Read Khiamniungan Naga Aniasan 16 Bible Online

Aniasan 16 - Khiamniungan Naga bible

Aniasan 16

¹Israel thsoso hoikam thum Elim ainou tsalo, ngüso Ijip leankü khutsün alei nime ajekhaiu ve chekü pungonyi nouko Elim si Sinai jetko noitsün Sin liutsa nai shin.

²Nung liutsa nai ngüso apem nou Mosa si Aron netü namnamkü ngiom,

³“APAOU nou sam Ijip goumchi ai loattan naibao chen. Ijip aito samüh moknoikü nyih naiuso amao heshiu piakü samüh aiutsünli heau noiküla. Lüko ajeüh sam nung liutsa nai apem naiuat küta ean-iau niasaniu.”

⁴APAOU, nou Mosa tü ngiom, “Lo ngo asam apem thaiutha eheshiu shankü maou ainou sao-i-e, khaiuniahoi nou nung ajekhaiu pungkü ajekhaiu tsak thaiutha omtso kamloau noin. Nungti ngüsoüh jü ayamhan nouso tü hoilute tünaito, ngo ngüso eheshiu epau thelu-e.

⁵Nungthan ajekhaiu nouko lüko ngüsoüh nung ajekhaiu thaiutha nung khako lilu momo tü omtso kankü shikü paotsangheau noin.”

⁶Nungti Mosa si Aron neüh Israel thsoso apem tü ngiom, “Lüsoh asamüh Ijip ainou asam niasantsün nung APAOU, nou noiküla ta nge-e.

⁷Ahom taoko asamüh APAOU hatsün ahsalap awon nou eppe. Apaüh asam apa thako namnamtsün lula-iu, ah, apa thako namnamtsün lula-iu, tiautenai asamüh apa ayamhan nousolu kankü khuji.”

⁸Nungai Mosaüh ngiom, “Asam au asham taoko nyih heau kiuau naiuso ahom taoko chih heau themtsai kiuau nung APAOU, nou noin, tiautenai asamüh apa tü titsojam namnam apaüh lula-iu. Tilai asam, sam thako namnamji, asamüh atsüoting nung APAOU thako namnamji.”

⁹Mosaüh Aron tü ngiom, “Hoi nou athum APAOU khako shikü atsa ta lüngio, tiautenai apaüh ngüso nam- namtsün lula-iu.”

¹⁰Aronüh hoithum nou tü chite nai, ngüso kha liutsa dongai phokle, naiuso alekta APAOU ainou ahsalap awon thengmia ongko sungh.

¹¹APAOU nou Mosa tü ngiom,

¹²“Ngo Israel thsoso namnamtsün lula-iu. Ah shiochan taoko ngüsoüh eheau nyih eppe ta ngüso tü lüngio, naiuso ahom ngüsoüh aiutsün them- tsai apem eppe. Nungai ngüsoüh Ngo, APAOU, nou ngüso Goa noin ta nge-e.”

¹³Asham taoko ngüso sham noitsün athang thapokkü daokom waio hoi asong tsak jeikü shin, naiuso ahom taoko ngüso tsam lemkü khiamle nou sao.

¹⁴Tilai khiam nou da iiloi khuwankhem, nungai mülampek khekkü matchaikü liutsa khaiu nai noiküla. Nung thsong nou sunshikü noitsünli thatü paotsangkü hau noiküla.

¹⁵Tilai Israel thsosoüh nung ep, ngüsoüh nung ti in ta tsüngekü, “Nung ti in noin?” ta tsaküh tsak tü sangekü noiküla. Mosaüh ngüso tü ngiom, “Nung APAOU, nou asam hau eheau kiutsün heshiu nou noin.

¹⁶Khaiunia pungkü momo tü omtso nung lükamlo, tsamkhaiu tsak ko mepem pungkü tsoi nime lükamlo ta APAOU nou ngiokhem kiukü noiküla.”

¹⁷Israel thsosoüh ajantsoüh pia naiuso ajantsoüh thsao ta kamlo.

¹⁸Tilai ngüsoüh nung tü thatlu, piakü kamlo nousoüh thatü piakü tsüde, naiuso sauhaiüh thsaothsaokü kamlo, nungsoüh lüko thatü thsaokü tsüde. Mepem pungkü nou apaüh potsünlu kamlo.

¹⁹Mosaüh ngüso tü ngiom, “Sauüh nung lühom thaiutha titso poikü lataiu.”

²⁰Lüko ajantsoüh Mosa tü angio tsüangkü haoson ajantso poikü taiu. Nungthan nyap nai nung sung nou meankü acheinyamkü noiküla, nungai Mosa ngüso tü mongmat.

²¹Ahom tsütokü khaiunia pungkü nou momo omtso kamlo; naiuso tilai aje jeji, goh nai poitaiutsün nyomkü khuwan.

²²Luoknyi nouko nai ngüsoüh eheshiu müjam au khaiunia pungkü thaiutha tsoi pülele kamlo. Hoihoi ongko aheihoi chikü Mosa dongai shikü nung thaiutha chite.

²³Naiuso apaüh ngüso tü ngiom, “APAOU, nou lühom ajekhaiu apa hau shingsankü wantsün asio aalo ajekhaiu ta ngiokhem kiu. Asamüh ti tsanau aiuji nung lonyi lu lütsan naiuso ti thengau aiuji nung lonyi lu lüthengan. Tilüsong poiankü noin nung mo da lühom thaiutha hau lüwan.”

²⁴Mosaüh ngiokhem kiutsünli, ngüsoüh apoi nou lühom thaiutha hau wanan, nung to tsüchoi naiuso sung lüko tsünyimkü noiküla.

²⁵Mosaüh ngiom, “Lonyi nung lühe, tiautenai lonyi Yihuda Anonyi, APAOU hau mothikü chosankü wantsün aalo ajekhaiu, naiuso asamüh nung asham noi nou chiai to eheshiu titso tsüeppe.

²⁶Asamüh louknyi thaiutha eheshiu lükamlo, lüko chinyatnyi aalo ajekhaiu nouko titso tsünoi-e.”

²⁷Ajekhaiu chinyatnyi nouko khaiunia ajantso eheshiu kamloau khu, lüko ngüsoüh titso tsüeplo.

²⁸Nungai APAOU nou Mosa tü ngiom, “Asam khaiuniahoi nou tilektso jü ngiokhem nouso angau nanne?

²⁹Ngo, APAOU, nou asam hau aalo ajekhaiu tsak kium ta lüyangsan, nungshioko luoknyi nouko ngo asai asam hau ajekhaiu nenyi thaiutha eheshiu saiukü kiu-e. Chinyatnyi nouko khaiunia pungkü apa tiai noin apa tsam wanankü tsükhukü lünoi.”

³⁰Nungtiphe khaiuniahoi nou chinyatnyi nouko titso chhi tsüchhi.

³¹Israel khaiuniahoi nou nung chih eheshiu nou tü manna ta jon. Nung lelo athaiu leng, naiuso ehenthso tsak khekkü noiküla, naiuso ataplu nai liukhiam nou shantsün themtsai khekkü noiküla.

³²Mosaüh ngiom, “Tilai Apaüh sam Ijip ainou niasan, liutsa nai Apaüh sam hau eheshiu kiukü noitsün chih sam thsaosi- thsoüh lüko nung epha au thaiutha samüh manna ajantso apoitaiu ta APAOU nou ngiokhem kiu.”

³³Mosaüh Aron tü ngiom, “Khiam meng tsak loküta, nungko manna nou tsoi nime lütaiu, nung APAOU khako sam thsaosithsoso thaiutha alat noi-e.”

³⁴APAOU nou Mosa tü ngiokhem kiutsünli, Aronüh nung athalu-etsün Paidan khako letaiu.

³⁵Israel thsosoüh ngüso kihtsün Kanan goumchi moyasaokün lektso pon haove aopüle chikü manna hekü noiküla.

³⁶Pe taoko tsoithat tsak nou lo taoko nai tsoi eknime ko wekü noin.