Read Khiamniungan Naga Aniasan 28 Bible Online

Aniasan 28 - Khiamniungan Naga bible

Aniasan 28

¹“Ni adei Aron naiuso apa thsoso-Nadab, Abihu, Eleazar naiuso Ithamar ngüso adongai lüjonshi. Ngüsoüh mesonli Ngü yathsüoau Israel khaiuniahoi ong ainou pungekü ataiu.

²Adei Aron thaiutha meson neshe nouso apa chhisiya tü waokü aluao meikü lüshan.

³Ngo kiutaiutsün ange amon paopei suntsünhoi lüjon, küta ngüso tü Aron neshe shanao lüngio, nungai apa Ngü yathsüotsün chhisiya nai meson tsakli thumkü losiokü noi-e.

⁴Ngüsoüh shanao nou neshe nungso noi-e: Kongwoi tsak, meson asio neshe tsak, phakhut alaiu tsak, aleng achio chiolutkü thetsün phakhut tsak, kandio tsak, naiuso omkhi tsak. Ngüsoüh adei Aron naiuso apa thsoso thaiutha meson neshe nungso shanao noin, nungti ngüsoüh mesonhoili ngü yathsüoe.

⁵Ngüsoüh lakkeng ewoi maou lengli, ashethop, emok ewoi aseng, naiuso paipun ne amachai theao noin.

⁶“Ngüsoüh meson asio neshe nou phakhut alaiu nou asangnya leng, athang leng, emok ewoi, lakkeng ewoi, naiuso ashethop ne, aluao meikü chiolutkü shanao noin.

⁷Sangdong nai woi-itsün nehen nime, tisübao tsangkü shitho jenkü keshiao noin, nung tsoki nemthso ai hoilutkü chiolut ao noin.

⁸Neshe tsak hau thekü kankeiao phakhut alaiu nou da omkhi nou ne in tsak noulu meikü laküta jiplut ao noin.

⁹Kalnelian lung nime tü Yakob thsoso chekü nime nouso nian lühaiulut,

¹⁰ngüso achettsün lingkü lung tsak da nian louk naiuso lung tsak da nian louk ta lühaiulut.

¹¹Lung tü nian haiuluttsün khaiunia nou sattsünli, Yakob thsoso nian lung nime tü lühaiulut, küta nung lung nou chaiou lakkeng chiai lünoilut.

¹²Nung sangdong nai woi-itsün nehen chiai lolutkü Israel kau che kü nime liko lükankei. Nungli Aronüh apa sangdongai nian nouso kane, nungti Ngo, APAOU, nou jü khaiuniaso asaita yangsane.

¹³Chaiou lakkeng nime nou athanya lüshan,

¹⁴chaiou lakkkeng noulu sonkhiang nime ao chantsünli chanküta nungso anoiluttsün ta lüjiplut.

¹⁵“Goa mongchio janthattsün tao kankeiao Akhengting Meson thaiutha kongwoi tsak lüshan. Nung phalaiu phakhut neshe aleng achio chiolutkü ayalilu lüshan.

¹⁶Nung ano püle nai wewekülu theküta ne nou nene khapkü athe, nung atheng nai kom tsak loüh apun naiüh kom tsak ta theao noin.

¹⁷Nung chiko chaiou lung ahoi püle lütaiu; aya hoiling nouko rubi lung tsak, nungthanko topaz lung, naiuso garnet lung tsak,

¹⁸hoiling nime nouko emerald lung tsak, safir lung tsak, naiuso daimon lung;

¹⁹hoiling süme nouko turquise lung tsak, agat lung tsak, naiuso amitis lung,

²⁰hoiling püle nouko beril lung tsak, karnelian lung tsak, naiuso jasper lung tsak ta lütaiu. Nungso chikü chaiou lakkeng chiai noilutkü lütaiu.

²¹Israel kau nouso liko Yakob thsoso nian nung lung chekü nime pungkü da nian tsak tsak langlut au noin.

²²Aochanli chaiou lakkeng noulu chankü kongwoi thaiutha lüshan.

²³Chaiou khiap nime shanküta kongwoi a chithun nouso tü lüjiplut,

²⁴küta chaiou lakkeng aochan nou khiap nime nou tü jenkü lükelut.

²⁵Chaiou lakkeng aochan nime thun nou anoilut nime nou tü mongkü lüsinglut, küta nungli phalaiu phakhut sangdong nai woi-itsün kha ai nai lüjiplut.

²⁶Nungthanko khiap nime shanküta phalaiu phakhut akheithun nou kongwoi asaothun nouso tü lüjiplut.

²⁷Loüh chaiou lakkeng khiap nime shankü phalaiu phakhut sangdong khaiu wei nime asaothun khako nethun nime shimkü emok ewoi amei nou latsün omkhi tü lüjiplut.

²⁸Kongwoi nou omkhi chiai tsüpiankü noiau thaiutha ko, kongwoi ang nouso phalaiu phakhut nou tü asangnya aochan tsak nou jipekü mongkü lükelut.

²⁹“Tilai Aron Asio Thang nai nape, apaüh Israel kau nian nouso chiolutkü taiutsün kongwoi theloau noin, nungai Ngo, APAOU, nou, jü khaiunia asaita yangsane.

³⁰Kongwoi nou tü Urim naiuso Thummim lülolut, nungai Aron tilai APAOU Nejenkhio nai nappe nunghso tholokü shiao noin. Nungti nou taoko apaüh asaita kongwoi nou woiao noin, nungai apaüh Israel khaiunia thaiutha ngo mongchiotsün janthat ao shio-e.

³¹“Meson asio shitho ne nouso apem athangh lengli noi-e.

³²Naiuso nung awem nouko khaiu thaiutha losatkü theao noin; naiuso nung khaiu thaiutha losat taiutsün lemkü tsüchipek au thaiutha lemkü jemshiao noin.

³³Nehong asaothun lemkü taopun athangh lengli asangnya, shethopkü, naiuso emok ewoi aseng nou naiuso chaiou lakkeng sonla nou lülolut.

³⁵Aronüh meson ayathso chhitsün taoko nung shitho thothokü noiküla. Apa tilai jükhako Asio Thang nai nape, naiuso khuwan shi-e, apa nehongthun nai phanlut taiutsün la ngem nou lula-e, naiuso apa tsüloat-e.

³⁶“Chaiou lakkeng nou lu shantsün lak tsak shan küta, nungtü APAOU hau thumkü kiutsün ta lüsatlut.

³⁷Naiuso nung asangnya leng tsaküh kandio kha nai lükelut.

³⁸Aronüh nung apa khakheng ai kelutkü the-ela, nungaito Ngo, APAOU, nou khaiuniahoi chaithio taoko ayam ajantso ko aphio sunlüko, Israel haiüh chaithio apem Ngü hau thumkü kiutsün lou-e.

³⁹“Aron phakhut, kandio naiuso omkhi nouso ne ashethop nou jipon nou aleng thiokü lüla.

⁴⁰“Aron thsoso thaiutha ngüso chhisiya tü waokü aluao meikü, phakhut, omkhi naiuso kandio nouso lüshan.

⁴¹Nung neshe shitho nouso adei Aron naiuso apa thsoso tü lütenlut. Küta ngüso tü olip khaiutsom nou tsomkiukü losio küta asio chhisiya thaiutha thumkü lüwan; nungai ngüsoüh mesonhoi tsakli Ngü yathsüo-e.

⁴²Ngüso pem tsosa nou lopok au thaiutha phakek ainou shiolak saokü ashethop ne nou shantsün phakhut lüshan.

⁴³Tilai Aron naiuso apa thsoso APAOU Nejenkhio nai nappe, tsüdekünai Asio Amthang nai mesonhoili Ngü yathsüoau shimkü shi-e, ngüso shitsün ko tsüloat ao thaiutha ko ngüsoüh nung neshe nouso asaita thokü theao noin. Nung Aron naiuso apa thsaosithsoso thaiutha tsuli-eshikü hao ngiokhem tsak noin.