Read Khiamniungan Naga Aniasan 19 Bible Online

Aniasan 19 - Khiamniungan Naga bible

Aniasan 19

¹Israel thsoso Refedim wankü khuküta, ngüso Ijip ainou sungkü phiai alei haove süme nouko ayating nyap nai Sinai liutsa ai shin. Nung Sinai Kinghok ko ngüso shaman,

³naiuso Mosa king nai Goa ko pheteau sungh. APAOU nou king ainou apa jonküta, Yakob thsaosithsoso Israel hai au chiteau apa tü ngiom,

⁴“Ngo, APAOU, nou Ijip hai tü ti chhin, naiuso titi ngo asam letche tsaküh apa thso meshen ekokso khemai kankü khuji nungti asam nungai jüdongai kankü shin nung ni epiu.

⁵Lo, asamüh ngü tü angio angkü the-e tünaito, naiuso jü athalu-e kankei-e tünaito, asam jü khaiuniating the-e. Goumchi athum ngü nou noin, lüko asam jü achosan khaiuniaso noi-e,

⁶naiuso jüthaiutha asamüh mesonli yathsüo-e, naiuso asio mele tsak noi-e.”

⁷Nungai Mosa king ainou saokü khaiunia nouso aheihoi apem jonkam küta APAOU nou apa tü thoiluttsün alum ngüso hau chiten.

⁸Nungai khaiunia chikü nou aikü thalakü ngiom, “APAOU, nou ngiotsün alum samüh chhi-e,” küta nung ngio Mosaüh APAOU dongai kankü khu.

⁹APAOU nou Mosa tü ngiom, “Ngo adongai thengmia ateitham tsak mongko noikü shi-e, nungtiphe khaiuniahoi nou ngo niko chitetsün lukü lonai yakü ni tü monglame.” Mosaüh APAOU hau khaiuniahoi nou thalatsün chiten,

¹⁰naiuso APAOU nou apa tü ngiom, “Khaiuniahoi dongai khuküta ngüso tü lonyi naiuso lühom amkham thaiutha ngüso chija losiolo kü anoi ta lüngio. Ngüsoüh momo neshe phetan,

¹¹küta tsangnyi ajekhaiu thaiutha khemlokü anoi. Nung ajekhaiu ko Ngo Sinai King nai sao-e, nungai khaiunia apem nou Ngü eppe.

¹²Khaiuniahoi nou tsüyankü hau king nou lemkü elung nou lüshan, küta king nai tsüsungau naiuso nung shimkü tsüshiau ngüso tü lüngio. Ajantsoüh nungko hok ngamthio nai, apa to loat au noin;

¹³apa tü sauüh tsüthan tankü lung nou topatela, tsüdekünai uokop chon nou kopatela, nungko khaiunia naiuso thainian nemthso thaiutha monglokü noi-e; ngüso to eaolu noin. Lüko tilai poipoi mate, nungai khaiuniahoi nou king nai sungao noi-e.”

¹⁴Nungai Mosa king ainou saokü khaiuniahoi tü amkham thaiutha khemloau chite. Nungtiphe ngüsoüh ngüso neshe phetan,

¹⁵naiuso Mosaüh ngüso tü ngiom, “Tsangnyi ajekhaiu thaiutha lükhemtaiu, naiuso nung taoko posinyiu jetko emkü lakam.”

¹⁶Ajekhaiu samnyi nouko ahom ah nou mok naiuso ahsalap lap, theng- mia teithamkü tsak shin, naiuso sangh asong nou poipoi mattsün ngem tsak lula. Nejenkhio nai sham- noitsün khaiunia chikü ngaongao.

¹⁷Mosaüh ngüso shamnoitsün nejen- khio ainou Goa ko pheteau ngüso kingchiai nialokü shiküta, ngüso kinghok nai tsakü noi.

¹⁸Sinai King thumkü inkhao nou meanan, tiautenai APAOU nou In nai nung king chiai saokü noiküla. Tso jektsün taoko inkhao langtsakü sungtsün khekkü sungh, nung taoko khaiunia chikü thatü thsüokü ngaongaokü noiküla.

¹⁹Poipoi mattsün ngem tekkü thsüokü iula. Mosaüh chite, naiuso Goa nou apa tü ahmok nai thashin.

²⁰APAOU nou Mosa Sinai Kingchong ting nai jonsan. Mosa sungh nai,

²¹APAOU nou Mosa tü ngiom, “Saoküta khaiuniahoi nou tü Ngü tü thapluao elung nou yankü lashi ta lüngio, ngüsoüh nung yan naito, ngüso piakü eane.

²²Mesonhoi sauhai ngü shimkü shiji, ngüso lüko losio loau noin, tsüdekünaito ngo ngüso hau lüko angja kiu-e.”

²³Mosaüh APAOU nou tü ngiom, “Khaiuniahoi nou asungh au tsüshio, tiautenai ni sam tü nung king asio naiuso nung lemkü elung nou ii tsak taiuao thoilutkü taiukiu.”

²⁴APAOU nou thalakü ngiom, “Lüsao küta niko Aron nialokü asungh, lüko mesonhoi si khaiuniahoi nouso jüdongai sungao nung elung nou layan, yan naito ngo ngüso hau angja kiu-e.”

²⁵Küta Mosa khaiuniahoi dongai saokü APAOU nou ngüso thaiutha apa tü ti ngiom nung chite.