Read Khiamniungan Naga Aniasan 18 Bible Online

Aniasan 18 - Khiamniungan Naga bible

Aniasan 18

¹Goa nou Mosa naiuso Apa khaiunia Israel titi Ijip ainou niasan, nung apem thaiutha Mosa kaio Midian hai nou meson Jethroüh lula.

²Nungai Mosa tsammongnyiu Zipora sau phiai wankü shikü noiküla, Jethroüh apa ko nialokü shin,

³naiuso Mosa thso nime nou Gershom si Eliezer ne lüko hakü niakü shin. Mosaüh ngiom, “Ngo mesan goumchi nai süme li kihkü shi-iu,” nung alat apaüh melothso tsak nian nung Gershom ta niankiu.

⁴Apaüh loüh ngiom, “Jüposo Goa nou ngü Ijip nokpaoüh loatkü wanau noitsün ainou hachukü kipsan.” Nung alat lokü apaüh apa thso nime nou Eliezer ta niankiu.

⁵Asio King nai Mosa shamkü noikü nai Jethro, Mosa tsammongnyiu, naiuso apa thso nime nou ne hakü liutsa nai shin.

⁶Apaüh Mosa dongai ngüso shiji ta ngiongem hong,

⁷nungai Mosa apako pheteau shikü apa khako kauthio, küta apa tü chep. Ngüsoüh tsaküh tsak ameilei thaiutha sangekütün phiai Mosa nejenkhio ai nap.

⁸Mosaüh Jethro hau Israel thsoso juosanau Ijip haiüh naiuso Ijip nokpao tü APAOU nou ti chhin nungso alum chiten; nungko hakü khaiuniahoi nou yamai angja omhe eptsün ko APAOU nou ngüso titi kipsan nung lüko chiten.

⁹Tilai Jethroüh nung apem lula, apa monglingkü ngiom,

¹⁰“APAOU lülom, Apaüh ni nokpao ainou naiuso Ijip hai ainou kipsaniu! APAOU lülom, Apaüh meshen khaiunia sua ainou kipsan!

¹¹Lo ngo ngeji, APAOU, to goa chikü khako asongting noin, tiautenai Apaüh nung Ijip haiüh Israel thsoso atheau tsünoikün aküo nai wanantsün taoko chhin.”

¹²Nu- ngai Jethroüh Goa hau ajahtsün chaithio tsak kiuau kankü shin; nungai Aron naiuso Israel aheihoi apem apa khako nung asio thaisam amkham tsak kiutsünli heshiuao khu.

¹³Nungthan ajekhaiu nai Mosaüh khaiuniahoi ongko apulai sungtsün lothakiu kü noiküla, naiuso apa ahom tü yanou anya tü thaokü tsükengtingkü noiküla.

¹⁴Tilai Jethroüh Mosaüh chhiau chhisiya alum ep, apaüh sangkü ngiom, “Nung apem ni khaiuniahoi thaiutha chhitsün ti in? Nung khaiunia sauhai nungko ahom ainou anya tü thaokü ni ko chiteau tsakü noin, ni nung apemsaühlu to tiauta chhiji?”

¹⁵Mosaüh thalakü ngiom, “Ngo nung chhiau noin, tiautenai khaiuniahoi nou ngüko Goa mongchio nou ngeloau shiji.

¹⁶Tilai khaiunia nime jetko tsüjeiai ekü sungji, ngüso jüdongai shiji, naiuso ngo ngüso ongko sau ayamtha nai noin nung lathat kiuji, küta ngo ngüso hau Goa ün athoilut naiuso ngiokhem nouso chiteji.”

¹⁷Nungai Jethroüh ngiom, “Ni nung ayam thakü nai tsüchhiji.

¹⁸Ni naiuso niko noitsün hoi nouso lüko uokiakü iula-e. Tiautenai athaiutha chhisiya phopkü lethsangkü noin, ni apemsaühlu chhiau tsüshio.

¹⁹Lo, ngo, ni tü ayamhan ajantso meikü kiuko, naiuso Goa nou ni ko noi-e. Goa khako, khaiunia hoikam nianko chosankü taiuao athaiutha ayam thakü noin, küta ngüso tsüngela-ekü sungtsün mi lu adongai kankü shi-e.

²⁰Ni ngüso tü Goa ün athoiluttsün tsandeau noin naiuso ngüso titi kih-e naiuso ti chhi-e nung ngüso tü tsangsheikü tsandeau noin.

²¹Lüko loüh nungko hakü, ni ashiotsün khaiunia ajantso chosan küta hoi khako ngüso ahei au lüthoilut: heng khako ahei, tsom khako ahei, aopungo khako ahei, naiuso che khako ahei theau thoilut au noin. Ngüso to Goa lün hattsün naiuso nekhem paopei nou tuh loau tsüshiotsün naiuso amonglamau maikü nouso theau noin.

²²Ngüso hau khaiuniahoi thaiutha asaita athaisantsünsoli lüyathsüo-i. Ngüsoüh mi achek nouso apem adongai kankü shi-e, lüko mi ehen nouso to ngüso mongko khemane. Nungüh athaiutha tekkü siudekü shankiu-e, ngüsoüh athsale kanlokiu hatsünli noi-e.

²³Ni nung Goa nou thoiluttsünli chhi naito, ni achija tsüdanate, naiuso nung khaiuniahoi nou ngüso mi lothakü tsamai khuau shio-e.”

²⁴Mosaüh Jethro ayamhantsün loküta,

²⁵Israel thsoso chikü ongainou ashio au khaiuniahoi cholo. Apaüh ngüso tü heng khako, tsom khako, aopungo khako, naiuso che khako ahei au thoilutkü taiukiu.

²⁶Ngüsoüh khaiuniahoi kothako asaita hau athaisanau yathsüo, mi achek nouso Mosa dongai kankü shin, lüko mi ehen nouso to ngüsoüh lothakiu.

²⁷Nungai Mosaüh Jethro meikü yanthio, küta Jethro apa tsamai laokü ya.