Read Khiamniungan Naga Aniasan 11 Bible Online

Aniasan 11 - Khiamniungan Naga bible

Aniasan 11

¹Nungai APAOU nou Mosa tü ngiom, “Ijip nokpao naiuso apa khaiuniaso dongai alohat tsaklu hongshi-e. Nung phiai apaüh asam khu-i-e. Atsüoting to, apaüh asam apem nungko nou komane.

²Lo Israel khaiuniaso tü lüchite, küta ngüso apemüh momo phaosiposo tü chaiou lakkeng, naiuso tangkason lüsaolo.”

³APAOU nou Israel thsoso khako Ijip hai hau asuhat kiu-iau shan. Atsüoting naito, asonghoi naiuso khaiunia apemüh Mosa thatü asong khaiunia tsak ta ngesan-e.

⁴Mosaüh nungai nokpao tü ngiom, “APAOU nou ngioji, ‘Awem taoko Ngo Ijip yankü khu-e,

⁵küta nokpao ün melothso, sau apa tengkam theau noin, nung ainou sua menyiuhoi, sauhaiüh tham thaokiuji, nungso ün melothso nioyamchong saokü Ijip nai tsamkhaiu pungkü eane. Thainian thso chongting chettsün lüko eane.

⁶Ijip nai tilaitso tsüthawaodekün naiuso loüh tsüthawao shiau nou ashaptsün asongting noi-e.

⁷Lüko Israel thsoso tü naiuso ngüso thainianso tü jii tsaküh lüko tsüthsade. Nungai asamüh Ijip hai naiuso Israel hai jetko Ngo, APAOU, nou ajette shan ta nge-e.’”

⁸Mosaüh nungti ngiokü philoji: “Ni nou asong- hoi nouso chikü jüdongai shiküta jükhako kauthio-e, naiuso ngüsoüh ngü tü jü khaiuniaso apem nialokü lükhuwan ta ngio-e, nungphiai ngo soian-e.” Nungai Mosa thatü thsüokü mongmat sungkü nokpao dongai nou khuwan.

⁹APAOU nou nungti ngiokü noiküla: “Ngo Ijip nai jü athanga ii nouso piakü chhi-iau nokpao nou ni ngiotsün tü angluao tsülaokü nanne.”

¹⁰Mosa naiuso Aron neüh nungso ii athanga nokpao khako chhin, lüko APAOU nou apa mong kongkü iula-i, küta apaüh Israel thsoso apa goumchi ainou khu-iau tsükiu.