Read Khiamniungan Naga Aniasan 5 Bible Online

Aniasan 5 - Khiamniungan Naga bible

Aniasan 5

¹Nungai Mosa naiuso Aron ne Ijip nokpao dongai khuküta ngiom, “APAOU, Israel Goa nou ngioji, ‘Liutsa nai ngüsoüh jü thaiutha sümai saoheau jü khaiuniaso akhu-i.’”

²Nokpao nou ngiom, “APAOU sau noin?” “Israel hai khu-iau tiauta ngo apa ngio ang-e? Ngo APAOU nou tsünge; naiuso ngo Israel tsü khu-i-e.”

³Mosa si Aron neüh thalakü ngiom, “Ibri hai Goa nou apa pim samko phete-iu. Sam Goa hau liutsa nai amkham kiuau ajekhaiu samnyi tsakeikü khuau ayam asopkiu. Samüh nung tsüchhikü naito, apaüh sam ehli tsüdekünai akiasiya nou loate.”

⁴Nokpao nou Mosa si Aron netü ngiom, “Khaiuniahoi chhisiya oulokia au thaiutha ajeüh ti chhi chhiji? Nung sua nouso chhi nai laokü lülolutshi!

⁵Asam khaiunia nouso Ijip haiko haove tekkü piakü iula-iu. Naiuso lo ajeüh chhisiya nou lolaoau aiuji!”

⁶Nung ajekhaiukolu nokpao nou Ijip hai sua niakeitsünso naiuso Israel hai chhisiya nai aheihoi tü ngiokhem kiukü ngiom,

⁷lung sai au khaiunia nouso hau tsokap kiutsün alaowan. Ngüso khukü meshen chija lüyamlo-i.

⁸Lüko lung tsaktso thsaokü tsüdekü loüh nung khako lilu lung nou haove nai athapungi. Ngüsoüh chhi saiukü mochhi, nung shioko ngüsoüh ngüso Goa tü amkham kiuau akhu-i ta tsülaokü sangkeiji!

⁹Nung khaiunia nouso hau chhisiya kongkü chhi-ikü ngüso tsükeng tingkü lütaiu nungailu ngüsoüh yaang tsandetsün tü ang-au atao tsünoi-e.

¹⁰Sua aheihoi naiuso Israel thsoso ataotumtsünso khuküta Israel thsoso tü ngiom, “Nokpao nou asam hau loto tsokap tsükiushi-e ta ngiom.

¹¹Tilüsongai nung eppe asam chija khukü lülo ta apaüh ngioji, lüko asamüh lung nou tsülothsaokü nung khako lilu ashan ta ngioji.”

¹²Nungtiphe khaiuniahoi nou Ijip thapekkü tsokap yam pengkü khu.

¹³Sua ahei nousoüh ngüso tü tsülaokü choikü ngüso tsokap kiutsün atao nai chhitsün lilu wekü lung nou ajekhaiu pungkü shani.

¹⁴Ijip hai sua aheihoi nousoüh Israel thsoso ataotumtsün hoi tü shiuh, nungso ngüsoüh chhisiya nai aheiau kiukü taiuküla. Ngüsoüh ngiom, “Asam khaiunia nousoüh nung khako nai chhitsün li lung haove wekülu theau shanji”.

¹⁵Nungai ataotumhoi nou Ijip nokpao dongai khukü mong tsümeikü nou ngio-iuji, “Ni tiau sam tü nung chhiji, Oh Asong?

¹⁶Sam hau tsokap tsükiu lüko losaokü sam tü lung shanau ngiokhem kiuji! Naiuso loüh sam shiuhatkü noin, nung akhaiuniaso aphio noin.”

¹⁷Nokpao nou thalakü ngiom, “Asam cholak naiuso asamüh chhi chhiau tsüaiu, küta nung shioko asamüh ngü tü APAOU tü amkham kiuau akhu-i ta sangji.

¹⁸Loto chhi nai tsalokü lükhu! Asam hau tsokap titso tsükiushi-e, lüko asamüh lung haove loüh wekülu shanau noin.”

¹⁹Ngüso tü lung haove wekülu ajekhaiu pungkü aya nai chhikü shitsün lilu ashanshi ta ngionai ngüso angja nai noi-e ta ataotumhoi nou ngela.

²⁰Ngüso khukü noitsün taoko ngüsoüh Mosa naiuso Aron ne sauhaiüh ngüso tü taiukü noiküla ngüne ko phete.

²¹Ngüsoüh Mosa naiuso Aron tü ngiom, “APAOU nou asamüh chhitsün epaniu, naiuso nokpao si apa khemko asonghoi sam chinyanitsün thaiutha asam hao angja kiu-e. Asamüh ngüsotü sam loatao awan kiuwaniu.”

²²Nungai Mosa APAOU dongai laokü khukü ngiom, “APAOU, ni akhaiuniaso tü tsümeikü kankei?

²³A thaiutha ko ngo nokpao dongai khukü chitetsün lektso, apaüh ngüso thangmangkü kankei. Naiuso ni ngüso hachuau titso tsüchhikiu!”