Read Khiamniungan Naga Aniasan 9 Bible Online

Aniasan 9 - Khiamniungan Naga bible

Aniasan 9

¹APAOU nou Mosa tü ngiom, “Khukü nokpao tü APAOU, Ibri hai Goa nou ‘Ngütü amkham kiuau jü khaiuniaso akhu-i ta ngioji ta lüchite.’

²Ni loüh ngüso tsükhu-ikü nan naito,

³Ngo athainianso, amokthsoso, agadoso, ut nouso, a onnemokso, naiuso a wonso imkia thsüokü tsak hongtsün tsangkü ean-i-e.

⁴Ngo Israel thsoso thainian naiuso Ijip hai thainian jetko ajet shane, küta Israel hai thainian tsü e-ha-e.

⁵Ngo APAOU, nou nung chhiau lühom ajekhaiu chosaniu.”

⁶Nungthan ajekhaiu nai APAOU nou apaüh ngiotsünli chhin, naiuso Ijip hai thainian apem ean, lüko Israel thsoso thainian to tsaktso tsü e-ha.

⁷Nokpao nou ti shithawao ta sangnai, Israel thsoso thainian tsaktso tsü e ta chiten. Lüko apa mong kongkü iula, naiuso khaiuniahoi akhu-iau tsükiu.

⁸Nai APAOU nou Mosa si Aron netü ngiom, “Aukhan ainou luo phalam tsak lülou, küta nung lokü Mosaüh nokpao khako ahsheih nai sokpeng.

⁹Nung Ijip goumchi apem nai pukhaoli pengkü khu, küta apemai nungüh khaiuniahoi si thainianhoi da chaikia mou sung-i.”

¹⁰Nungti ngüso pu nou semkü nokpao khako tsaküta Mosaüh koi ai suksan, küta nungso chaikia sungkü khaiuniahoi naiuso thainianhoi da mou songkü satkü iula.

¹¹Athanga ii hantsünso Mosa khako tsa au tsüshiokü noiküla, tiautenai ngüso tü lüko Ijip hai amao nouso tü lilu pem nai chaikia nou meankü noiküla.

¹²Lüko nokpao nou Mosa naiuso Aron netü tsü-ange ta APAOU nou ngiotsünli, APAOU nou nokpao mong kongkü iula-i.

¹³Naiuso APAOU nou Mosa tü ngiom, “Ngo amkhamau jü khaiuniaso akhu-i ta ‘Ibri hai Goa, APAOU nou ngioji ta lühom ahom beta nokpao ko phetekü apa hau lüchite.

¹⁴Lo tao naito ngo akhemko noitsün asonghoi naiuso akhaiuniasolu tsüdekü, ni apim lüko hakü angja-i-e. Nungtiphe goumchi apem nai Ngo li tsaktso tsünoi ta ni nge-e.

¹⁵Ngo jüpha loksankü ni naiuso akhaiuniaso tü akia nou thiotünto ni moisemkü lomowanau noiküla.

¹⁶Lüko jüniansong goumchi apem meankü khu-iau thaiutha naiuso jü oukong hanau thaiutha Ngo ni aa noi-in.

¹⁷Lüko lo saokü ni mong kongkü jü khaiuniaso khu-iau nanji.

¹⁸Ijip hai ngiolat nai tilaitso tsüngedekün lühom Ngo nung tao nouko San nou thsüokü lethsangkü sao-i-e.

¹⁹Lo athainianso naiuso kengpun nai noitsün alum sojeikü taiuau ngiokhem lükiu. Kengpun nai tsüsojeikü taiutsün thainianhoi naiuso khaiuniahoi chiai San nou saolute, küta nungso eane.’”

²⁰Nokpao khemko noitsün asonghoi ajantso to hat, tiautenai APAOU nou ngiom, küta ngüsoüh thainianhoi si suahoi tsamkhemai asoloau kankü shin.

²¹Amaohaiüh APAOU nou lotsüokiutsün tü mong tsükiukü ngüso sua hoi naiuso thainianhoi kengpun nai wanan.

²²Nungai APAOU nou Mosa tü ngiom, “Maou dongai apha aloksan, nungai khaiuniahoi naiuso thainianhoi naiuso kengai noitsün khenglio nouso apem chiai Ijip goumchi apemai San nou saom.”

²³Nungtiphe Mosaüh apa Pailai maou dongai loksan, nungai APAOU nou ahmok naiuso San nou sao-in, naiuso ahsalap nou goh nou ta than. APAOU nou San lethsangkü,

²⁴naiuso ahsalap asongh asao ko hakü hong. Nung Ijip hai ngiolat nai tilaitso tsüshithawaotsün tsümeitengkün San sao ahthe tsak noiküla.

²⁵Ijip goumchi apem nai khaiunia naiuso thainianhoi saokü San sao nou alum lothean. Nung San sao nou goh nai paisam aosam apem chinthiowan naiuso pai apem thapekkü lothean.

²⁶Israel thsoso kihtsün Goshen khiamkhanlu San tsüsaokün athang noiküla.

²⁷Nokpao nou Mosa naiuso Aron netü jonkü ngiom, “Nung taoko ngo angei sunlo-iu; APAOU to ayamtha nai noin, naiuso jü khaiuniaso si ngo ayam tsüthakünai noin.

²⁸APAOU tü misao asao! Sam tü nung ahmok naiuso San nou saiuwaniu! Ngo asam khu-iau thalouji; loto asam nungai tsünoishi-e.”

²⁹Mosaüh apa tü ngiom, “Ngo noknio ainou khutsün ko aikü, ngo APAOU tü jüpha nemthso misao nai loksane, Ahmok nou laowane, naiuso San nou loto tsüsaoshi-e, nungtiphe ni nung goumchi APAOU ün ta nge-e.

³⁰Lüko ni naiuso akhemko noitsün asonghoi nouso loüh APAOU Goa lün tsühat ta ngo ngeji.”

³¹Ewoi anilangau shantsün pai naiuso jinyak nouso lothean, tiautenai jinyak nou nyankü noiküla, naiuso ewoi pai nou apun tao noiküla.

³²Lüko mülam to tsülothe, tiautenai nungto phikü nyankü noiküla.

³³Mosaüh nokpao wankü noknio ainou bechiai khu, küta misao nai APAOU tü apa pha loksan. Nungai Ahmok, San sao, naiuso ah ou chikü laowan.

³⁴Tilai nokpao nou ti in thawaokü noiküla nung ep, apaüh loüh angei sunhe. Apa naiuso apa khemko noitsün asonghoi ayanan taoko lilu mong kongkü iula,

³⁵naiuso Mosa tü APAOU nou ngiotaiutsün nung nokpao nou Israel thsoso akhuau tsükiu-e ta ngiotsün thakü noiküla.