Read Khiamniungan Naga Aniasan 26 Bible Online

Aniasan 26 - Khiamniungan Naga bible

Aniasan 26

¹APAO Nejenkhio among nou ne ashethop oukü che nou asangnya leng, paipun ashethop naiuso aleng emok nou lüshan. Nung tü akoi nime pokü noitsün thainian sotsom nou lüchiolut.

²Ne pungkü atheng atham wewekü lüthe, alaiu nai phasab eknimekü petjei naiuso atham nai phasab nime.

³Nung ne anelang pungo nouso tsak hao thekü lüchioshi, naiuso amao pungo nou tü lüko wekü lüchio.

⁴Achioshi pungkü nai achiai ne sangnyathun nai kiangkü lüshan.

⁵Ayating akiang lükhuntsün tü aopungo ngüso ano nousoko aphi nepat nouso lüjeiai-e.

⁶Ahoi nime nou tsak hao iulakü kamshiao chaiou lakkkeng nou chonsiang aopungo lüshan.

⁷“Nejenkhio nou sojeiao thaiutha ne chekü tsak wonkoi nou shantsün tsak lüshan.

⁸Nung ne nouso chikü wekü lüshan, atheng nai phasab aosam naiuso atham nai phasab püle.

⁹Nungso apem pungo nou tsak hao thekü lüchioshi, naiuso amao louk nouso tsak hao thekü lüchioshi. Louk nouso nejenkhio khütha nai müjam lükhapshi.

¹⁰Athon achioshi tsak athun nai ewoi aopungo kiangkü lüchiolut, naiuso amao ewoi aopungo kiangkü chioluttsün amao athun tsak nai lüchiolut.

¹¹Akapjei tsak theao taoson lung nou chonsiang aopungo shankü nime nou jipe ao ewoi chiotsün tü lüchiolut.

¹²Ayan apoisan nou nejenkhio phiai lüphan.

¹³Naiuso nejenkhio sojeitsün ne alaiu nai poisan nou etsai phasab tsak naiuso amao etsakai phasab tsak ta loijeiao thaiutha amkham nejenkhio ano tsak ainou khütha nai ne nou phankü taiu-ela.

¹⁴“Kengchi nou kappok au onnemok pun thengsengkü tsak naiuso amao tsak nou nyikhun amei tsak ta lüshan.

¹⁵“Amkham Nejenkhio langthsakü noiao thaiutha akacia pai nou lüshan.

¹⁶Athat pungkü atheng nai phasab che naiuso atham nai phasab tsak küta apaitso athe.

¹⁷Athat nou wekü sungiao thaiutha kheam nime me wewekü jipe ao noin. Athat chikü nung kheam jipetsünli theao noin.

¹⁸Akei tsak ai hao thaiutha athat eknime lüshan,

¹⁹naiuso kheam eknime khemai ni taoson lung aopüle akhowe ao lüshan akhei kheam nou athat pungkü nime me khokü nung ajipe nou lomongao noin.

²⁰Amkham nejenkhio akei tsak ai hao athat eknime lüshan;

²¹taoson lung kheam aopüle, athat pungkü nime me athio.

²²Ajenap nai Amkham Nejenkhio phiai hao thaiutha, athat louk lüshan,

²³naiuso athat nime nou aniokun nouso ai athio.

²⁴Nung aniokun athat nouso athan nai jipe küta asungthun saokü ajipe. Aniokun athat nime nouso nung yamko chhiao noin.

²⁵Nungtiphe taoson lung athan nai thekü nou athat petjei noi-e, nungso athat tsak pungkü nai nime thio-e.

²⁶“Akacia pai chekü pungo nou jei-ekü lüshan, Nejenkhio akei tsak ai athat thaiutha pungo,

²⁷naiuso tsakai thaiutha pungo, naiuso ajenapki tsak nouko phiai pungo lüshan.

²⁸Awem ko jei-etsün nung yam wemko athat nouko awewe nou tsak ainou tsak ta Nejenkhio lüshan.

²⁹Athat nou chaiou lakkeng nou lülopok naiuso jei-ekü noitsün ko chaiou khiapthso nou lülolut nung da thalo-e, nungso lüko chaiou lakkeng nou lopokkü ashan.

³⁰Ngo ni tü King nai noi taoko hantsünli Nejenkhio nou ayam nai lüyachu.

³¹“Nekhongjeitsün ewoi amei asangnya leng nou oukü, shethopkü, naiuso emok ne aseng leng nou lakü lüshan. Akoi nime potsün thainian sotsom nou nungtü lüchiolut.

³²Küta tangkason püle taiukü, chonsiang nou kelutkü, akacia pai chaiou nou nyingjeiküta kheam püle chiai nung shiokü lütaiu.

³³Nejenkhio tsamkhaio nai chonsiang ing nou khemko nekhongtsün lütaiu, naiuso nung nekhongjeitsün phiko lungkhio nime tü sat taiutsün Athathalu-e Ngiokhem Paidan nou lütaiu. Nekhongjeitsün nou Asio thang nou thatü Asioting thang ainou moda pungekü taiu-e.

³⁴Athalu-e Ngiokhem Paidan nou da akap nou lülolut.

³⁵Asioting thang king chiai puo nou Nejenkhio ajepekki nou thako lütaiu, naiuso tson taiutsün nou ajenapki nai sheikü lütaiu.

³⁶“APAOU Nejenkhio nai naptsün ko nekhongjeitsün ashethop ne asangnya leng, matchaikü naiuso emok ewoi aseng nou alengyam yam- lutkü lüshan.

³⁷Nung nekhong- jeitsün thaiutha chaiou lakkeng chonsiang kelutkü chaiou lakkeng nou chukü akacia pai pungo lüshan, küta nung kheam nouso thaiutha anoithang nou taoson lung pungo nou lüshan.”