Read Khiamniungan Naga Aniasan 34 Bible Online

Aniasan 34 - Khiamniungan Naga bible

Aniasan 34

¹APAOU nou Mosa tü ngiom, “Aya nouso lilu lungkhio nime alangsan, küta ngo nungso tü aya lungkhio nouso tü satkü ni lopaiantsün ngio nouso sate.

²Lühom ahom khemloküta, Sinai Kingchong nai Ngü ko pheteau asungh.

³Khaiunia sautso niko hakü tsüsungha-i-ela, tsüdekünai king nai sauhau lünou tsüepi-ela, naiuso onnemok hoi naiuso janghoi au nung kinghok nai thsan tsütsamhe-iao noin.”

⁴Nungtiphe Mosaüh lungkhio nime langlo küta, nungthan nyap ahom beta Mosa nung lungkhio kankü APAOU nou thoiluttsünli Sinai King ai sungh.

⁵APAOU thengmia nai saokü, apa ko tsakü noiküla, küta apa nian asio nou APAOU ta nge-i.

⁶APAOU nou apa khako yanlükhun küta sang asong nou jonkü ngiom, “Atsüojin, naiuso atsüojinyang kiutsün nou meankü noitsün, amongmat sungtsün yam- lukü, naiuso atsüojin asong naiuso amonglamluttsün nou meankü, naiuso saiukü noitsün Ngo APAOU nou noin.”

⁷Ngo jü athalou-e nung vetao hengsiheng thaiutha hanji, naiuso aphio si angei wankiuji, lüko nungüh tilaitso aphio sunhetsün siokü iula-iao tsüshioji, Posinyiu aphio shioko thsaosithsoso da vetao süme si püle tü saokü phaosan sanji.

⁸Mosaüh shakta goh ai kaukü napküta amkham.

⁹Apaüh ngiom, “APAOU, ni atsüoting ngüko atsüojinyang noin tünaito, ngo ni ta sam ko khuha au kojaji. Nung khaiunia nouso mong kongkü noin, lüko sam aphio naiuso angei awankiu, naiuso sam akhaiuniahoi ta alou.”

¹⁰APAOU nou Mosa tü ngiom, “Ngo lo Israel khaiunia hoiko athalu-e tsak shanji. Ngüso khako ti goumchiai naiuso ti mele ongko lünou tilaitso tsüchhidekün athanga chhi asong- ting nouso chhi-e. Khaiunia apemüh Ngo APAOU, nou chhiao shiotsün, athanga chhi nouso eppe, tiautenai Ngo asam ko chhiao noitsün nungto ahatao chhi tsak noin.

¹¹Ngo lonyi ngiokhem kiutsün asamüh angio lü-ang. Ngo Amor hai, Kanan hai, Hit hai, Periz hai, Hiv hai, naiuso Jebus hai, asam kha ai khutsün ko koman kiu-e.

¹²Asam khutsün goumchi khaiunia nousoko ngela-ekü noiau athalou-e titso lashan, tiautenai nung asam thaiutha akaosai jin tsak noi-e.

¹³Nungliko to, ngüso amthang nouso, ngüso ün asio kheam nouso, naiuso ngüso ün menyiu Ashera goa hethekü naiuso lomokü lüwanankiu.

¹⁴“Asamüh amao goa titso la-amkham, tiautenai Ngo, APAOU, nou, akhengshitsün titso jeitaiuao tsüshioji.

¹⁵Nung goumchi khaiunia nouso ko ngela-ekü noiau titso lashan, tiautenai tilai ngüsoüh ngüso goa amkhame, naiuso jahkü chaithio kiu-e, ngüsoüh asam ngüsoko ha-iao koja-e, naiuso ngüso goa nouso hau eheshiu chaithio kiutsün nouko asamhau heha-iao asam tü lilu-e.

¹⁶Asam thsosoüh nungso menyiu- thso tsamsigoh yang naito, ngüsoüh momo tsammongposo Ngü tü mong tsükiushikü kankü khuwane küta ngüso goa nouso amkhame.

¹⁷“Son nou shantsün goa nouso la-amkham.

¹⁸“Phoplao tsüthiokün themtsai sümai lükankei. Ngo asam tü thoiluttsünli phoplao tsüthiokün themtsai sümai Abib alei nouko chinyatnyi thaiutha lühe, tiautenai nung alei nouko asamüh Ijip goumchi lean.

¹⁹“Chongting chettsün melothso naiuso tsam thainian apong jühaoson noin.

²⁰Lüko asamüh chongting puntsün gado thso to onnemokthso tsak chaithio thiotsün tsangkü laokü tuhloshiao noin. Asamüh nung laokü tsütuhloshikü naito, nung ta asang nou lülothe. Chongting chettsün melothso to laokü atuhloshi. “Jükhako khaiunia tsaktso chaithio tsükankü lashi.

²¹“Asam thaiutha asam chhisiya chhi loau ajekhaiu louknyi noin. Lüko eiu ah tao tsüdekünai be-eiuyam taoko lüko chinyatnyi nouko to titso lachhisiya.

²²“Tilai asamüh chongting jihlo be-eiuyam yalou-e, be-eiuyam sümai nou lükankei, naiuso tilai asamüh pai-eiu ao-eiu kamshi-e nung auo tao nouko akamtaiutsün sümai lükankei.

²³“Pon tsak ko samjam asam khaiuniahoi apem APAOU Israel Goa Ngü amkham kiuao shiao noin.

²⁴Asam khako Ngo mele nouso komankütünphiai, naiuso asam goumchi losungkiukü tünphiai, nung Sümai süme taoko khaiunia sauüh asam goumchi komanao tsükowe-e.

²⁵“Tilai asamüh ngü tü thainian nou amkham kiu-e, phoplao thiokü shantsün themtsai lathio. Aasan Sümai nai loattsün thainian nyih titso nungthan ahom saokü lataiu.

²⁶“Pon pungkü asamüh yam- santsün chongting chonglam APAOU tsamai kankü ashi. “Anyao nouko wonthso tsüdekünai onnemokthso loatkü latheng.”

²⁷APAOU nou Mosa tü ngiom, “Nung ngio nouso satkü ataiu, tiautenai nung ngio nouso tü ngamkü Ngo niko naiuso Israel haiko athalou- e tsak shanji.”

²⁸Nungai Mosa APAOU nouko aopülenyi naiuso aopülesoh ti tsüheshiu kü noi. Apaüh lungkhio chiai Athalu-etsün Ngiokhem che nouso sat.

²⁹Tilai Mosa Sinai King ainou Ngiokhem che nouso kankü saom, apa khasinio da ajinka sunkü noiküla, tiautenai apa APAOU ko chitekü noiküla, lüko apaüh to nung tsünge.

³⁰Aron naiuso khaiuniahoi apemüh Mosa tü thapnai apa khasinio ajinka kü ngüso apa shimkü shiao hatkü noiküla.

³¹Lüko Mosaüh ngüso tü jonküta Aron naiuso ahoi pungkü nai aheihoi apem apa dongai khu, naiuso Mosaüh ngüso tü chitekü ngiom.

³²Nung phiai Israel khaiunia apem apa lemkü kamshin, naiuso Mosaüh ngüso hau APAOU nou apa hau Sinai King ai nai kiutsün ngiokhem nouso apem kium.

³³Tilai Mosaüh ngüso ko chitetsün khem, apaüh apa khasinio ne tsaküh loipok.

³⁴Titaoko Mosa Nejenkhio nai APAOU khako, Apa ko chiteau nappe, apaüh neloipok taiutsün lowankü noiküla. Tilai apa APAOU Nejenkhio ainou shishin, apaüh Israel khaiunia nouso hau apa tü thoiluttsün alum chite,

³⁵naiuso ngüsoüh apa khasinio ajinka sunkü ep. Apaüh nungthan taoko APAOU ko chiteao mokhukün lektso aloipoktsün ne nou apa kha loipokkü taiu.