Read Khiamniungan Naga Aniasan 15 Bible Online

Aniasan 15 - Khiamniungan Naga bible

Aniasan 15

¹Nungai Israel thsoso naiuso Mosaüh APAOU tü nung jih hanglut: “Ngo APAOU tü jih hange, tiautenai Apaüh ajinkakü ashio epiu; Mokthso naiuso nung chiai moknoitsünso apaüh khiamnok nai khepthiowaniu.

²APAOU jü akipsantsün asong noin; naiuso apa jü akipsantsün iula-iu. Apa jü Goa noin, naiuso ngo apa lomsane, apa jüposo Goa, naiuso ngo apa songtsün thaiutha hanglut-e.

³APAOU lengsiya tsak noin; apa nian APAOU noin.

⁴Apaüh Ijip hai akonghoi naiuso ehli tsamkei nouso khiamnok nai khepthiowan, ameiting asonghoi nouso, Aseng khiamnok nai napaniu.

⁵Aouting khiamnok nou ngüso khojei-an, lung tsak limantsünli aouting nai ngüso limkü napaniu.

⁶APAOU, apha uai nou oukong nai ahat au noin; nungüh eh nouso nelangkü lopekkiu.

⁷Ni asongting ashiolotsün nou ni a ehso mühongshikü kaplepiu; ni ün amongmat nou ngüso tsokapli chethe-anji.

⁸Ni khiamnok chiai ii matlut küta khiam nou apat yangkü thongesan; nung khiam nouso dio ai tsak khekkü tsakü noian; khiamnok akheiting saokü sunlüshian.

⁹Ehoi nou ngiom, ‘Ngo ngüso tü kome küta ngüso thalou-e, Ngo ngüso jengtsaiu janthat küta ngo aiutsün apem lou-e; ngo jüsalaiu tensane küta jü pha nou ngüso chikü lomo-e.’

¹⁰Lüko APAOU, ni ainou isa tsaklu nou Ijip hai khiamnok nai limmattan; ngüso khiam asong nai akhiamantsün sonli akheiai khiamthiowan.

¹¹APAOU, goa ongko ni khekkü sau noin? Asio nai athanga, ni khekkü sau noin? Athanga ii nouso naiuso akongting ni chhitsün khekkü sauüh chhi-e?

¹²Ni apha uai nou loksan, nai goh nou ngüso miolikü wan.

¹³Ni thaloutaiutsünli, ni juosantsün khaiuniahoi nialokü khu; a oukong tsangkü ni ngüso ni ün asio goumchi nai niathio.

¹⁴Mele nousoüh nung lula nai, ngüso ahat nou ngaongao; Filistia hai alekkat nou mean.

¹⁵Edom nai noitsün aheihoi lekkat; Moab ün akong khaiuniahoi ngaongao; Kanan nai noitsünso mongsong mowan.

¹⁶Alekkat naiuso ahat nou ngüso tü shisao. Oh APAOU, sua ainou ni jashitsün khaiuniahoi, akhaiuniaso keikü moyanlükhunkün lektso- ngüso aoukong epkü ahat nouko atsüojinau lümeikü tsakü noin.

¹⁷APAOU, atsamau ni chosantsün athang, ni apimüh shantsün amkham tsam, ni ngüso niathio küta ngüso ni ün king nai thomkü taiu.

¹⁸Ni, APAOU, athon tsüyangkü nokpao noi-e.”

¹⁹Israel thsoso khiamnok yankü goh awai nai tsakei. Lüko tilai Ijip hai ehli tsamkei nouso ngüso mokthso hakü khiamnok nai shin, APAOU, nou khiam laokü shi-iküta ngüso kholouwan.

²⁰Aron nuo, E-nyiu Miriam apattsün dan lokü, nung dan tü patkü jih hang, naiuso menyiuhoi apem apa phi hoilut.

²¹Miriamüh ngüso tü nungti hanglut: “APAOU, tü jih lühang, tiautenai apaüh ajinka khako ashioloutsün ehli tsak shiolo-iu; apaüh mokthso naiuso nung chiai moknoitsünso khiamnok nai loklokü yakthiowaniu.”

²²Nungai Mosaüh Israel hai Aseng Khiamnok ainou Shur liutsa nai nialokü khu. Ajekhaiu samnyi ngüso liutsa yankü tsakei lüko khiam tsüep.

²³Nungai ngüso Mara tü jontsün athang tsak ai shi, lüko nungko ngüsoüh khiam ashiuao tsüshiokü khosakkü ep. Nungshioko nung tü Mara ta jonkü noiküla.

²⁴Khaiuniahoi nou Mosa tü namnam naiuso sangkü ngiom, “Samüh ti shiu-e?”

²⁵Mosaüh APAOU tü misao kongkü saonai APAOU nou apa hau paiyan tsak han, küta apaüh nung khiam nai chinthio, nungai khiam nou ashiuao meikü iula. Nungai APAOU, nou ngüso thaiutha nokshing ngiokhem tsak shankü kiu küta nungko Apaüh ngüso tü lilu.

²⁶Apaüh ngiom, “Ngo atha ta yangtsün naiuso jü ngiokhem nouso kankeitsün tsangkü asamüh ngü tü thumkü angio ange tünaito, Ijip hai khako ngo ti akiasiya kankü shikü noiküla nungüh asam hau ngo ti angja tsükiu-e. Ni lomeikiutsün APAOU ngo noin.”

²⁷Nungthanko ngüso haiungan chekü nime naiuso chengpai aochinyat noitsün athang Elim nai shin, nungai ngüso nung haiusai nai shaman.