Read Khiamniungan Naga Aniasan 12 Bible Online

Aniasan 12 - Khiamniungan Naga bible

Aniasan 12

¹APAOU, Mosa naiuso Aron ko Ijip goumchi nai chite.

²“Asam thaiutha nung alei nou, pon nouko chongting alei noi-e.

³Nung ayamhan nouso Israel hoikam apem hau lükiu: Nung alei ajekhaiu che nyi nouko khaiunia pungkü nou onnemokthso tsüdekünai wonthso tsak tsak meshen tsamkhaiu thaiutha singtaiuau noin.

⁴Tsamkhaiu ajantso nung thainian apem nyih nekü heau tsüshiokü mepem thsaothsaokü latha nai, apaüh meshen phaoting ko nung thainian nyih janekü lühe, khaiunia pungkü nou heau omtso nyihson haove heau noin.

⁵Asamüh onnemok tsüdekünai wonthso choloau shio-e, lüko nung aleng ii ti tsüsunkü pon tsak ashe nou theau noin.

⁶Küta alei nouko ajekhaiuwe chekü püle shim ahsham nai, Israel thsoso apem nou nung thainian loat-e.

⁷Khaiuniahoi nou she ajantso loküta nung thainian heau noitsün tsamkhaiu koukhan naiuso koukhaiu nai lüpeilut.

⁸Nungsoh nai nyih nou atsao tsao-e küta sang akhosak tsak ko naiuso phoplao tsüthiokün themtsai ko lepkü he-e.

⁹Nungko asang naiuso asha titso lahe, lüko akhaiu, ahok, naiuso athaisisai nouso in nai jekkü lühe.

¹⁰Asamüh nungthan ahom tü thalutkü hau titso lapoishi; ajantso poisan nai nungto in nai jahwanau noin.

¹¹Asamüh liuliukü heau noin, tiautenai asam süme tsaloau hokphop naiuso asam pha nai pailai naiuso shitho nou lütholo. Nung Ngo APAOU, asuhat kiuau nou Aasantsün Sümai noin.”

¹²“Nungsoh nai Ijip hai goa nouso apem, khaiunia naiuso thainian angja kiuau, naiuso melothso yamchong loatkü wanau Ngo Ijip goumchi yankü khu-e. Ngo APAOU noin.

¹³Kou nou tü she peilut taiutsün nou, nung asam kihtsün tsam ta ii tsak noi-e. Nungko ngo tilai she nou eppe, Ngo asam yankü khu-e, naiuso ngo Ijip hai angja kiunai asam tü angja tsükiu-e. Asamüh nung ajekhaiu Ngo APAOU, nou asam tü ti chhin nung yangsanshiau donthe sümaili lüsaohe.

¹⁴Nung ashiau noitsün atao apem ko lüsaohe.”

¹⁵APAOU nou ngiom, “Ajekhaiu chinyatnyi asamüh phoplao thiokü shantsün themtsai tsüheau noin, phoplao tsüthiokün themtsailu lühe. Chongting ajekhaiu nouko nai asamüh asam tsam ainou phoplao apem ko pungeau noin, tititenai khaiunia ajantsoüh nung ajekhaiu chinyatnyi nou phoplao thiotsün themtsai henai, apa loto jü khaiuniaso ongko tsak ta tsüwesanha-e.

¹⁶Chongting ajekhaiu nyi nai naiuso chinyatnyi nai, asam amkham kiuau kamshiau noin, nungso ajekhaiu nouko nai chhisiya titso tsüchhi-ela, lüko asamüh chih thengau shio-e.

¹⁷Nung sümai lükankei, tiautenai nung ajekhaiu nouko ngo asam meleso Ijip ainou niasan. Ashiau noitsün atao apemko asamüh nung ajekhaiu ko sümai saoheau noin.

¹⁸Aya alei ajekhaiuwe chekü pülenyi ahsham ainou yalounou ajekhaiu we eknimekü tsak shimtsün ahsham saokü, asamüh phoplao hakü shantsün themtsai tsüheau noin.

¹⁹Ajekhaiuwe chinyatnyi nouko asham tsamai phoplao tsüepsanau noin, tititenai khaiunia ajantso paopung tsüdekünai gohmao khaiunia lüko phoplao hakü shantsün themtsai henaito, apa loto jü khaiuniaso ongko mepem tsak ta tsüwesanha-e.”

²⁰

²¹Mosaüh Israel aheihoi apem jonkü ngiom, “Asam tsamkhaiu nou Aasan sümai saoheau thaiutha khaiunia pungkü nou onnemokthso tsak tsüdekünai wonthso tsak ta, cholokü loat au noin.

²²Hisop paikia ehen tsak loküta nung thainian she taiutsün chio nai chamthio küta nung kheamnio nou tü naiuso koukhaiu nou tü lüpeilut. Asam saulünou ahom saokü nouko tiaitso lakhu.

²³Tilai APAOU, nou Ijip hai loat au thaiutha Ijip yankü khu-e, Apaüh kheamnio naiuso koukhaiu nou tü she nou eppe, nungai Aloattsün Hongthon nou asam tsamai tsünape, naiuso asam tsüloat-e.

²⁴Asam si asam thsosoüh asaita hau nung ngiokhem angio angau noin.

²⁵Tilai APAOU nou asam hau kiuau thaloutaiutsün goumchi nai asam nape, asamüh nung don amkham shanau noin.

²⁶‘Nung don amkham ti athat?’ ta asam thsosoüh asam tü sangnai,

²⁷asamüh thalakü ngio-e, ‘nung APAOU hau asuhat kiuau Aasantsün chaithio, Apa Ijip nai Israel thsoso tsamkhaiu yantaiukü khu, kü Apaüh Ijip hai loatan, lüko sam poisankiu ta lüchite.’” Israel haiüh singkao langthiokü kauthio küta Apa amkham.

²⁸Küta ngüso khukü APAOU nou Mosa si Aron netü ti thoiluttaiu kü noiküla nung chhin.

²⁹Nokpao ün melothso, sauüh apa nokpao noikham tengkam loau noiküla, apa tü yalou nou sua hoi ongko aphiting saokü melothso hoi, thainian thso chongting puntsün apem, Ijip nai thso yamchong nouso apem, APAOU nou awem loatkü wan.

³⁰Nungsoh nai nokpao naiuso apa khemko noitsün asonghoi, naiuso Ijip hai amao nouso apem thsümonkü noiküla. Ijip goumchi thapekkü meashap asong nou mean, tiautenai nungai tsamkhaiu tsak ko lüko melothso tsü etsün tsünoiküla.

³¹Nungsoh nailu nokpao nou Mosa naiuso Aron netü jonau hongkü ngiom, “Ni, naiuso asam Israel thsoso lükhuwan! Jü goumchi leankü khuküta asamüh sangtsünli, APAOU lüamkham.

³²A onnemok hoi, a wonhoi, ajanghoi, loküta lükhuwan. Loüh ngü hau ouk tsak thaiutha misao asaokiu.”

³³Ijip haiüh Israel thsoso tü liukü ngüso goumchi wankü lükhuwan ta koja; ngüsoüh ngiom, “Asam tsükhu naito sam apem eane.”

³⁴Nungtiphe khaiunia nousoüh phoplao tsüthiokün themtsai naiuso alopek taiutsün themtsai tsanshikü ta ngüso sangdong khaiu ai pilo.

³⁵Mosaüh ngiotsünli, Israel thsosoüh chhin, küta Ijip hai tü chaiou lakkeng naiuso tangkason daosilak si neshe-e nouso saolo.

³⁶APAOU nou nung Israel thsoso tü Ijip haiüh asuhat kiuao ayam shan, naiuso ngüsoüh saotsün ngüso hau kium. Nungli Israel thsosoüh Ijip hai chaiou memei jengtsaiu nouso kankü khuwan.

³⁷Israel thsoso methso menyiuhoi tsüwehakü pohailu nai haove 600, 000 thatso Rames ainou Sukot saokü hokjeko tsakeikü khu.

³⁸Naiuso ngüso ko aikü alaowehoi asong, onnemok hoi, won hoi, naiuso tsam thainian piakü hakü noiküla.

³⁹Ngüsoüh wonne nouko phoplao tsüthiokün tsanlo küta Ijip ainou kankü shin, tititenai ngüso Ijip ainou alekta komshian, nungtiphe ngüsoüh phoplao thiokü themtsai ngüso eheshiu thaiutha khemloau atao tsünoiküla.

⁴⁰Israel thsoso Ijip nai pon 430 kih.

⁴¹Pon 430 ngoitsün ajekhaiu nouko, APAOU ün khaiunia mele apem Ijip leankü tsaloukü khu.

⁴²Ngüso Ijip goumchi ainou niasanao thaiutha APAOU nou jiokü noitsün asoh tsak nou nung noiküla, naiuso Israel thsoso apemüh vetao si vetao APAOU thaiutha jiokü noitsün asoh tsak nou nung noin.

⁴³APAOU nou Mosa si Aron netü ngiom, “Aasantsün Sümai thaiutha Ngiokhem nouso nungso noi-e: Aasan Sümai nung gohmao khaiunia sauüh tsühe-e,

⁴⁴lüko sua ajantso asamüh tuhküta tippan kiukü noinaito apaüh heha au shio-e.

⁴⁵Asaita kih au tsüdekün tsamkhaiu naiuso chaichenhoi nou nung he au tsüshio-e.

⁴⁶Nung eheshiu nouso tsam tisübao ko khemsane, nungkolu heau noin, nung kengchiai kankü tsükhu-e. Naiuso thainian uo tsaktso lalongek.

⁴⁷Israel thsoso hoikam apem nou nung sümai saoheau noin,

⁴⁸lüko tsütippantsün khaiunia nou nung tsühe ha-e. Gohmao khaiunia tsak asam ongko kiha küta APAOU lomsankü nung sümai saoheau aiu nai, asamüh ayating nai apa tsam- khaiu ko melo hoi apem tippanau noin. Nungphiaito apa Israel thsoso li kankei-e naiuso wesanha-e, küta sümai nai ha au shio-e.

⁴⁹Nung ngiokhem noulu Israel thsoso naiuso gohmao khaiunia sauhai asam ongko kihakü noin wekülu kankei-e.”

⁵⁰Israel thsoso chikü nou Mosa si Aron netü APAOU nou ti thoilut nung apem angio angkü kankei.

⁵¹Nung ajekhaiu nouko APAOU nou Israel thsoso mele apem Ijip ainou niasan.