Read Khiamniungan Naga Aniasan 23 Bible Online

Aniasan 23 - Khiamniungan Naga bible

Aniasan 23

¹“Ni yaang ngiongem lalopeng, mitha tsümeikü kiutsün tsangkü aphio khaiunia tü lahachu.

²Tsümeikü chhitsünhoi apia nou phiai ni lahoilut, tsüdekünai hoi asong dongai ngiojane phokleshikü shi-iau kowetsün chhisiya nai lahoilut.

³Tsosilu khaiunia lilutsün taoko apa da phaphi phamong lahan.

⁴“Ni a-ehso ün jangtso tsüdekünai gado tsak alaotaiutsün ainou khuwantsün epkü thalonai, nung apa dongai laokü kankü lükhu.

⁵Ni apa thsa kantsün gado loiankü epnai, apa hachukü gado nou lütenthsakiu, nung yankü lakhuwan.

⁶“Tsosilu khaiunia tsak mikhem khako tsanai ni ngiotsüo nou laphokle-ankiu.

⁷Aphio nai namnam- tsün lachhi, naiuso aphio tsülepkün khaiunia laloat, tititenai nungtin tsümeikün chhisiya chhitsünso ngo sau lünou tsüpenkiu-e.

⁸Nekhem paopei lalo, tititenai nekhem paopei nou khaiuniahoi ayam tha ainou niopek iula-iji, naiuso aphio tsülepkün ngio phokle laple kiuji.

⁹“Ni mesanhai tü tsümeikü lachhi; tiautenai asam Ijip goumchi nai mesanli noikü shiphe, mesanhai mongyang ngekü noin.

¹⁰“Pon louk saokü ni eiu ai lelo lethiokü nungai sungtsün eiu nouso lükamshi.

¹¹Lüko pon chinyat nouko to lelo tsülethiokü lütaiu, naiuso nungko sungnai be-eiuyam titso layam. Nungko sungtsün angja khaiuniahoi hau lühe-i, naiuso apoi nouso liu thainian nouso hau lühe-i. Nunglilu ni asainaoshep eiu nouso naiuso olip shep aimong ko lüchhi.

¹²“Anojet tsak mongko louknyi chhisiya lüchhi, lüko chinyatnyi nouko to titso lachhisiya, nungtiphe asam hau chhikiutsün gohmao khaiuniahoi naiuso thainian nousoüh lüko aaloau shio-e.

¹³“Ngo, APAOU nou, ni tü ngiotsün alum tü anglu. Amao goa nouso tü misao lasao, ngüso nian lüko lakankei.

¹⁴“Pon tsak ko Ngo lomsanau sümai süme lüsaohe.

¹⁵Abib alei nouko asam Ijip goumchi ainou tsalokü khutsün alei nai, Ngo asam tü thoiluttsün ayamli phoplao tsüthiokün themtsai sümai lüsaohe. Ajekhaiu chinyatnyi sümai nouko asamüh phoplao thiokü shantsün themtsai titso tsühe-ela. Ngü tü amkhamao phakeng laitso lashi.

¹⁶“Asam eiu ai be-eiuyam tao atsalonai be-eiuyam sümai lüsaohe. Paithsam thuk ah tao tilai asamüh asam sainaoshep eiu nouso naiuso shep eiu nouso ainou shep kamshi-e, asamüh Asolotsün sümai lüsaohe.

¹⁷Pon pungkü nung sümai süme nousoko pohai apem nou APAOU, asam Goa, Ngo amkhamao shiao noin.

¹⁸“Tilai asamüh ngü hau thainian loatkü amkham kiu-e, phoplao hakü shantsün themtsai nou amkham nai lahe. Nungso sümai taoko ngü hau amkham kiutsün thainian iiu nungthan nyap ahom saokü hao tsüpoi-e.

¹⁹“Pon pungkü asam be-eiuyam ayating asamüh yamsantsün ameiting APAOU, asam Goa tsamai kankü ashi. “Ni onnemokthso tsüdekünai wonthso anyaochep taoko tsüloatela.

²⁰“Ayam nia ao naiuso ngo ti goumchi khemtaiukiukü taium, nungai ni nialokü shiao thaiutha ngo akhako hongthon tsak honge.

²¹Apa tü mong nou lükiu naiuso apa ngio lüang. Apa thako lakhengshi, tititenai ngo apa hongio, naiuso nungtin akhengshi apaüh awan tsükiu-e.

²²Lüko ni apa ngio angkü ngo thoiluttsün alum chhinaito, nitü khengshitsünso chikü thako ngo li-e.

²³Jü hongthon akhako khu-e naiuso Amor hai, Hit hai, Periz hai, Kanan hai, Hiv hai, naiuso Jebus hai goumchi ai ni nialokü shi-e, naiuso ngo ngüso lomo-e.

²⁴Ngüso goa khako lakauthio, tsüdekünai la amkham, naiuso ngüso don yam nouso lasailo. Ngüso goa nouso moisemkü lomokü, ngüso asio lung kheam nouso nelangkü lotheanao noin.

²⁵Asamüh ngü amkham naito, APAOU asam Goa nou asam hau aheau si ashiuao ouk kiu-e, naiuso asam ongko nou akiasiya chikü wanankiu-e.

²⁶Agoumchi nai nyiuhai sauüh methso ayam tsüthakünai tsükane tsüdekünai methso tsühakü tsünoi-e. Ngo asam hau aakihlaiu kiu-e.

²⁷“Ngo asam tü khengshitsün khaiuniahoi nou Ngü lun hat-i-e, asam sauhai thako li-eji, nung khaiuniaso ongko ngo apülai kankü shi-e, naiuso ngo asam ehso asam ainou laplokü khulükhun-i-e.

²⁸Ngo asam ehso lekkatkü nai yakkane, asam khutsün nai ngo Hiv hai, Kanan hai, naiuso Hit hai komane.

²⁹Ngo ngüso pon tsak mongkolu to tsükomane, ngo nung koman naito, goumchi nou leankü khuwane, naiuso liu thainian nouso asam thaiutha thatü piakü noi-e.

³⁰Nungliko to, ngo ngüso thsaothsaokü chong komankü asam nung goumchi thalokü saiukü moiulakün lektso kome.

³¹Ngo asam goumchi elung nouso Agaba haiu ainou Mediteranian khiamnok saokü, naiuso liutsa ainou Eufrates haiumong saokü shane. Ngo asam hau nung goumchi ko kihtsünso khako oukong nou kiu-e, naiuso asam khutsün ko aikü asamüh ngüso komane.

³²Ngüso ko titso ngiomong shinge lashantaiu, tsüdekünai ngüso goa ko lashan.

³³Nung khaiunia nouso asam goumchi ko lakiha-i; asamüh kiha-i naito, ngüso asam hau jüthako angei sun-iau shane. Asamüh ngüso goa nouso amkham naito, nung asam thaiutha jin atsaoting tsak noi-e!”