Read Khiamniungan Naga Esther 9 Bible Online

Esther 9 - Khiamniungan Naga bible

Esther 9

¹Adar alei ajekhaiu chekü süme nou tisübao nokpao nou ngiokhem kiutaiutsün shisaom, Yihudahai ehsoüh ngüsoüh shiolo-e ta yangkü noiküla. Lüko phoklekü Yihudahaiühbao ngüso khako ashio ep.

²Nokshing mongko noknio pungkü nai Yihudahai kihtsün pungkü nai, Yihudahai ngüso chija ngüsotü loatau shitsünsotü poshiau kamsankü noiküla. Athang apemai khaiuniahoi nouso ngüsolun hatkü iula, naiuso loto, ngüso thako sautso tsütsasomshi.

³Khiamkhan nai asonghoi-nokshingpaou nouso, nok- shinghoi nouso naiuso nokpao liko tsatsünso chiküüh Yihudahaitü ha- chu tiautenai ngüso chikü Mordekai lun hatkü noiküla.

⁴Nokshing thapekkü nai loto Mordekai nokpao nou tsamai oukong khaiunia tsak ta ngekü iula naiuso apa loüh tekkü oukongkü iulashikü khuwan.

⁵Nungtiphe Yihudahaiüh ngüso ehoisotü ti chhiau mongchioji nungti chhiau shiokü noiküla. Ngüsoüh ngüso ehoiso sah nou chaoat.

⁶Noknio ateng Susa kolu lüko Yihudahaiüh khaiunia tsom pungo loat.

⁷Nungso mongko Hammedatha thso nou Haman thsoso Yihudahai ehoi nouso ngüso noiküla: Parshandatha, Delfon, Aspatha, Poratha, Adalia, Aridatha, Parmashta, Arisai, Aridai, naiuso Vaizatha, lüko ngüsoüh jengtsaiu to tsükamhe.

¹¹Nungnyilu Susa nai khaiuniahoi haove piakü loattsün nokpao hau chitekü noiküla.

¹²Nungai apaüh tsammongnyiu Esther tü ngiom, “Susa noknio nailu Yihudahaiüh khaiunia 500 loatiu, nungko Haman thso che nouso hakü noin. Nungaito ngüsoüh amao khiamkhan nouso nai titi chhikü noi-e! Ni lo ti aiushiji? Ni nung eppe. Loüh ni tilüsong aiushiji ngühau achite, naiuso ni nung eppe.”

¹³Estherüh thalakü ngiom, “Nung Nokpao nou mongchio naito, ni lonyi ngüso hau ti chhisiya-ikü noiküla nung Yihudahai hau lühom loühjam Susa nai achhi-ishi. Naiuso Haman thso che nouso pai kitaiutsün tü ngüso mea phankü wanau ngiokhem lükiu.”

¹⁴Nokpao nou Susa nai ve- pengkü nung chhisiya au ngiokhem kiuwan. Haman thso che nouso mea nung nyung khako hankü phan- taiukü noiküla.

¹⁵Adar alei ajekhaiu chekü pülenyi nouko nai Susa noknio nai noitsün Yihudahai kamloküta noknio nai loüh khaiunia tsom süme loatkü wan. Lüko, loüh ngüsoüh jengtsaiu to tsükamhe.

¹⁶Khiamkhan nouso ai noitsün Yihudahaiüh kamshiloküta ngüso chija kuklokü noiküla. Sauhaiüh ngüso chinyankü noiküla nung khaiunia nouso heng 75, 000 ngüsoüh loatkü wan. Lüko ngüsoüh jengtsaiu to tsükamhe.

¹⁷Nung Adar alei nou- ko ajekhaiu chekü sümenyi nouko noiküla. Nungthan ajekhaiu, chekü pülenyi nouko naito aloattsün tsünoishi, naiuso ngüsoüh sümai amongling ajekhaiu tsak shankü noiküla.

¹⁸Susa nai noitsün Yihu- dahaiüh, ajekhaiu chekü pungonyi nou chhisiya ainou aalo ajekhaiu noi, tiautenai ngüsoüh ngüso ehoi ajekhaiu chekü süme si chekü püle nouko nai chaoatküta chekü pungonyi nouko nung chhisiya laolo.

¹⁹Nungshioko Yihudahai sauhai noksong nouso nai kihji ngüsoüh Adar alei nouko chekü pülenyi nou sümai eheshiu si paopei tsaküh tsak hau kiu-ekü amongling ajekhaiu atao tsak noiji.

²⁰Mordekaiüh nung chhisiya thawaokü shitsün satküta Adar alei nouko ajekhaiu chekü püle si chekü pungonyi nousoko pon pungkü chhi- siya ainou aalokü

²¹noiau lükankei ta ngüso hau chitekü Persiahai nokshing apemai, ashimko si alaiu nai noitsün Yihudahai chikü dongai thsamsat nouso hongpeng.

²²Nung ajekhaiu nouko Yihudahai ngüso ehoi ainou ngüso chija pungetsün noiküla; nung alei nouko amongkia si amongsaiu noitsün atao tsak ainou amongling si akoitsün atao tsak ai li-eshikü thawaotsün noiküla. Ngüsotü nung ajekhaiu nouso sümai saohekü, chihwao wao-ekü naiuso angjahai hau eheshiu kiukü noiau ngiokü noiküla.

²³Nungtiphe Yihu- dahaiüh Mordekaiüh ayamhantsün- tü hoilut, naiuso nung sümai pon pungkü saohe au saisile tsak hau iulakü khuwan.

²⁴Hammedatha thso Haman-sau Agag thsaosithso naiuso Yihudahai eh noiküla-apaüh Yihudahai moi- semkü lomowanau thaiutha ajekhaiu thatluao “Purim” ta jontsün phongde tsak shan.

²⁵Lüko Esther nokpao dongai khunai, nokpao nou ngiokhem tsak satkü losan nung Hamanüh sübao Yihudahai loatau ayangtaiu noiküla, nung aküo nai Haman naiuso apa thsoso singatküta phankü wanan.

²⁶Nung shioko nung chhisiya nai alokü noitsün ajekhaiu nousotü Purim ta jonji. Nung tiautenai Mordekai thsamsat naiuso nung chikü ngüsotü thawaokü shitsün shioko,

²⁷Yihudahaiüh nung ngüso, ngüso thsaosithsoso, naiuso Yihuda- hai tsak ta thehaau aiutsünso thaiutha ngiokhem tsakli shan, nung atao tongtü nouko pon pungkü nung ajekhaiu nime nou Mordekaiüh ayamhantsün tsangkü asaita yang- sankü noiji.

²⁸Noknio naiuso khiamkhan pungkünai, tsammong pungkü nai, ashiau noitsün vetao pungkü nung Purim ajekhaiu nouso thaiutha yangsankü kankeiau khemlokü noiküla.

²⁹Nungai Nokpao tsammongnyiu Esther, sau Abihail thso menyiuthso noiküla, apaüh lüko Mordekaiko aikü Mordekaiüh aya nai sattsünli Purim thaiutha thsamsat tsak apa oukong nai satkü noiküla.

³⁰Nung thsamsat nou Yihudahai chikü thaiutha satküta nungso Persiahai nokshing nai khiamkhan 127 chikü dongai hongpeng. Nungüh Yihudahai apem alokü nokmei nai noiau yangkiukü sat-

³¹küta nung Purim ajekhaiu atao tongtü nouko ngüso thsaosithsosoüh yangsanau ayam- han, nung ngüsoüh amongsaiu si keithon atao thaiutha titi ngiokhem shankü noiküla nung khekkü kankeiau kium. Nung Mordekai si Esther neüh thoiluttsün noiküla.

³²Purim thaiutha ngiokhem lomong- shikü Estherüh thoiluttsün nung thsamlai tsak ko satthiokü taiu.