Read Khiamniungan Naga Aniasan 40 Bible Online

Aniasan 40 - Khiamniungan Naga bible

Aniasan 40

¹APAOU nou Mosa tü ngiom,

²“Chongting alei nouko chongting ajekhaiu nai ni APAOU noitsün Nejenkhio nou lüshan.

³Nung mongko Ngiokhim che nouso naptsün Athalou-e Paidan akhong jeitsün ne nou khongjeikü lütaiu.

⁴Naiuso ni puo nou kankü anap, küta puo nou chiai jengtsaiu nouso lingthakü ataiu. Naiuso tson taiutsün kankü napküta nung chiai tson nouso ataiu.

⁵Athalou-e Paidan khako angan nyam thaiutha jahtsün chaiou amthang nou ataiu, küta Nejenkhio nai naptsün bekhan khütha nai akhongjeitsün ne khongkü ataiu.

⁶Ajahtsün chaithio kiutsün amthang Nejenkhio khako ataiu.

⁷Atsaowan- tsün chiokaoh nou Nejenkhio si amthang jetko ataiu küta nung khiam nou meankü ataiu.

⁸Naiuso nung lemkü ni apejei, küta anaptsün bekhan nai akhongjeitsün ataiu.

⁹“Naiuso ni atsomkiutsün kankü shikü Nejenkhio naiuso nungko noitsün apem tü atsomkiu, nungüh nungko taiutsün jengtsaiu nouso apem siokü iula-i-e.”

¹⁰Nungthanko amthang naiuso nungtü suntsün apem tü atsomkiu, naiuso nung apem chiko siokü noi-e.

¹¹Naiuso atsao- wantsün chiokaoh ko hakü nung noiluttsün tü khaiutsom tsomkiu kü losiokü lütaiu.

¹²“Aron naiuso apa thsoso Nejenkhio bekhan nai nialokü shikü amkham saili khiam lüpeng ta ngüso tü lüngio.

¹³Ni Aron hau meson neshe shitho nouso lüthokiu, naiuso lütsomkiu, naiuso apaüh meson chhisiya nai ngü yathsüoao thaiutha apa lülosiokiu.

¹⁴Apa thsoso niakü shiküta ngüso hau phakhut nouso lüthokiu.

¹⁵Ngüsoüh ngü mesonhoili yathsüo au thaiutha, ngüso po tsomkiutsünli, ngüso lüko lütsomkiu. Nung atsomkiutsün nou ngüso ashiao atao apem thaiutha mesonhoi noi-e.”

¹⁶APAOU nou thoiluttsünlilu Mosaüh alum chhin.

¹⁷Nungtiphe ngüsoüh Ijip wankü khukü phiai nepon chongting alei nouko chong- ting ajekhaiu nai APAOU Nejenkhio noulahshan.

¹⁸Mosaüh anoilutao nou letaiu küta kheam nouso kisan, nungtü apejeitsün thiokü kisan.

¹⁹Apaüh Nejenkhio nou akhongjei- tsün ne nou sopek naiuso achi khongjeitsün nung achiai lolut, nung APAOU nou thoiluttsünli noiküla.

²⁰Küta apaüh lungkhio nime nou loküta nung Athalou-e Paidan nai thio. Apaüh Paidan tü ang lolut takiutsün nai apitsun pai nou chinthio, küta nung chiai akap nou kaplut.

²¹Nai apaüh Paidan nou Nejenkhio nai thio, küta akhongjeitsün ne khonglut. Nung APAOU nou thoiluttsünli apaüh Athalou-e Paidan ne nou pejeikü wan.

²²Apaüh nekhongjeitsün amongai taiukü ajenapki nai shinkü Nejenkhio nai puo nou lokthio,

²³küta APAOU nou thoiluttsünli lu APAOU hau kiutsün themtsai nung chiai taiu.

²⁴Apaüh puo nou thakü ajepekki nai shinkü Nejenkhio nai tson taiutsün nou lothio,

²⁵naiuso APAOU nou thoiluttsünli lu, apaüh APAOU noitsün nai tson nou suon.

²⁶Akhongjeitsün ne khako Nejen- khio nai apaüh chaiou amthang nou shankü thio.

²⁷Naiuso APAOU nou thoiluttsün lilu angannyam nyaothingkü nyamkü jahtsün athang nou lothio.

²⁸Apaüh akhongjeitsün ne Nejenkhio nai naptsün bekhan nai khonglut.

²⁹Küta akhongjeitsün ne khako apaüh ajahtsün chaithio kiuao amthang tsak shantaiu. APAOU nou thoiluttsünli lu apaüh nung chiai chihsikhiam chaithio nouso naiuso ajahtsün chaithio nouso kiukü amkham.

³⁰Apaüh atsaowantsün chiokaoh nou Nejenkhio si amthang jetko taiuküta nung khiam nou lomeankü wan.

³¹APAOU nou thoiluttsünli lu tilai ngüso Nejenkhio tsüdekünai amthang nai nape, Mosa, Aron, naiuso apa thsosoüh phasihok nouso nungko tsaowankü noiküla.

³²Tilai ngüso Nejenkhio tsüdekünai amthang nai APAOU nou thoiluttsünli nape,

³³Mosaüh Nejenkhio naiuso amthang lemkü pe nou pesan küta anaptsün bekhan khütha nai akhongjeitsün ne lolut naiuso nung pejei. Nungti apa chhisiya apem khem. APAOU Nejenkhio khütha nai Thengmia (Haove 9:15-23)

³⁴Nejenkhio nou thengmia nou loijei, naiuso APAOU ajinka nou Apa noitsün mean.

³⁵Nung shioko Mosa APAOU Nejenkhio nai napao tsüshiokü noiküla.

³⁶Tilai thengmia nou Nejenkhio loijeitsün leane, Israel haiüh ngüso saothang nou amao athang tsak ai li-eshikü noiküla.

³⁷Thengmia mokhuwankü noitsün lektso ngüso saothang ainou tsü soiankü noiküla.

³⁸Ngüso tsakeitsün atao apem nouko ngüsoüh APAOU Nejenkhio khütha nai anyi taoko thengmia ep naiuso asoh taoko nung thengmia chiai In nyai epkü noiküla.