Read Khiamniungan Naga Aniasan 24 Bible Online

Aniasan 24 - Khiamniungan Naga bible

Aniasan 24

¹APAOU nou Mosa tü ngiom, “Ni, naiuso Aron, Nadab, Abihu, naiuso Israel ahei aochinyat nouso, jüdongai king nai asungh, naiuso tilai asam shimkü shiao intso jetekü noi-e, kauthiokü a amkham.

²Amaohai sau tsühakü apimsalu jüdongai shimkü shiao noin. Khaiuniahoi nou kinghok nai lüko tsüsungao noin.”

³Mosa shiküta APAOU athoilut- tsünso naiuso ngiokhem nouso apem khaiuniahoi hau chite, naiuso khaiuniahoi nou aikü thalakü ngiom, “APAOU nou chitetsün ngio chikü samüh chhiko.”

⁴Mosaüh APAOU athoiluttsünso apem satlo. Nungthan nyi ahom beta apaüh kinghok nai amthang tsak lahshan, küta Israel kau chekü nime nouso pungkü thaiutha lung tsak tsak kihkü taiu.

⁵Naiuso apaüh Israel oum khaiunia nouso APAOU hau ajahtsün chaithio naiuso jangtsopong loatkü aalo chaithio kiuao hong.

⁶Mosaüh thainian she haoson tsak loküta chio nouko thio, naiuso apoi haoson tsak nou amthang nou tü satlut.

⁷Küta apaüh athalu-etsün thsam tisübao nouko APAOU athoiluttsünso satkü noiküla nung loküta, khaiunia nousoüh lulakü sangh songkü wekü han. Ngüsoüh ngiom, “Samüh APAOU tü angio ange naiuso apaüh thoilut taiutsün alum chhi-e.”

⁸Küta Mosaüh chio nai thio taiutsün she nou loküta khaiunia hoi tü satlut. Apaüh ngiom, “Subao APAOU nou asam ko apa athoiluttsünso kiukü noiküla, nung taoko apa athalu-etsün nai nung she nou thanglut.”

⁹Mosa, Aron, Nadab, Abihu, naiuso Israel hai aheihoi aochinyat nouso king nai sungh,

¹⁰nungai ngüsoüh Israel hai Goa ep. Apa hok khem nai Safir lung asangnya maou lengli, tülinglingkü noiküla.

¹¹Nung Israel khaiunia aheihoi nouso tü Goa nou tsütawai, ngüsoüh Goa ep, naiuso ngüso kamkü heshiukü noiküla.

¹²APAOU nou Mosa tü ngiom, “King nai Jüdongai asungh, naiuso ni nungai noinai, khaiuniahoi hau ayam hanao thaiutha Ngo satkü taiutsün ngiokhem nouso chikü sunkü lungkhio nime ni hau kiu-e.”

¹³Mosa naiuso apa hachutsün Yihusua khemlo, küta Mosa asio King khaiu nai sung au tsalo.

¹⁴Mosaüh aheihoi nouso tü ngiom, “Sam müjam asam dongai moshikün lektso nungko taiukü anoi. Aron naiuso Hur ne asamko noin, asam jetko tsüjeiaikü angem sungnai ngüne dongai khuau shio-e.”

¹⁵Mosa Sinai King ai sung- khuwan, küta King nou thengmia tsaküh khojeian.

¹⁶King nai APAOU noitsün hankü asalo awon nou saom. Israel thsoso hau to awon nou kingkhaiu nai In nyai tsak khekkü epi. Nungai thengmia nou king ajekhaiu louknyi loijei, naiuso chinyatnyi nouko APAOU nou Mosa tü thengmia ainou jon.

¹⁸Nungai Mosa thengmia ong ai sungkhu, küta apa nungai ajekhaiu aopülenyi naiuso aopülesoh ta noiküla.