Read Khiamniungan Naga Aniasan 35 Bible Online

Aniasan 35 - Khiamniungan Naga bible

Aniasan 35

¹Mosaüh Israel hai hoikam thum jonkam küta ngiom, “Nung samüh chhiao APAOU nou thoiluttsün noin:

²Asam hau chhisiya chhiloau ajekhaiu louknyi noin, lüko chinyatnyi nou to siokü taiuao noin. Nung Ngo APAOU nou tü losiokü taiutsün aalo ajekhaiu lethsangkü tsak noin. Khaiunia sauüh nung ajekhaiu nouko tso chhi-e apa to eaolu noin.

³Chinyatnyi nouko atsamkhaiu ai in lüko lajah.”

⁴Mosaüh Israelhai apem tü ngiom, “APAOU nou thoiluttsün nung noin:

⁵Asamüh APAOU dongai chaithio lükan. Khaiunia pungkü sauhaiüh chaithioau mongchioji nungso chaithio kankü ashi, chaiou lakkeng, tangkason, tsüdekünai taoson lung,

⁶ne amatchai nying nyingkü, asang- nya, anyakhaoleng, naiuso emok ewoi aseng, wonpon nou shantsün nepat;

⁷onnemok pon theng sengkü, nyihkhun amei nou, akacia pai nou,

⁸tson taiutsün inkhiam, atsomao laoshang naiuso anyaothing nyamkü jahtsün,

⁹Akhengting Meson phakhut naiuso kongwoi nou tü chiolut ao Karnalian, naiuso amao chaiou apiamai nouso lükan.

¹⁰“Asam ongko chhi montsün khaiunia apem shikü APAOU nou thoilut taiutsün chhisiya alum shanao noin.

¹¹Nejenkhio nou, naiuso nung tü koiai si atsai ai lojeitsün, ang nouso, naiuso athanya nouso, nung asiangjeitsün, naiuso kheam nouso, naiuso nung noiluttsünso,

¹²Athalu-e Paidan, nung pitsün, akap, naiuso alopoktsün nekhong;

¹³Puo nou naiuso athaloau ang nouso, Goa hau thiotsün themtsai naiuso jengtsaiu nouso apem,

¹⁴tson taiutsün naiuso nung shanao jengtsaiu nouso, inkhiam hakü tson nouso,

¹⁵angannyamtsün jah ao amthang naiuso nung tü thaloao ang nouso, atsomkiutsün khaiutsom, angannyam jahtsün, Nejenkhio nai naptsün ko akhong- jeitsün ne,

¹⁶taoson lung sunkü, athaloau ang potsün sunkü, naiuso nung shanao jengtsaiu nouso hakü, khiampengtsün chiokau naiuso nung noitaiutsün, ajahsün chaithio thioau amthang,

¹⁷akiaploau nou nekhongtsün, kheam naiuso anoilutao, amongai napao bekhan nouko nekhong,

¹⁸Nejenkhio thaiutha pai naiuso ao nouso, naiuso among nouso,

¹⁹naiuso tilai mesonhoi nou Asiothang nai yathsüo-e, nungai thaloau alosungtsün meson neshe sheitho nouso, naiuso meson Aron, naiuso apa thsoso thaiutha asio neshe shitho nouso.”

²⁰Israel hai apem Mosa dong ainou pungekü khu,

²¹Naiuso APAOU Nejenkhio shantsün thaiutha khaiunia pungkü sauhaiüh APAOU hau chaithio kiuao mongchiosan nungti kankü shin. Ngüsoüh amkham nai potsün alum kankü shin, naiuso meson yamai thetsünso neshe chaiou kankü shin.

²²Pohai naiuso nyiuhai chikü sauhaiüh mongchiosan, ngüsoüh ne tü aleng chioluttsün, nuodao nouso, khiapthso nouso, lak nouso, naiuso chaiou lakkeng apiamai alum in pungkü kankü shiküta APAOU tü losiolo.

²³Khaiunia pungkü sauhaiüh nying nyingkü ne ameiting asangnya, ashethop, tsüdekünai emok ewoi aseng, wonpon nou latsün nepat, onnemok pon thengsengkü tsüdekünai nyihkhun amei, kankü shin.

²⁴Akioau shiotsün apemüh tangkason tsüdekünai taoson lung APAOU hau ngüso chaithio hau kankü shin, naiuso sauhaiüh akacia pai taim, nungso chhisiya ajantso thaiutha po kü noinai kankü shin.

²⁵Menyiu waimon apemüh nying nyingkü ne ameiting ewoi naiuso asangnya ewoi ashethop, naiuso emok ewoi aseng ngüsoüh shan nou kankü shin.

²⁶Naiuso ngüsoüh won pon ewoi nou lüko shan.

²⁷Ahei hoi nou Karnalian naiuso amao haiüh phakhut naiuso kongwoi nou tü chiolutao chaiou apia mai nou kankü shin.

²⁸Naiuso laoshang si khaiutsom tson thaiutha, naiuso atsomkiu ao khaiutsom naiuso angannyam amei nyamao ajahtsün, ta kankü shin.

²⁹Mosa tü APAOU nou chhi chhiao thoiluttsün chhisiya thaiutha Israel khaiunia apem sauhaiüh ngüso chaithio APAOU dongai kankü shiao mongchio nungso kankü shin.

³⁰Mosaüh Israel hai tü ngiom, “APAOU nou Yihuda kaumong ainou Hur thsao nou Uri thso Bezalel chosaniu.

³¹Goa nou apa oukongüh apa meankiu-iu, naiuso apa hau jengtsaiu alum in amomo shan- santsün nai angelatsün, amontsün, chhi shiotsün kiu-iu,

³²alengyam amonting shanao naiuso, nungso chaiou lakkeng nai, tangkason nai, naiuso taoson lung shantsün nai,

³³naiuso anoilut ao thaiutha chaiou lung; naiuso pai chhiao, naiuso amao in amomo shantsün thaiutha kiu-iu.

³⁴APAOU nou apa hau naiuso Dan kaumong ainou Ahisamak thso Oholiab hau loüh amao hai hau ngüso amontsün tsandeshiao ashiotsün kiu-iu.

³⁵Asatluttsünso chhi, alengyamluttsünso chhi, ne amatchai lashantsünso chhi, asangnya leng nou, anyakhao leng nou, naiuso emok ewoi aseng, naiuso amao neshe shantsün nai in amomo shantsün chhi montsün kiu-iu. Ngüsoüh chhi naiuso alengyam in amomo yamlutkü chhiao shioji.”