Read Khiamniungan Naga Aniasan 6 Bible Online

Aniasan 6 - Khiamniungan Naga bible

Aniasan 6

¹Nungai APAOU nou Mosa tü ngiom, “Lo ngo nokpao tü ti chhi-e nung ni eppe. Ngo jü khaiuniaso khu-iau apa tü thsüokü thoi-e. Atsüoting naito, ngo ngüso nokpao goumchi ainou tha-ankü komanau nokpao tü thsüokü thoi-e.”

²Goa nou Mosako chitekü ngiom, “Ngo APAOU noin.

³Ngo Abraham, Isak, naiuso Yakob dongai Akongting Goa tsakli sungh; Ngo jünian APAOU nou tsünge-ikü noiküla.

⁴Naiuso Kanan goumchi tiko ngüso sansaoli saokü noiküla, nung goumchi ngüso hau kiuau ngo ngüso ko athalu-e shaniu.

⁵Lo ngo Israel thsoso Ijip hai sua aküo nai noikü ngettsün lula-iu, naiuso ngo jü athalu-e yangsaniu.

⁶Nungtiphe Israel thsoso tü ngo ngioji ta lüngio, ‘Ngo APAOU noin; Ngo asam Ijip hai thsale ainou niasane, naiuso ngüso sua iulatsün aküo ainou asam kipsane, naiuso ngo jüpha oukongting nou loksankü mikhem asongting kankü shi-e, ngo asam kipsane.

⁷Ngo asam jü khaiunia au shane, naiuso ngo asam Goa the-e. Asam Ijip sua aküo ainou tilai ngo sokthame asamüh ngo APAOU asam Goa ta nge-e.

⁸Ngo Abraham, Isak, naiuso Yakob tü ngiomong thaloukü taiutsün goumchi nai ngo asam niakü shi-e; naiuso ngo nung goumchi asam hau atha goumchi au kiu-e, Ngo APAOU noin.’”

⁹Mosaüh nung ngio nou Israel thsoso hau chiten, lüko ngüsoüh apa tü tsüanglu, tiautenai ngüso onthso saokü sua akhosak aküo nou lotheankü noiküla.

¹⁰Nungai APAOU nou Mosa tü ngiom,

¹¹“Ijip nokpao dongai khukü apa tü Israel thsoso apa goumchi ainou khu-iaulu noin ta lüchite.”

¹²Lüko Mosaüh thalakü ngiom, “Israel thsosoüh lüko ngütü tsüanglu, nungaito nokpao nou anglu-e süne? Ngo ngiosingio tsü monchitetsün noin.”

¹³APAOU nou Mosa naiuso Aron tü thoilutkü ngiom, “Israel thsoso naiuso Ijip nokpao tü Israel thsoso Ijip ainou khuau Ngo ngiokhem kiuwaniu ta lüchite.”

¹⁴Yakob thso yamchong Reuben tü melothso püle chetlut: Ngüso-Hanok, Pallu, Hezron, naiuso Karmi, nungso paosiposo kau nian ngüso nianphi noin.

¹⁵Simeon tü melothso luok chetlut: ngüso-Jemuel, Jamin, Ohad, Jakin, Zohar, naiuso Shaul, (nungso Kanan nyiuhai tsangkü chetluttsün noin), -nungso paosiposo kau nian lüko ngüso kau nian lüko ngüso nianphi noin.

¹⁶Levi tü melothso süme chetlut: ngüso-Gershon, Kohat, naiuso Merari- ngüso paosiposo kau nian lüko ngüso nianphi noin. Levi aakihlaiu pon 137 kih.

¹⁷Gershon tü melothso nime chetlut: ngüne-Libni, naiuso Shimei, ngüso thsaosithsoso piakü noiküla.

¹⁸Kohat tü melothso püle chetlut: ngüso-Amram, Izhar, Hebron, naiuso Uzziel. Kohat aakihlaiu pon 133 kih.

¹⁹Merari tü melothso nime chetlut: ngüne-Mahli naiuso Mushi. Nungso Levi kau ngüso thsaosithsoso hakü noin.

²⁰Amramüh apa tsammongnyiu au apa po nio Jokebed lo, küta apa hau nung nyiuhai nou Aron naiuso Mosa chetlutkiu. Amram aakihlaiu pon 137 kih.

²¹Izhar tü melothso süme chetlut: ngüso-Kora, Nephek, naiuso Zikri.

²²Uzziel tü lüko melothso süme chetlut: ngüso- Mishael, Elzafan, naiuso Sitri.

²³Aronüh Nashon nio Aminadab menyiuthso Elisheba tsamsigoh yang; nung nyiuhai nou apa hau Nadab, Abihu, Eleazar, naiuso Ithamar chetkiu.

²⁴Kora tü melothso süme chetlut: ngüso-Asir, Elkana, naiuso Abiasap, nungso Kora kau janpektsün paosipo noiküla.

²⁵Mosa thso Eleazarüh Putiel menyiuthsoso ong ainou tsak tsamsigoh yang, nung nyiuhai nou Phinihas chetkiu. Nung Levi mele nai naiuso kau nouso ai ahei noiküla.

²⁶“Israel meleso Ijip ainou aniasan” ta APAOU nou ngiokü shitsün khaiunia Aron naiuso Mosa noiküla.

²⁷Ijip nokpao tü Israel thsoso ajashi ta chitetsün khaiuniahoi ngüso noiküla.

²⁸Tilai Mosa tü APAOU nou Ijip goumchi ko chitekü noiküla,

²⁹apaüh ngiom, “Ngo APAOU nou. Ngo ni tü ngiotsün Ijip nokpao hau lüchite.”

³⁰Lüko Mosaüh thalakü ngiom, “Ngo ngio tsümon chitetsün ta ni ngeji; nokpao nou titi thekü ngü tü anglu-e?”