Read Khiamniungan Naga Esther 4 Bible Online

Esther 4 - Khiamniungan Naga bible

Esther 4

¹Tilai Mordekaiüh nung chhisiya nouso chikü ngela, apa among- mat nou apa neshe chipek. Küta apaüh nethe tenlokü khaiu nai lou nou tsomlut, küta apaüh nokpao tsamai naptsün bekhan tü thalutkü sang asong nou vekü thsüokü shapkü,

²noknio chatkü tsakeikü khu. Apa nokpao tsammongai tsünap tititenai nethe tentsün sautso nungai napau tsüshio.

³Nokpao nou ngiopong tilüsong khiamkhan ai khu nungso chikü nai Yihudahai mongko sang asong nou wekü mongsaiutsün tsak noiküla. Ngüsoüh keithon loukü shapkü mongsaiu, naiuso ngüso piakü nou nethe tenküta lou nou tsomlutkü noiküla.

⁴Tilai Esther yathsüotsün menyiuthsohoi naiuso athsülem khaiunia nousoüh Mordekaiüh ti chhiji nung chiten, nungai Esther thatü thsüokü yangelat. Apaüh Mordekai hau nethe liko neshe ajantso hong, lüko Mordekaiüh nungso tsülou.

⁵Nungai Estherüh nokpao tsangkü apa yathsüoau kiutaiutsün athsülem khaiunia tsak Hathak, ti angja noin nung tsangsheiau apa tü ngiokü Mordekai dongai hong.

⁶Hathak Mordekai dongai nokpao tsamai naptsün noknio ke nai khu.

⁷Mordekaiüh apatü thawaotsün naiuso Hamanüh Yihudahai chikü chaoat naito apaüh nokpao chaitaiu tsamai chai tititso thioau thaloukü noin nung alum apa hau chiten.

⁸Apaüh Yihudahai lomowanau Susa nai ngiokhem kiupengtsün thsam tsak Hathak hau kium. Mordekaiüh apatü nung kankü Esther dongai lükhu, apa hau aküo nou lüchite, küta apatü nokpao dongai khukü apa khaiuniaso hau atsüojinyang hanau kojakü apatü asangkiu ta ngiokü noiküla.

⁹Hathaküh nung angio- tsünli chhin;

¹⁰naiuso Estherüh apa hau nung ngiongem Mordekai dongai laokü kankü khuau kium:

¹¹“Nokpao nou tsüjonkü, melo tsüdekünai menyiu, ajantso nokpao dongai napkü phetenai, nung khaiunia nou eaulu noin. Nung ngiokhem noin; khiamkhan nai nokpao hau ayam hantsün ainou nyung saokü nou nung ngeji. Nung ngiokhem ainou thakhuau yam tsaklu noin; nokpao nou apa chaiou lakkeng pailai ajantso naptao loksan naito, nungaito nung khaiunia nou aa poisaniu. Lüko nokpao nou ngü tü tsüjonkü alei tsak ngoikü khuwaniu.”

¹²Tilai Mordekaiüh Esther ainou ngiongem epm,

¹³apaüh Esther dongai nung alotsüo hongshin: “Ni nokpao tsamai noipheta amao Yihu- dahaiko nai nito kipsankü noin ta layang.

¹⁴Ni nungtin taoko nyankü noian naito, Yihuda hai kipsanau aün ainou sao-e, naiuso ngüso kipsan-e, lüko nito ean-e, naiuso apothsoso dong thonan-e. Lüko sauüh ngen-nungtin taotsak thaiutha hau ni nokpao tsammongnyiu tsak noi-ikütso-e!”

¹⁵Estherüh Mordekai dongai nung ngiongem laokiu shin:

¹⁶“Susa nai noitsün Yihudahai chikü ajonkam; jü thaiutha keithon naiuso misao anoi. Samnyi naiuso samsoh titso lahe naiuso lashiu. Ngü yathsüotsün- menyiuthsohoi naiuso ngo lüko nung- tilu chhi-e. Nungphiai, ngiokhem tü khengshiküli noilüko ngo nokpao dongai khu-e. Nung chhisiya thaiu- thako ngo eanau naito, ngo ean-e.”

¹⁷Nungai Mordekai tsaloküta Es- therüh apatü chhisiya au thoiluttsün alum chhin.