Read Khiamniungan Naga Aniasan 8 Bible Online

Aniasan 8 - Khiamniungan Naga bible

Aniasan 8

¹Nungai APAOU nou Mosa tü ngiom, “Nokpao dongai khuküta APAOU nou ‘Ngo amkhamau jü khaiuniaso akhu-i, ta ngiotsün lüchite.

²Ni nung tsükhu-ikü naito, ngo agoumchi lükiu nou tsappokkü sungitsün tsangkü angja kiu-e.

³Nail haiumong lükiu nou meane, nungso nung ainou akamai shi-e, atsampai ai shi-e, athen ai shi-e, akhemko noitsün asonghoi tsamai naiuso akhaiuniaso naiuso chihtheng paidan mongai meankü noi-e.

⁴Nungsoh nitü naiuso akhaiuniaso tü naiuso akhemko noitsün asonghoi tü hamlute.’”

⁵APAOU nou Mosa tü ngiom, “Aron tü apa Pailai haiu nouso, khiam yam nouso, naiuso temkhao nouso khütha nai loksanküta Ijip goumchi thapokkü naiuso meankü lükiu nouso asungi ta lüngio.”

⁶Nungtiphe Aronüh khiam nouso khütha nai pha loksan, naiuso lükiu nouso shikü goumchi nou meanan.

⁷Lüko athanga chhitsünsoüh lüko ngüso athanga chhi oukong kankeikü, ngüsoüh lüko lükiu nouso goumchi nai sungi.

⁸Nokpao nou Mosa naiuso Aron jonkü ngiom, 2 “Nung lükiu nouso kankü khuwanau APAOU tü misao lüsao, naiuso ngo akhaiuniaso khu-i-e, nungailu ngüsoüh amkham chaithio APAOU hau kiu au shio-e.”

⁹Mosaüh thalakü ngiom, “Ngo athaiuthako misao saokiuau monglinge. Ngo ti taoko athaiutha, akhemko noitsünso thaiutha misao lokiu-iau yangji atao nou thatsankü ataiu. Nungaito lükiu nouso ni ainou khuwane, naiuso Nail haiumongai noitsün lükiu tü simkü amao ti tsüpoi taiushi-e.”

¹⁰Nokpao nou thalakü ngiom, “Jü thaiutha lühom misao asaokiu.” Mosaüh ngiom, “Ni sangtsünli ngo chhi-e, küta nung phiai ni sam Goa, APAOU li amao goa tsünoi ta nge-e.

¹¹Ni naiuso akhemko noitsün asonghoi, naiuso akhaiuniaso ainou lükiu nou thawane, naiuso Nail haiumong nai noitsün tü simkü amao ti tsüpoitaiushi-e.”

¹²Nungai Mosa si Aron neüh nokpao wankü khukü ta, Mosaüh nokpao dongai lükiu shitsün nung alowankiu ta APAOU tü misao sao.

¹³APAOU nou Mosaüh sangtsünli chhikiu naiuso tsamai noitsün, nokpao kengko noitsün naiuso tsamei nai noitsün lükiu nouso ean.

¹⁴Ijip haiüh lükiu mea nou gohchoi nyam monyamkün lektso nung lokamkü wan.

¹⁵Tilai nokpao nou nung lükiu nouso ean nou ep, apaüh Mosa si Aron ne ngio tsüangkü noi-e ta ngiotsünli apa mong loüh kongkü iulashi.

¹⁶APAOU nou Mosa tü ngiom, “Aron tü apa Pailaiüh goh nai lüshiuh ta lüngio, nungai Ijip goumchi apem nai pukhao nung chinyih nyaithso au iula-e.”

¹⁷Nungti Aronüh apa Pailaiüh goh noutü shiuh, naiuso pukhao chikü Ijip goumchi ko chinyih nyaithso au iula, nungüh khaiunia naiuso thainian apem meankü iula.

¹⁸Nokpao khemko athanga ii chhi hantsünsoüh ngüso athanga tsangkü nung chinyih nyaithso sungiau kowe, lüko asungiau tsüshio. Nungai alumai chinyih nyaithso noiküla,

¹⁹naiuso athanga ii chhitsünsoüh nokpao tü ngiom, “Nung Goa nou chhin!” APAOU nou Mosa si Aron netü Ijip hai nokpao nou angio tsüange ta ngiotaiutsünli nokpao mong kongkü iula.

²⁰APAOU nou Mosa tü ngiom, “Lühom ahom beta khukü nokpao ko apa haiumongai saotsün taoko lüphete, naiuso apa tü ‘APAOU nou jü khaiuniaso ngü hau amkham kiuau akhu-i ta ngiom ta lüchite.

²¹Ni nung tsükhu-i naito, akhemko noitsün asonghoiso, naiuso akhaiuniaso khako chinyi nou honglutkü asam angja kiuau ngo lotsüoji. Ijip hai tsamkhaiu apem chinyi nou meane, naiuso nungsoüh goh nou thapokkü tsappokkü noi-e.

²²Lüko ngo jü khaiuniaso kihtsün Goshen khiam- khan poikiu-e, nungai chinyi nou tsünoi-e. Ngo nung chhisiya, Ngo APAOU, nou nung goumchi nai chhi nou chhiji ta ni ngeau thaiutha chhi-e.

²³Ngo jü khaiunia si akhaiunia jetko ajet tsak shane. Nung athanga ii nou lühom thawao-e.’”

²⁴APAOU nou chinyihoi asong tsak nokpao keng nai naiuso apa khemko noitsün asonghoi tsam nouso ai hong. Ijip goumchi apem nai chinyi tsangkü alotheantsün kankü shin.

²⁵Nungai nokpao nou Mosa si Aron netü jonkü ngiom, “Nungai nung goumchi mongkolu khukü asam Goa tü chaithio amkham lükiu.”

²⁶Mosaüh thalakü ngiom, “Nungti chhiau to athang tsünoi, tiautenai sam Goa hau samüh thainian loatkü amkham kiunai sam amkham tsangkü Ijip hai mongkia-e. Samüh thainian loatkü kankeitsün tsangkü Ijip hai mongmatnai, naiuso ngüsoüh eplanai, ngüsoüh sam lung nou tha atkü yakkate.

²⁷Apaüh sam tü thoiluttsünli, samüh sam Goa, APAOU tü amkham kiuau sam ajekhaiu samnyi khukü chhiau noin.”

²⁸Nokpao nou ngiom, “Asam laiukü tsükhukü naito, ngo liutsa nai asam Goa APAOU tü amkham kiuau khu-i-e. Jü thaiutha misao asaokiu.”

²⁹Mosaüh thalakü ngiom, “Ngo khukü thunkü akhaiuniaso, naiuso akhemko noitsün asonghoiso, naiuso niko noitsün chinyi nou lühom khuwanau APAOU tü misao sao-e. Lüko ni sam khaiuniahoi APAOU tü amkham kiuau khutsün ainou kiapkü müjam tsüsapthio kiuau noin.”

³⁰Mosaüh nokpao wankü khuküta APAOU tü misao sao,

³¹nai Mosaüh sangtsünli APAOU nou chhikiu. Chinyi tsak lüko tsüpoishikü, khaiuniahoi, naiuso nokpao khemko noitsün asonghoi si nokpao wankü khuwan.

³²Nung taokoüh nokpao mong kongkü iula, küta loüh apaüh khaiuniahoi nou tsükhu-i.