Read Khiamniungan Naga Aniasan 27 Bible Online

Aniasan 27 - Khiamniungan Naga bible

Aniasan 27

¹Akacia pai nou amthang tsak lüshan. Nung atheng nai phasab pungo naiuso atham nai phasab pungo ta wekü lüshan, naiuso atsok nou phasab süme lüthe.

²Asungthun tsamniokun püle nouso sotsom lüshan, nungso amthang nou ko tsak hao thekü lüshan küta nung sotsom athon nou taoson lung son nou thapokkü lüshan.

³Naiuso luo khepthioau thaiutha lak tsak naiuso atsom ao chio naiuso chonsiang, loüh inkaio kankeitsün lüshan. Chiosilak apem taoson lung son nou lüshan.

⁴Taoson lungpe nou tsak naiuso aniokun püle nai akankeiao ang nou taoson lung son nou lülolut.

⁵Nung sonpe nou amkham tsam kheamnio khemai alolut, naiuso ngüsoüh amthang nou apaitso ko sungsaokü athe.

⁶Akacia pai nou api-keiao ano nouso lüshan, küta nungso taoson lung son nou alopok,

⁷naiuso tilai nung pi-e, amthang anio pungkü ang potsün nai alolut.

⁸Ni amthang nou khiopuo nou lüshan, küta kekthiokü ataiu, Ngo King nai ni hau hantsünli athat nai ngüsoüh shanao noin.

⁹“APAOU Nejenkhio thaiutha ne ashethop amei nou akhongjeitsün ne tsak lüshan. Ajepekki tsak thaiutha akhongjeitsün ne phasab tsom tsak laiukü lüshan,

¹⁰nung taoson lung eknime tü taoson lung kheam eknime nou hachukü anoilut, naiuso nung tangkason nou shantsün kheam akho-etsün hakü lüthe.

¹¹Ajenapki tsakai hao lüko apejei nou ayalilu wekü lüshan.

¹²Ajenapnai phasab aopungo laiukü kheam che nouso kheam che nou tü noilutkü akhongjeitsün ne shanao noin.

¹³Ajepek nai tiai anaptsün koukhan noin, nungai lüko apejeitsün ne phasab atham nai aopungo theao noin.

¹⁴Anaptsün pungkü phasab chekü pungongo, nekhongjeitsün theao noin, nungso kheam süme nou kheam süme chiai noilutkü athe.

¹⁶Naiuso kengchi koukhan thaiutha akhongjeitsün ne phasab eknime, aleng asangnya, nyakhaokü, emok ewoi aseng naiuso achioluttsün paipun ashethop nou sotsom thiokü chiotsün nungso kheam püle naiuso anoilut püle.

¹⁷Apejeitsün lemkü kheam apem tangkason nou jipeao noin, naiuso nungso khiangjeitsün tangkason nou shankü naiuso anoiluttsün kheam nouso taoson lung nou shankü theao noin.

¹⁸Apejeitsün atham nai phasab tsom tsak, atham apem nai phasab aopungo, naiuso atsok nai phasab pungo theao noin. Akhongjeitsün ne nouso ne ashethop nou shankü naiuso anoilut kheam taoson lung nou shanao noin.

¹⁹Nejenkhio latsün jengtsaiu apem naiuso nung pejeitsün pe nouso apem taoson lung nou shantsün theao noin.

²⁰“Israel thsoso tü asham tson tsülonyatkü sonlutkü taiuao thaiutha Olip khaiutsom ameiting nou adongai kankü shiao lüthoilut.

²¹APAOU Nejenkhio nai, akhong- jeitsün ne khengai, tisübao Athalu-e Paidan khako noin, nungai Aron naiuso apa thsosoüh asham ainou ahom saokü APAOU khako nung jah-e. Nung athoilut nou Israel thsosoüh naiuso ngüso thsaosithsoso hao vetao si vetao thaiutha ngiokhem tsak noi-e.