji. Loüh tekkü, ngüsoüh nokpao nou ngiokhem lüko angio tsü-angji, nungtiphe ngüso athaiutha pothaküto tsüde.

⁹Nokpao, ni nung mongchio naito, ngüso chikü loatkü wanau ngiokhem tsak lükiu. Ni nung chhi naito, ngo anokshing meikü yathsüoau nokpao chaitaiu tsamai tangkason tsoi 340, 000 thioau shio-e ta amonglam ngio kiuji.”

¹⁰Nokpao nou apa khiaptso ngio- san, nung sübao atengting ngio- khemtsün taoko oukong ii thanglut au thetsün noiküla, nung khiapthso Yihudahaiko tsaotsün Agag thsao nou Hammedatha thso Haman hau kiuwan.

¹¹Nokpao nou apatü ngiom, “Khaiuniahoi naiuso ngüso chaisiou ni nou; ni mongchiotsünli ngüsotü lüchhi.”

¹²Nungtiphe chongting alei nou ta ajekhaiu chekü süme nouko nai Hamanüh nokpao ün asathoi jonküta ngiokhem nung ngiopungkü phokle- sanau naiuso asat saisile pungkü nai shanau akoja ngio thoilut küta nok- shinghoi chikü dongai, nokshingpaou chikü dongai naiuso asonghoi chikü dongai hongau thoilut. Nung ngio- khem nou Nokpao Ahasurus nianko shanküta nungtü apa khiapthso nou ii thanglutkü noiküla.

¹³Thsamsat kantsünsoüh nung ngiothi nokshing nai khiamkhan pungkü ai kankü khu. Nungko ayamhan nungti satkü noiküla: Adar alei ajekhaiu chekü süme nouko nyitsolu Yihudahai apem-ashe naiuso ehen, menyiuhoi si melohoi nouso loatau noiküla. Ngüso atsüojinyang tsülep shikü chaoat- küta ngüso jengtsaiu lowanau noiküla.

¹⁴Nung ngiothi nou khiam- khan pungkü nai nyung khako thiau noiküla, küta nung ajekhaiu tilai shisao-e ta khaiunia pungkü khemlokü noi.

¹⁵Nokpao athoilut tsangkü nai nung ngiokhem noknio ateng Susa nai nyung khako velut, naiuso ngiothi kantsünsoüh nung ngiongem khiamkhan chikü nai kankü khu. Nungai nokpao naiuso Haman ne theng shiukü moknoi, lüko Susa noknio aito khaiuniahoi ngalakü noiküla.