Read Khiamniungan Naga Aniasan 4 Bible Online

Aniasan 4 - Khiamniungan Naga bible

Aniasan 4

¹Nungai Mosaüh APAOU tü thalakü ngiom, “Lüko Israel thsosoüh ngü da tsümonglamkü naiuso ngo ti ngioji nungtü tsüanglu-e. Ni ngü tü tsangsheikü tsüsung ta ngüsoüh ngionai, naito ngo ti chhi-e?”

²Nungai APAOU nou apatü sangkü ngiom, “Ni ti semkü noin?” Apaüh thalan, “Pailai tsak.”

³APAOU nou ngiom, “Nung goh ai lüyaktaiu.” Tilai Mosaüh nung goh ai yaktaiu, nung pao tsak au iulan, naiuso apa nung ainou jingkü khuwan.

⁴Nungai APAOU nou Mosa tü ngiom, “Kaukü napküta nung ami nai thalokü atsonsan.” Nungti Mosaüh kaukü napküta nung tsonsan, naiuso nung müjam pailai au iulashin.

⁵APAOU nou ngiom, “Israel thsoso tü APAOU ngüso paosiposo Abraham, Isak, naiuso Yakob Goa nou ni tü atsangshei sungtsün mitha au nung lüchhi.”

⁶APAOU nou Mosa tü loüh ngiom, “Apha aphakhut khemai lütaiu.” Mosaüh angiotsün angkü chhin, küta apaüh apa pha tensan nai, nung chaikia nyinli thaiukü nou meankü noiküla.

⁷Nungai APAOU nou ngiom, “Apha loüh aphakhut khemai lütaiu shi.” Nungai apaüh angiotsün angkü chhin, naiuso apaüh nung tensanshi nai apa pha aya lilu meikü iula.

⁸APAOU nou ngiom, “Ngüsoüh ni tü tsümonglamkü naito, tsüdekünai aya athanga chhi nou tsüthasangkü naito, nungühlu ngüso thasange.

⁹Loüh nung athanga ii nime nou lüko ngüsoüh ni tü tsümonglamkü, naiuso loüh ni ti ngioji nung lüko tsülukü naito, Nail haiumong ainou khiam intso lülo küta nung goh ta lütsalut. Nung khiam nou she au iula-e.”

¹⁰Lüko Mosaüh ngiom, “Nyah, APAOU, ngü to lahong. Ngo tilaitso ngio meikü chitetsün tsak tsüde, tsüdekünai ni atsamki tü chitekütün phiai lüko ngo meikü chitetsün tsak tsüde. Ngo ngiosingio thsaothsaokü, naiuso yamlukü, naiuso henyikü noitsün tsak noin.”

¹¹APAOU nou apa tü ngiom, “Khaiunia hau apa sontham sauüh kiuji? Mainga tsüdekünai noukek nou sauüh shanji Sauüh apa hau epiji, tsüdekünai sauüh apa hau niopek shankiuji? Nung Ngo APAOU nou noin.

¹²Lo lükhu! Ngo ni singioau hachu-e, naiuso ni ti ngio-e ngo chite-e”.

¹³Lüko Mosaüh thalakü ngiom, “Nyah, APAOU, tsüojinyangkü amaohai tsak lühong.”

¹⁴Nung taoko nai APAOU Mosa tü mongmatkü ngiom, “Levi kau ko adei Aron tsünoi süne? Apaüh meikü chiteau monji ta ngo ngeji. Atsüoting apa lo niko pheteau shiji, naiuso apa niko eppe nai monglenge.

¹⁵Ni apa ko chiteküta apa tü ti ngio-e nung lüchite. Ngo aje nemthsoüh chiteau hachu-e, naiuso nemthso tü ti chhi-e nung chite-e.

¹⁶Apa athaiutha ko khaiuniahoi nou tü chitekiuau the-e. Nungai ni Goa li apaüh angio thonshi thonshikü noi-e.

¹⁷Nung Pailai niko lütaiu; tititenai nungüh ni ii nouso chhi-e.”

¹⁸Nungai Mosa apa kaio Jethro dongai laokü khukü apa tü ngiom, “Tsüojinyangkü ngü Ijip nai jü tsammongso dongai ngüso aa noi süne tsünoi ta thapau laokü akhu-i.” Jethro mongchiokü apa tü meikü lükhu ta ngiom.

¹⁹Mosa loüh Midian hai goh ai noinai, APAOU nou apa tü ngiom, “Ijip nai laokü lükhu, tititenai sauhaiüh ni loat au yamkü noiküla ngüso apem eaniu.”

²⁰Nungtiphe Mosaüh apa tsammongnyiu naiuso apa melothsoso, gado chiai noi-i, kü Goa nou apa tü ngiotsün Pailai lokü Ijip nai khuau tsammonghoiko tsalo.

²¹Loüh APAOU nou Mosa tü ngiom, “Loto ni Ijip nai laokü khuji, ngo ni hau kiutsün oukong athanga ii nouso nokpao khako chhikü hanau yangkü lüthe. Lüko ngo nokpao mong kongi-e, naiuso apaüh khaiuniahoi nou tsükhu-i-e.

²²Nungai ni apa hau nung lüchite, Ngo APAOU, nou ngioji, ‘Israel hai nung jüthso melothso yamchong nou noin.

²³Ngo ni tü jü khaiuniaso akhu-i ta ngioji, nungtiphe apaüh ngü tü amkhame, lüko ni tsümongchio. Loto ngo athso melothso yamchong nou loatane.’”

²⁴Ijip nai khutsün yamai nejen- khio lahkü noitsün athang tsak ko, APAOU nou Mosa ko phete, naiuso apa loatau kowekü noiküla.

²⁵Nungai Zipora, apa tsammongnyiuüh akih monkü noitsün lung tsak loküta, apa thso melothso tsashethun laman, küta nungüh Mosa hok nai than. Tsashethun tippantsün amkham kiu nou shioko nyiuhai nou Mosa tü ngiom, “She tsangkü chetsantsün tsammongpo ni noin.” Naiuso nungti APAOU nou Mosa aa poikiu.

²⁷Nung taoko APAOU nou Aron tü ngiom, “Mosa ko pheteau liutsa nai lükhu.” Nungai apa Mosa ko pheteau asio King nai khu, nungko apa Mosa ko phete, nungai apaüh Mosa tü son nai chep.

²⁸Nungai Mosaüh Aron hau apa tü Ijip nai laokü khuau ngiotsün naiuso APAOU nou apa tü ii athanga chhi nouso chhiau thoilut- tsünso alum chite.

²⁹Nungti Mosa naiuso Aron Ijip nai khuküta Israel thsoso aheihoi apem lokam.

³⁰Aronüh ngüso hau APAOU nou Mosa tü chitetsün alum chite, naiuso Mosaüh khaiuniahoi khako ii nouso chikü chhisankü han.

³¹Ngüsoüh monglam, naiuso tilai ngüsoüh APAOU nou ngüso dongai shikü ngüso tü khosakkü kankeitsün epiu ta lula, ngüso kaukü napkü APAOU tü amkham.