Read Khiamniungan Naga Esther 7 Bible Online

Esther 7 - Khiamniungan Naga bible

Esther 7

¹Nungti nokpao si Haman ne Estherko aikü heshiu au

²atao müjam nou khukü noiküla. Thengshiukü noitsün taoko nokpao nou Esther tü sangshikü ngiom, “Tsammongnyiu Esther, ni ti mongchioji? Ngü hau achite naiuso ni nung eppe. Ngo jü nokshing apaitso lüko ni hau kiu-e.”

³Estherüh thalakü ngiom, “Nokpao nou ngü hau atsüojinyang han naito naiuso ngo kojatsün ni kiu-e ta mongchio naito, ngo aakih au naiuso jü khaiuniaso lüko aakih au ngo yangji.

⁴Jü khaiuniaso naiuso ngo aloatau janthiowankü noin, lüko nung sua au janthiowantünto nung thaiutha thatü thsüokü yangelatau tsünoiküla, ngo nung thaiuthako nihau atsonjek tsükiu-ela; lüko sam apem lomowanaulu noin!”

⁵Nungai Nokpao Ahasurusüh Esther tü sangkü ngiom, “Nungti nou chhisiya sauüh chhisome? Nung khaiunia nou tiai noin?”

⁶Estherüh thalakü ngiom, “Sam eh, sam angja-itsün, nung khaiunia nou Haman noin!” Hamanüh nokpao si Esther netü lekkatkü thapkü noiküla.

⁷Nokpao mongmat küta tsakü chukü tsampai nou wankü, ta apa tsam kengchi aimong ai khuwan. Nokpao nou nung thaiutha apahau angja kiuau noin ta Hamanüh ngela, nungtiphe apa nungko apa aa thaiutha Esther tü kojakü noi:

⁸Tilai nokpao nou aimong ainou laokü shikü tsampai nai nap, Haman Esther noikham dongko kaukü awan saokü noiküla. Nung epküta, nokpao nou vekü ngiom, “Jü tsammongkoteng, nung khaiunia nou jükhako jü tsam- mongnyiu tü ajisiwop chhi-e süne?” Nokpao nou nung ngiotsünko aikü athsülem khaiunia nousoüh Haman kha kepok.

⁹Nungai ngüso ongko Harbona ta niankü khaiunia tsaküh ngiom, “Hamanüh apa tsamai Mordekai sauüh Nokpao aa kipsan apa singatkü loat au pai nou kitaium, naiuso nung meter 22 tsokkü noiküla!” Nokpao nou thoilutkü ngiom, “Nungko Haman lüsingat!”

¹⁰Nungti Hamanüh Mordekai singatau shantaiutsünko apa pem singat. Nungphiai nokpao mongmat sungtsün laolokü noiküla.