Read Khiamniungan Naga Aniasan 10 Bible Online

Aniasan 10 - Khiamniungan Naga bible

Aniasan 10

¹Nungai APAOU nou Mosa tü ngiom, “Ngo nung athanga nouso ngüso ongko chhiau thaiutha naiuso nung athanga ii nouso chhi taoko ngo Ijip hai titi mainga iula-in,

²nung athsoso, naiuso athsaosi- thsoso tü chiteau monau naiuso apa khemko noitsün asonghoi nouso mong kongkü iula-itsün koko nokpao tü lüthaplu. Asam apemüh Ngo APAOU noin ta nge-e.”

³Nungtiphe Mosa si Aron ne nokpao dongai khuküta ngiom, “APAOU, Ibri hai Goa nou ngioji, ‘Ni tilektso jüphamongko napao nannane? Jü khaiuniaso akhu-i, nungaito ngüsoüh Ngo amkhame.

⁴Ni tsülaotingkü nan naito, ngo lühom agoumchi ko jongku nouso kankü shi-e.

⁵Nungso thsüokü piakü noi-e, naiuso goh nou tsappokkü meankü noi-e. Nungsoüh Sansao nou tsülotheankü poitaiutsün paisam nouso lüko alum heane.

⁶Nungsoüh anokpao tsam naiuso akhemko noitsün asonghoi tsam naiuso akhaiuniaso apem tsam meane. Nungsoto apaosiposoüh epkü shitsün alum nungtü phopkü tsaokü noi-e.’” Küta Mosa nokpao khako nou laokü shi.

⁷Nokpao khemko noitsün asonghoi nou nokpao tü ngiom, “Nung khaiunia nou sam hau tilektso angja kiu-e? Ngüso Goa APAOU nou amkhamau lükhu-i. Ijip goumchi lotheaniu ta ni tsüngelaso?”

⁸Nungtiphe Mosa naiuso Aron ne nokpao dongai laokü niakü shin, küta apaüh ngüne tü ngiom, “Asam khuküta asam Goa, APAOU lüam- kham. Lüko tongtü sauhai khu-e?”

⁹Mosaüh thalakü ngiom, “Sam thsoso naiuso sam ashehoi hakü sam apem khu-e. Samüh sam thsoso melothso naiuso menyiuthso, sam onnemok hoi, naiuso won hoi, naiuso sam jang hoi lou-e, tiautenai sam APAOU lomsanau samüh sümai tsak shanaulu noin.”

¹⁰Nokpao nou ngiom, “Asam ko menyiuhoi naiuso methsohoi ngo tilaitso kankü tsükhu-i-e ta ngo APAOU tsangkü ngiomong shinge shanji! Asamüh akhengshiau chhiji ta nung tsangshei-iu.

¹¹Nyah! nung asamüh aiutsün naito pohailu khukü APAOU lüamkham.” Nungko aikü nokpao khako nou Mosa si Aron ne koman.

¹²Nungai APAOU nou Mosa tü ngiom, “Ijip goumchi ai jongku nou sung-iau apha aloksan. Nungsoüh San sao nai poitaiutsün alum asham- tsün alum shikü heane.”

¹³Nung- tiphe Mosaüh apa Pailai loksan, naiuso APAOU nou Ijip ainou ahsheih tsak anyi thanya naiuso asoh thangekü sheih au hong.

¹⁴Ahom nung jongku nouso ahoi yangkü shipkü shiküta goumchi tsappokkü noijei. Nung jongku nouso tilaitso tsüepdekün naiuso tsüepshiau nou noiküla.

¹⁵Nungso khengpun nou nyachingkü motsappok khemkün lektso shin, nungsoüh Sansao nou tsütha atkhemkü poitaiutsün pai eiu ao eiu saokü apem hean. Ijip goumchi nai pai tsaktü tso asha sangnyakü tsüpoikü heankhem.

¹⁶Nungai nokpao nou Mosa si Aron netü liukü jonkü ngiom, “Ngo asam APAOU Goa, naiuso asam thako angei sunlo-iu.

¹⁷Lo nung jü angei jamaolu wankiu küta asam APAOU Goa tü ngü ainou nung athsüoting angja nou akanlükhunankiu ta misao asao kiu.”

¹⁸Mosa nokpao wankü khuküta APAOU tü misao sao.

¹⁹Nungai APAOU nou ajepek ainou shitsün shingngan ahsheih nung ajenap ainou shitsün shingmi ahsheih athsüoting tsak hau phoklekiu, nungüh jongku nouso shiplokü Suez khiamjet nai kankü khuwan. Ijip nai jongku tsaktso tsüpoikü kankü khuwan.

²⁰Lüko APAOU nou nokpao mong kongkü iula-i, küta apaüh Israel thsoso tsükhu-i.

²¹Nungai APAOU nou Mosa tü ngiom, “Apha koi ai aloksan, küta anyakhem asong tsak nou Ijip goumchi lemlowan.”

²²Mosaüh apa pha koi ai loksan, küta nung Ijip goumchi thumkü ajekhaiu samnyi ah shilepkü nyakhemkü noiküla.

²³Ijip hai nung taoko tsaküh tsak epau tsüshiokü noiküla, naiuso khaiunia sautso nung taoko nai momo tsam wankü tsükhu. Lüko Israel thsoso kihtsün naito awon noiküla.

²⁴Nokpao nou Mosa jonkü ngiom, “Ni ko menyiuhoi naiuso thsoso hakü khuküta APAOU lüamkham. Lüko aonnemok hoi, awon hoi, naiuso jangtso hoi to tsükanlükhune.”

²⁵Mosaüh thalakü ngiom, “Naito ni sam hau sam Goa APAOU tü amkham kiuau naiuso ajahtsün amkham kiuau thainian nouso ouk kiuau noin.

²⁶Tsüde, samüh sam thainianso tsaktso tsüpoitaiukü samko kankü khu-e. Samüh sam chija thainian sübao nou APAOU Goa tü amkham kiu-e nung shingloau noin. Naiuso samüh nung athang mothasaokün lektso, sübao thainian nou sam Goa tü amkham kiu-e nung samüh tsünge-e.”

²⁷APAOU nou nokpao mong kongkü iula-i, naiuso apaüh ngüso tsükhu-i.

²⁸Apaüh Mosa tü ngiom, “Jü nioko ainou lükhuwan! Ngü hau ni loüh müjam laepishi! Ngo ni eptsün ajekhaiu ko ni eane!”

²⁹Mosaüh thalakü ngiom, “Ni thakü noin.” “Ni ngo loüh tilaitso tsüepshi-e.”