Read Khiamniungan Naga Aniasan 17 Bible Online

Aniasan 17 - Khiamniungan Naga bible

Aniasan 17

¹Israel thsoso hoikam apem Sin liutsa ainou tsaloukü APAOU nou ngiokhem kiutsünli athang tsak ainou tsak ta noian noian kü khu. Ngüso Refedim nai shaman, lüko nungko ashiuau khiam tsünoiküla.

²Ngüsoüh Mosa tü namnamkü ngiom, “Sam hau ashiuau khiam akiu.” Mosaüh thalakü ngiom, “Asam tiauta namnamji? Tiauta APAOU liluji?”

³Lüko khaiuniahoi nou thatü le phe Mosa tü tsülaokü namnam. Ngüsoüh ngiom, “Ale nou sam si sam thsoso naiuso sam tsam thainianso ean-iau Ijip goumchi ainou sam tiauta niakü shiji?”

⁴Mosaüh APAOU nou tü kojakü misaokü ngiom, “Nung khaiunia nouso tü ngo ti chhi-e? Ngüso ngü tü lung nou yakkau khemlokü noin.”

⁵APAOU nou Mosa tü ngiom, “Ni ko Israelhai ahei nouso ajantso nialokü hoi nouso kha ai lükhu.

⁶Ngo Sinai King ai lung tsak chiai akhako tsa-e, nungko ni lung nou tü lüshiuh, nungai nung lung ainou khiam khaiuniahoi nou shiuau chetsane.” Mosaüh nung Israel aheihoi khako chhikü noiküla.

⁷Nung athang tü Masa naiuso Meriba ta jon, tiautenai Israel thsosoüh, “APAOU samko ha süne tsüha?” ta namnamkü Apa lilukü ngiom.

⁸Nung taoko Amalek hai shikü Israel haiko Refedim nai ehli kü noiküla.

⁹Mosaüh Yihusua tü ngiom, “Lühom khukü Amalek haiko ehli au khaiunia ajantso achosan. Ngü tü Goa nou lükan ta ngiotsün Pailai semkü ngo kingkhaiu nai tsa-e.”

¹⁰Nungai Mosa si Aron naiuso Hur so kingkhaiu nai sungkü noinai Yihusuaüh apa tü Mosaüh thoiluttsünli khukü Amalek haiko ehli.

¹¹Mosa pha loksankü taiutsün lektso Israel thsosoüh shiolo, lüko apa pha nyapkü saowan nai Amalek haiüh shioloau tsalo.

¹²Tilai Mosa pha tankü iula, Aron naiuso Hur neüh Mosa thaiutha lung tsak kankü shikü nung chiai noi-i, nungti ngüso apa dongko tsakü aje monapkün lektso apa pha yamlukü loksankü taiu.

¹³Nungli Yihusuaüh Amalek hai shilepkü shiolowan.

¹⁴Nungai APAOU nou Mosa tü ngiom, “Nung ashiolotsün yangshiau thaiutha ngiolat thsam tsak ko satkü lütaiu, Ngo Amalek hai moisemkü lomowane ta Yihusua hau lüchite.”

¹⁵Mosaüh amthang tsak shan, küta nungtü “APAOU jü Nisan” ta jon.

¹⁶Apaüh ngiom, “APAOU Nisan tsokkü aloksan! APAOU nou Amalek hai ko vetao si vetao tsülaokü ehli li-e!”