Read Khiamniungan Naga Aniasan 29 Bible Online

Aniasan 29 - Khiamniungan Naga bible

Aniasan 29

¹“Aron naiuso apa thsosoüh Ngü yathsüotsün meson chhi nai siokü yathsüoau thaiutha ni nungso ngüso tü chhiao noin: Aleng ii tsüpokü jangtsopong tsak naiuso onnemok thso nime alou.

²Jinyak wonne ameiting, phoplao tsüthiokü, naiuso themtsai ajantso olip khaiutsom ko lao-ekü ashan, naiuso ajantso olip khaiutsom tsühakü, naiuso ajantso thsam ko tsantsün themtsaili eiu nouko hakü lütsai.

³Nungso thsa tsak ko thioküta asamüh jangtsopong nou naiuso onnemokthso nime nou amkham chaithio kiu taoko athio.

⁴“Aron naiuso apa thsoso APAOU Nejenkhio nai naptsün koukhan nai nialokü ashi küta ngüso alosio khiam lüpeng ta lüngio.

⁵Naiuso Aron hao meson neshe shitho nouso lüthokiu, phakhut nou, phalaiu phakhut nehong mongai thetsün, kongwoi, naiuso la nou lüthokiu.

⁶Apa tü kandio nou lükeilut, naiuso ‘APAOU hau thumkü kiutsün’ ta satlut nou ii lükelut.

⁷Küta atsomkiutsün khaiutsom lokü apa khaiu ai thsalutkü lütsomkiu.

⁸“Apa thsoso nialokü shiküta ngüso hau phakhut lükhutkiu;

⁹ngüso om lemkü omkhi naiuso ngüso khaiu nai kandio nouso lükeikiu. Nungli ni Aron naiuso apa thsoso alosio chhi nai taiuao noin. Ngüso thsaosithsosoüh asaita thaiutha meson thekü Ngü yathsüoao noin.

¹⁰“Jangtsopong nou APAOU Nejen- khio khako kankü shiküta Aron naiuso apa thsoso tü ngüso pha jangkhaiu chiai helut ao lüngio.

¹¹Jangtsopong nou APAOU Nejenkhio nai naptsün koukhan yamko aloat.

¹²Jangtsopong she ajantso loküta aphakhathsoüh chamlokü nung amthang shanao khemtaiutsün tü lülolut.

¹³Nungthanko asansimong nai nou iiu nouso apem loküta, asan haoson ameiting nou, naiuso asantsa nemthso iiu nou hakü loküta Ngü hao amthang nai jahkü chaithio tsakli akiu.

¹⁴Lüko jangtso nyih nou, akhun nou, naiuso asai nou lop samdang kengchiai lujahwan. Nung chaithio nou mesonhoi angei kanlükhunao thaiutha noin.

¹⁵“Onnemokthso tsak loküta Aron naiuso apa thsoso tü ngüso pha onnemok khaiu chiai helut ao lüngio.

¹⁶Nung lüloat, küta nung ashe nou lokü amthang aniokun püle nai lüsatpeng.

¹⁷Onnemokthso nou nelangkü lühepek; asansimong naiuso athsanjet nouso in nai lüjahwan, küta anelang hepektaiu nousoko nungso khaiu dongko lütaiu.

¹⁸Onnemok athum amthang nai eheshiu chaithio kiukü lüjah. Nung ajahtsün chaithio angannyam nou Ngo monglengiji.

¹⁹“Amao onnemok tsak alosioau thaiutha loküta Aron naiuso apa thsoso tü ngüso pha nung khaiu nai helut ao lüngio.

²⁰Nung lüloat, küta ashe ajantso lokü Aron naiuso apa thsoso tü noukhan uai nai lüpilut, ngüso pha pao uai naiuso hokkha pao uai nai lüpeilut. Ashe apoi nou apem amthang aniokun püle nai lüthsalut.

²¹Amthang ainou ashe ajantso naiuso atsomkiutsün khaiutsom lokü ta Aron naiuso apa neshe so si apa thsoso nesheso tü lühaklut. Aron naiuso apa thsoso, naiuso ngüso neshe nouso thumkü losiokü taiutsün Ngü tü noi-e.

²²“Onnemokthso iiu, ami nai iiutsün, asansimong nai iiutsün, haoson ameiting asan nou, awe nime nou ta iiu sunkü, naiuso shiolak uai nou heanao noin.

²³Ngü hao chaithio kiutaiutsün themtsai thsa ainou, olip khaiutsom khiam hakü tsa-itsün tsak, naiuso khaiutsom khiam tsühakü tsa-itsün tsak naiuso atsan nai taiutsün themtsai tsak ta in pungkü tsak tsak alou.

²⁴Nung eheshiu nouso apem Aron naiuso apa thsoso pha nai lothiokü ta ngü tü nung amothi paopei tsak ta alosio ao lüchite.

²⁵Küta ngüso ainou lokü ngühao eheshiu waoshentsünli ajahtsün chaithio amthang chiai jahkü amkham akiu. Nung chaithio angannyam nou Ngü monglengiji.

²⁶“Nung onnemokthso nyaolak nou loküta ngü hau amothi chaithio tsakli losiokü ataiu. Nung thainian haoson nou athaiutha noi-e.

²⁷“Tilai meson tsak alosio chhi nai taiu-e, alosio chhi nai taiuao chhisiya chhikiutsün taoko onnemokthso nyaolak naiuso ashiolak nouso ngü hao amothi chaithio tsakli losiokü ataiu, naiuso nung meson nouso hao mothikü wanao noin.

²⁸Nung tsüli-eshikün athalo tsak noin, nung tilai jü khaiuniasoüh ngüso nokmei chaithio nouso thio-e, anyaolak naiuso ashiolak nou mesonhoi haoson noi-e. Nung Ngü APAOU hau khaiuniahoi ün paopei noin.

²⁹“Aron meson neshe shitho nouso apa ean phiai apa thsoso hau lethio kiushiao noin, tititenai tilai ngüso meson asio chhisiya nai losiokü taiuao thawao-e, ngüsoüh nung shitho tholoau noin.

³⁰Aron thsoso sauüh apa meson chhi lilo-e APAOU Nejenkhio nai napkü asiothang nai jükhako ayathsüo au shi-e, apaüh nungso neshe shitho nouso chinyatnyi thoau noin.

³¹“Aron naiuso apa thsoso losiokü taiuao chhisiya taoko kankeitsün onnemokthso nyih nung asiothang tsak nai lütheng.

³²Ngüsoüh nung thsa nai themtsai poikü taiutsün ko hakü APAOU Nejenkhio bekhan dongko heau noin.

³³Ngüso losiokü taiutsün taoko awankiu amkham kiutsün ko ti kankeikü noiküla ngüsoüh nung heao noin. Meson nousoüh lu nung heshiuao noin, tiautenai nung asio noin.

³⁴Nyih tsüdekünai themtsai ajantso ahom tsühekhemkü poinai, nung tsüheao noin, tiautenai nung asio noin naiuso nung jahwanao noin.

³⁵“Aron naiuso apa thsoso thaiutha ngo ni tü thoilut taiutsünli ajekhaiu chinyatnyi tongtü alosio- tsün chhisiya nai taiuao amkham shanao noin.

³⁶Angei wankiuao thaiutha ajekhaiu pungkü ni jangtsopong tsak chaithio kiuao noin. Nungüh amthang nou losio-e. Küta olip khaiutsom nou siokü iulaao thaiutha tsomkiuao noin.

³⁷Nung chinyatnyi thaiutha ajekhaiu tsü- tokü lüshan. Nungai amthang nou tongtü siokü noi-e, küta ajantsoüh nung da than nai apa da asio oukong tsangkü tawai-e.

³⁸“Ashiao noitsün atao chikü thaiutha ajekhaiu pungkü onnemok- thso pon tsak shelokü nimeme amkham kiutsün nai kiukü amkhamao noin.

³⁹Onnemokthso tsak ahom naiuso amao tsak nou asham ta amkham kiuao noin.

⁴⁰Chongting onnemokthso amkham nouko jinyak wonne tsoi tsak nouko olip khiam asangting tsoi tsak ta lülaowe. Theng tsoi tsak amkham tsakli thioao noin.

⁴¹Onnemokthso chaithio nime nou asham lüthio, naiuso wonne tsoi ayako wekü olip khiam lüko wekülu naiuso theng lüko ahom tsoi tsakli wekülu lüthio. Nung Ngo, APAOU, nou tü heshiu chaithio tsak noin, naiuso nung chaithio kiutsün angannyam nou Ngo monglengiji.

⁴²Ashiao tao chikü thaiutha nung ajahtsün chaithio APAOU Nejenkhio nai naptsün koukhan dongko jükhako amkham kiuao noin. Nungko Ngo jü khaiuniaso ko phete-e naiuso niko chite-e.

⁴³Nungko Ngo Israel khaiuniaso ko phete-e, naiuso ajinka nou Ngo noitsün athang losio-e.

⁴⁴Ngo Nejenkhio naiuso amthang nou siokü shane, naiuso Aron si apa thsoso Ngü yathsüoao mesonhoili mothikü pungekü taiu-e.

⁴⁵Ngo Israel khaiunia ongko noi-e, naiuso Ngo ngüso Goa noi-e.

⁴⁶Ngo ngüso ongko kih au shiokü shitsün nung Ngo APAOU ngüso Goa, sauüh ngüso Ijip ainou niasan nung ngüsoüh nge-e. Ngo, APAOU, ngüso Goa noin.”