Read Khiamniungan Naga Aniasan 7 Bible Online

Aniasan 7 - Khiamniungan Naga bible

Aniasan 7

¹APAOU nou ngiom, “Ngo ni nokpao khako Goali shane, naiuso adei Aronüh apa ko ni ün E-po li chite-e.

²Ngo ni tü thoiluttsün Aron hau alum lüchite, naiuso apaüh Israel thsoso nokpao goumchi wankü khuau nokpao tü ngio-e.

³Lüko ngo nokpao mong kongkü iula-i-e, Ijip nai ngo titi thatso ahat au chhisiya chhi lüko apaüh ngü tü tsüanglu-e. Nungai ngo Ijip khako alohat thsüokü kiu-e küta jü khaiuniaso nung goumchi ainou niasane.

⁵Tilai ngo jüpha ngüso thako loksankü Israel thsoso ngüso goumchi ainou niasane, Ijip haiüh nungko Ngo APAOU ta nge-e.”

⁶Mosa naiuso Aron neüh ngüne tü APAOU nou ti thoilut nung chhin.

⁷Ngüne nokpao ko chitetsün taoko Mosa achet pon 80, naiuso Aron pon 83 noiküla.

⁸APAOU nou Mosa naiuso Aron tü ngiom,

⁹“Nokpao nou asam tü athanga ii chhisiya tsak tsangkü mitha akiu ta saonai, Aron tü apa Pailai louküta nokpao khako lüyaktaiu ta lüngio, küta nung pao au iula-e.”

¹⁰Nungtiphe Mosa naiuso Aron ne nokpao dongai khukü APAOU nou thoiluttsünli chhin. Aronüh apa Pailai nokpao naiuso apa khemko noitsün asonghoi khako yakthio, naiuso nung pao tsak hau iulakü noiküla.

¹¹Nungai nokpao nou apa ün angehoi naiuso athanga chhitsünso jonshi, naiuso ngüso athanga chhi tsangkü ngüsoüh lüko nung khekkülu chhishin.

¹²Ngüso pailai nouso goh ai yakthio, naiuso nung pailai nouso pao au iula. Lüko Aron ün Pailaiüh nungso paohoi nouso miolikü he-an.

¹³APAOU nou Ijip hai nokpaoüh Mosa naiuso Aron tü tsüange ta ngiotsünli, nokpao tsülaokü mong kongkü iula.

¹⁴Nungai APAOU nou Mosa tü ngiom, “Nokpao nou thatü mong kong naiuso jü khaiuniaso khu-iau nanji.

¹⁵Nungtiphe tilai ahom apa Nail haiu ai sao-e nungko khukü apa ko lüphete. Ni Pao au iulatsün Pailai lülo, küta apa tü haiukok nai taiukü lünoi.

¹⁶Nungai nokpao tü lüngio, ‘APAOU, Ibri hai Goa nou, Apa khaiuniaso liutsa nai Apa amkhamau akhu-i ta ni tü chiteau ngü hong. Lüko lo saokü ni tsüanglo.

¹⁷Lo, Oh Asong, apaüh ti chhi-e, nung tsangkü apa sau noin ta ni epsane ta APAOU nou ngioji. Athaplu, ngo nung Pailai nou haiumong nai khiam nou tü shiuh-e, naiuso khiam nou she au iula-e.

¹⁸Ngou nouso eane, naiuso Ijip haiüh nung haiu ainou ashiu au tsüshiokü thatü thsüokü angonyam nyame.’”

¹⁹APAOU nou Mosa tü ngiom, “Aron tü apa Pailai lokü Ijip nai haiu nouso, khiamyam nouso, naiuso temkhao nouso khütha nai aloksan ta lüngio. Khiam nou she iula-e, naiuso Ijip goumchi apem nai she nou paijio nouso naiuso lunglak nouso meankü noi-e.”

²⁰Nungai Mosa naiuso Aronüh APAOU nou thoiluttsünli chhin. Nokpao naiuso apa khemko noitsün asonghoi khako, Aronüh apa Pailai loksankü ta haiu nai khiam tü shiuh, naiuso nungko noitsün khiam nouso she au iula.

²¹Nung haiu ko noitsün ngou apem ean, naiuso nung thsüokü angonyamphe Ijip haiüh nung ainou khiam shiuau tsüshio, Ijip goumchi apem ai she noiküla.

²²Nungai nokpao ün athanga chhitsünsoüh lüko ngüso athanga chhisiya tsangkü nung khekkülu shanshin, naiuso nokpao nou nung khako naililu mong kongkü iula. APAOU nou Aron si Mosa netü ngiotsün ngio tsüangkü noiküla.

²³Nungti nokpao nou angluao mong tsükiukü meshen tsamai laokü khuwan.

²⁴Ijip hai apem nou ashiu khiam au haiukok thathunkü temkhao thaiukü noiküla, tiautenai ngüsoüh haiu ainou saitha lokü khiam khaiushiu au tsüthameikü iula.

²⁵APAOU nou haiu nou tü shiuhkütün phiai ajekhaiu chinyatnyi yanlükhun.