Read Khiamniungan Naga Aniasan 38 Bible Online

Aniasan 38 - Khiamniungan Naga bible

Aniasan 38

¹Ajahtsün chaithio kiuao thaiutha apaüh akacia pai nou amthang tsak shan. Nung atheng nai phasab pungo, atham nai phasab pungo, naiuso atsok nai phasab süme ta shan.

²Apaüh atsok nai ano püle nouso athat shan, nungtiphe nungso amthang nou tsak haulu thekü iula. Nung chikü taoson lung nou nyingjei.

³Amthang nai hau jengtsaiu nungso shan: lak, chap, chio, akhojeitsün, naiuso inkaio kankeitsün jengtsaiu apem apaüh taoson lung nou shan.

⁴Apaüh taoson lung nou amthang kheiai taiuao shansan, nungüh amthang nou awemko thatso sungsaokü noiküla.

⁵Apaüh api kei ao ang püle shan küta aniokun püle nai nung lolut.

⁶Apaüh api keitsün pai püle nouso taoson lung nou nyingjeikü akacia pai nou shan,

⁷küta ano pungkü ang püle nai nung chinthio. Nung amthang nou akacia pai nousoüh shan küta akhan losat.

⁸Menyiu sauhai APAOU ün Nejenkhio bekhan ko yathsüokü noiküla, nungso ün sosaiu tsangkü apaüh taoson lung chiokaoh naiuso nung chio noitaiutsün shan.

⁹APAOU Nejenkhio thaiutha akhongjeiao apaüh amatchai ne amei tsak nou shan. Ajepekki nai khongjeitsün ne phasab tsom tsak,

¹⁰nung taoson lung kheam eknime nou noiluttsün chonsiang eknime naiuso kin nouso tangkason nou shan.

¹¹Ajenapki nai hau lüko akhongjeitsün to wekülu noiküla.

¹²Ajenap nai ne akhongjeitsün phasab aopungo laiukü kheam che naiuso nung noiluttsün che tangkason nou shantsün nung akhojei tsün naiuso kin nou noiküla.

¹³Ajepek nai anaptsün bekhan khongjeitsün phasab aopungo noi- küla.

¹⁴Akhongjeitsün ne bekhan pungkü nai phasab chekü pungo noiküla, nung kheam süme naiuso anoiluttsün süme noiküla.

¹⁶Apem lemkü khongjeitsün ne nouso amat- chai nou shankü noiküla.

¹⁷Kheam noilutao nouso taoson lung nou shan, naiuso kheam achiai kapjeitsün, akhiangjeitsün, naiuso kin nouso tangkason nou shan. Akhongjeitsün lemkü kheam nouso apem tangkason nou ta jippekü shan.

¹⁸Anaptsün bekhan khongjeitsün ne amatchai asangnya nou lakü, nyakhaokü, naiuso aseng emok ewoi jipon nou alengyam lolutkü shan. Nung akhongjeitsün ne nou atheng nai phasab eknime, naiuso atsok nai pungo ta noiküla.

¹⁹Nung taoson lung anoiluttsün püle nou kheam püle nouso tü mongkü noiküla. Nungso akhojeitsün, achi kiaptsün, naiuso kin nouso tangkason nou shan.

²⁰Nejenkhio thaiutha pai nouso naiuso kengchiai kiaptsün apem taoson lung nou shan.

²¹APAOU Nejenkhio shanao jengtsaiu ongko dun nungso noin: nungai Ngiokhem che nouso satlut nou lungkhio nime taiuküla. Nung dun nouso Mosa tsangkü ashanao ngiokhem kiu küta meson Aron thso Itamar ün ayamhan khemko Levi hoi nou chhisan.

²²Yihuda kaumong ainou Hur thsao, Uri thso nou Bezalelüh nung APAOU nou thoiluttsün alum shan.

²³Apa hachutsün, Dan kaumong ainou Ahisamak thso Oholiabüh asatluttsün, alengyamlutau, ne sangnya amatchai, nyakhaokü naiuso emok ewoi aseng shansantsün chhisiya nouso shan.

²⁴Asio Nejenkhio chaiou lakkeng apem tsoi heng tsak nou apin tsoithat tsangkü thatküta APAOU tü alosiotsün lokü taiu.

²⁵Tangkason nou khaiuniahoi vetao ling ainou apin tsoithat tsangkü 3, 430 tsoi thatsan.

²⁶Nung chiai khaiuniahoi vetao ling nai niansat taiutsün pungkü nou kiutsün vetao ling nai sattsün apem nouko wekü noiküla, nung apin tsoithat nai khakhakü that. Nungai achetpon eknime ngoitsün khaiunia haove 60, 3550 noiküla, naiuso nungso khengai nou pon lüko vethiohakü noiküla.

²⁷Asio Nejenkhio noilutao tangkason tsoi 3, 400 nou anoilutao tsom tsak shan, nung anoilutao pungkü naiuso ne khongjeiao thaiutha tangkason tsoi aosamkü püle lokü noiküla.

²⁸Tangkason apoi tsoi aosam nou Bezalelüh kin akhongjeitsün nouso kheam naiuso achiai sojeiao thaiutha shan.

²⁹APAOU tü losiokü taiutsün taoson lung nou apem nai tsoi 2, 425 noiküla.

³⁰Nung tsangkü apaüh APAOU noitsün Nejenkhio nai napao bekhan noiluttsün shan, amthang shanao jengtsaiu apem taoson lung nou lasankü shan.

³¹Amthang lemkü bekhan kiaplo nai noitsün naiuso anaptsün bekhan mongai kiaplotsün thaiutha naiuso Nejenkhio thaiutha pai nouso apem naiuso nung be kiaplotsün thaiutha noiküla.