Read Khiamniungan Naga Aniasan 21 Bible Online

Aniasan 21 - Khiamniungan Naga bible

Aniasan 21

¹Israel thsoso hau nung ngiokhem nouso lükiu:

²Asamüh Ibri hai sua tsak tuh nai, apaüh asam pon luok thaiutha yathsüoe. Pon chinyat nouko athamshiao ti tsünoikü apa jashiao noin.

³Tilai apa asua iula nung taoko apa tsamsigoh moyangkü thanaito, apaüh apa jashitsün taoko tsamsigoh niakü tsükhu-e; lüko tilai apa asua iula, nung taoko apa tsamsigoh yangkü thanaito, apaüh apa ko tsamsigoh nialokü khuau shio-e.

⁴Apa APAOU nou apa hau tsammongnyiu tsak kiukü melothso si menyiuthso chetlut kiunaito, nung menyiu nou naiuso apa thsoso tsampaou ün noi-e, küta pohai nou apa pimsalu jashi-e.

⁵Lüko sua nou apa tsampaou, apa tsammongnyiu, naiuso apa thsoso tsüojinkü ajashitsün ko haau tsüaiu künaito,

⁶loto apa tsampaoüh apa amthang nai nialokü khu-e, küta apa koukhan nou tü niolutkü tsa-iküta apa noukhan laph-e. Nungai sua nou apa ün APAOU thaiutha aakilaiu thathonkü sua nai yathsüo-e.

⁷“Khaiunia tsaküh apa menyiuthso sua tsakli jan nai, apato melo suahoili to tsüjashi ha-e.

⁸Nung menyiuthso khaiunia ajantsoüh meshen tsam- mongnyiu theau ayang noikü jan- thiokü, lüko melo nou nung menyiu tsüaiunai, menyiuthso nou apa po hau laokü janshi-e; menyiuthso tuhtsün paou nou gohmao khaiuniahoi hau janao tsüshio, tiautenai apaüh nung menyiuthso ayam tsüthakünai kankei-iu.

⁹Khaiunia tsaküh menyiu sua tsak apa thso au kiuao tuh naito, APAOU nou apa meshen menyiuthso tsakli kankeiau noin.

¹⁰Khaiunia tsaküh tsammongnyiu müjam jonshinai, apaüh aya tsammongnyiu tü kankeitsünli, chihsikhiam, neshe, naiuso haoson wekü kankeiao noin.

¹¹Apaüh tsammongnyiu tü nung chhisiya nouso tsüthawao naito, nungh tsammongnyiu amai ti tsülokü jashiao noin.

¹²“Sauüh khaiunia loatji, nung khaiunia nou eaolu.

¹³Lüko nung apaüh sathokü loat naito, apa athang tsak ngo asoloau shantaiu nai haiuloau shio-e, nungai apa kipsane.

¹⁴Lüko tilai khaiunia tsak mongmat sungküta amao tsak mongdem loatji, apa aasanau khu lüko apa to loatkü wanshiau noin.

¹⁵“Sauüh meshen posinyiu tü pha po-e nung khaiunia nou eaulu.

¹⁶“Sauüh khaiunia tsak kaulokü jane tsüdekünai apa suali taiu-e nung khaiunia nou eaulu.

¹⁷“Sauüh apa posinyiu athesan kiu-e, nung khaiunia eaulu.

¹⁸“Ali-e taoko khaiunia tsaküh amao tsak tü lung nou khuonai, tsüdekünai pha nou thipkü apa tsütha at, apa to angja tsükiuau noin. Khaiunia sau tü khuo, nung then ai thathiowan nai, lüko apa kengchiai pai laikü tsakeiau shiokü iulanai, khaiunia sauüh apa tü khuo nungüh apa atao wanantsün mai thamao noin, naiuso apa momeilakün lektso apa paotsangao noin.

²⁰“Khaiunia tsaküh pailai tsak lokü apa sua melo tsüdekünai menyiu tsanatnai, naiuso nung sua nou atom nouko mea wom nai, nung khaiunia hau angja kiuao lu noin.

²¹Lüko sua nou ajekhaiu tsak si nime mongko tsü eannai, apa tü woitsün hau angja tsükiuao noin, angja kiutsün nung apa jengtsaiu mowantsün nou thamaniu.

²²“Khaiunia ajantso li-ekü, pem tsükengkün nyiuhai tsak da tawai kü, apa thso thaimong ainou sa-an nai, atawaikiutsün tü apa tsammongpoüh mikhemhoi ajanthat kiutsün tsangkü nai chai ja au shio-e.

²³Lüko menyiu nou pem lüko tawaiha nai, angja kiutsün nung aa liko aa,

²⁴niovei liko niovei, huo liko huo, pha liko pha, hok liko hok,

²⁵ajah liko ajah, atawai liko atawai, mou liko mou noi-e.

²⁶“Khaiunia tsaküh apa sua menyiu tsüdekünai melo tü niovei nai khuo küta, apaüh tsüepshikü iulawan nai, apaüh nung sua hau niovei liko amai kiuküta jashiau noin.

²⁷Khaiunia tsaküh huo tsak thaowan kiunai, apaüh nung sua nou huo liko amai tham küta jashiao noin.

²⁸“Jangkaupong tsaküh khaiunia ajantso she thashikü thaowat nai, nung jangkaupong nou lung nou yakkatau noin, naiuso nung nyih tsühe-ela, lüko APAOU hau angja tsükiu-e.

²⁹Lüko nung jangkaupong nou khaiunia tü thao aoli sakshi epkü, jangpao nou tü athaisan loau noin ta ngiokü, lüko nung tsü- khouwankü taiukü khaiunia ajantso thaowatnai, nung lung nou yakkat küta jangpao nou lüko loatkü wanau noin.

³⁰Tsüdekünai jangpao nou apa aa kipsanloau chai kiuuao aiunai, apaüh chai asaotsün thumkü thame.

³¹Jangkaupong tsaküh melothso tsüdekünai menyiuthso thaowat nai, nung aya ngiokhem noulu kankeikü mikheme.

³²Jangkaupong nou melo tsüdekünai menyiu sua thaowat nai, jangpao nou sua paou hau tangkason aosam kiu-e, küta jangkaupong nou yakkatkü wanau noin.

³³“Khaiunia tsaküh khan tsak thaiukü nung tsüphangjeikü wankü nungko jangkaupong tsüdekünai gado salian nai,

³⁴apaüh thainian thaiutha thamshiau noin. APAOU hau chai thaman küta nung jang mea to apaüh heau shio-e.

³⁵Khaiunia tsak jangkaupongüh amaohai khaiunia tsak jangkaupong thaowat nai, ngüneüh athaowattsün jangkaupong nou janküta chai nou janekü theao noin, loüh ngüneüh ei nyih nou lüko janekü the-ela.

³⁶Lüko jangkaupong nou thaoji ta ngekü, APAOU nou nung tsükhouwankü taiuwan nai, apaüh amao khaiunia tsak hau jangkau pong aa tsak kiutsün nou mong- tsamiau noin, lüko apaüh jangmea nou meshen thaiutha noi-e.