Read Khiamniungan Naga Aniasan 39 Bible Online

Aniasan 39 - Khiamniungan Naga bible

Aniasan 39

¹APAOU nou Mosa tü thoiluttsünli, tilai mesonhoi nou shitho tholokü Asio Thang nai yathsüoe, nung thaiutha neshe ameiting nou ngüsoüh aleng asangnya nou, anyakhao nou, naiuso emok ewoi aseng nou shan. APAOU nou Mosa tü thoiluttsünli, ngüsoüh Aron thaiutha mesonhoi nou thetsün neshe shan.

²Meson asio sheitho nou chaiou lakkeng, asangnya leng, anyakhao leng, aseng leng, naiuso achioluttsün ne amatchai amei nou shan.

³Ngüsoüh chaiou lakkeng nou matchai matchaikü ahoi ahoi yangkü shan, naiuso nung sotsom saitsün nousoüh asangnya leng, naiuso nyakhaokü naiuso aleng aseng nou shanao thaiutha sonao iulakü nung tippek.

⁴Jenkü shingjeiao, ngüsoüh sang nai woi-itsün shan küta nungso athun nouso ai jipe.

⁵APAOU nou Mosa tü thoiluttsünli, nung nepat noulu shantsün omkhi ne amei nou lakü tsak hau theao phakhut nou tü jiplutkü shan.

⁶Karnelian chaiou lung shan, küta nungtü Israel thsoso nian chekü nime nouso thatü meikü lahlut, naiuso chaiou lakkeng noi taiutsün nai taiu.

⁷APAOU nou Mosa tü thoiluttsünli, ngüsoüh nung Israel mele chekü nime liko phakhut nou tü sang nai woilutkü the.

⁸Ngüsoüh kongwoi nou phakhut ne tsak noulu jipon khekkü nou chiolutkü shan.

⁹Nung atheng nai kom tsak, atham nai kom tsak, ta wewekü naiuso nene khapkü noiküla.

¹⁰Nung chiai ngüsoüh lung ahoi püle kelut: chongting ahoi nouko rubi lung, topaz lung, karnet lung;

¹¹aling nime nouko: emerald lung, safir lung, naiuso daimon lung,

¹²naiuso aling süme nouko: turquoise lung, agat lung, naiuso amethis lung,

¹³naiuso aling püle nouko: beril lung, karnelian lung, naiuso jasper lung, ta nungso noiluttsün chaiou lakkeng nou lemjeikü shan.

¹⁴Lung chekü nime pungkü tü Israel kau chekü nime nouso nian taiuao Yakob thsoso nian tsak tsak nung chiai satkü taiu.

¹⁵Kongwoi thaiutha ngüsoüh chaiou noulu sonkhiang chankü shankü taiu.

¹⁶Ngüsoüh chaiou lakkeng nime thsa-e naiuso chaiou lakkeng khiap nime ta thsa-e küta kongwoi halai athun nouso jipekü taiu.

¹⁷Chaiou lakkeng nime nou chaiou lakkeng khiap nime nou tü jenkü kelut.

¹⁸Naiuso sonkhiang nime thun nou chaiou nime thsa-etsün tü kelut, nungli ngüsoüh phakhut alaiu nou sang nai woi-ikü kha ai the.

¹⁹Chaiou khiap nime shanküta kongwoi asaothun nou tü jiplut. Phakhut alaiu nou ta thankü phakhut akhei thun nou tü jiplut.

²⁰Ajipetsün shimkü omkhi khengko, chaiou khiap nime shanküta nungso phakhut sangwoi nime kha ai nai asaothun nethun nou tü jiplut.

²¹Kongwoi nou omkhi nou ta yangjeiao naiuso pih ankü tsüiula ao APAOU nou Mosa tü thoiluttsünli, ngüsoüh sonkhiang asangnya tsak nou kongwoi ang nouso phakhut ang nouso tü thsane.

²²Phakhut khei ai thiotsün meson asio ne nou emok ewoi asangnya leng noulu shan.

²³Phakhut awim nouko tsüchipekkao thaiutha khaiu thiotsün thunko ewoi meikü uokü nou chioshi.

²⁴APAOU nou Mosa tü thoiluttsünli, phakhut thun lemkü ngüsoüh ashethop taopon amei naiuso asangnya leng nou, anyakhao leng nou, naiuso emok ewoi aseng nou chaiou nou lu langtsün la nouso phanlut.

²⁷Aron naiuso apa thsoso thaiutha phakhut nouso shan,

²⁸nungko khaiuke kandeo khep nouso, ashethop ne phakhut nouso,

²⁹chaiou lakkeng sangwoi ne ashethop nou shantsün, asangnya leng, anyakhao leng naiuso emok ewoi aseng nou jipon chioluttsün nou alengyam lolutkü, APAOU nou Mosa tü thoiluttsünli shan.

³⁰Ngüsoüh chaiou lakkeng nou lu thumkü kiutsün asio ii ao alengmei yamluttsün shan, küta nung chiai “APAOU tü thumkü kiutsün” ta nian langlut.

³¹APAOU nou Mosa tü thoiluttsünli, ngüsoüh khaiuke kha ai ao asangnya tsak nou jenkü kelut.

³²APAOU Nejenkhio chhisiya apem khemkü shin. APAOU nou Mosa tü thoiluttsünli lu, Israel haiüh chhi- siya alum chhikü shin.

³³Ngüsoüh APAOU noitsün Nejenkhio naiuso nung shantsün jengtsaiu apem Mosa dongai kankü shin, nungko nungso jengtsaiu nouso noiküla: akhojeitsün, kheam nouso, sonpe nouso, loüh akih ao kheam nouso, naiuso anoilutao nouso,

³⁴onnemokpon thengsengkü akejeitsün, akapjeitsün nyikhun amei, koukhan nai khongtsün ne,

³⁵Athalou-e Paidan nungko Ngio- khem lungkhio nouso hakü, nung pikeitsün pai nouso, naiuso nung kapjeitsün,

³⁶Puo naiuso nung jeng- tsaiu nouso, naiuso Goa hau kiutsün themtsai,

³⁷chaiou lakkeng noulu shantsün tson taiutsün, tson nouso, nung shantsün jengtsaiu nouso, naiuso tson nai thiotsün inkhiam nouso,

³⁸chaiou amthang, atsomkiutsün khaiutsom, angannyam jahtsün, Nejenkhio nai naptsün bekhan khongjeitsün,

³⁹taoson lung amthang naiuso taosonlung saitsün, nung pi keitsün pai nouso, naiuso nung shantsün jengtsaiu nouso,, chiokaoh asong naiuso nung noitaiutsün,

⁴⁰Koukhan nai khongjeitsün naiuso akiapjeitsün, naiuso phakhut alaiu nouso, Nejenkhio thaiutha pai nouso, Nejenkhio nai kankeiau jengtsaiu nouso apem,

⁴¹naiuso Asio Thang nai mesonhoi nou tholoau nou alengmei neshe nouso, Meson Aron thaiutha asio neshe, naiuso apa thsoso thaiutha.

⁴²APAOU nou Mosa tü thoiluttsünli, Israel haiüh chhisiya alum chhin.

⁴³Mosaüh nungso tü mongtsokü thap küta APAOU nou thoiluttsünli chhi apem ngüsoüh chhitsün apaüh epsan. Nungti Mosaüh nungso ouk kiu.