Read Khiamniungan Naga Yob 1 Bible Online

Yob 1 - Khiamniungan Naga bible

Yob 1

¹Uz hai goumchi ai Goa da monglamkü amkhamtsün khaiunia tsak Yob ta niankü noiküla. Apa nung amei naiuso asangling chhi- siyatsün khaiunia amei tsak kihküla.

²Apa thsoso melothso chinyat naiuso menyiuthso süme

³naiuso apaüh onnemok heng chinyat, ut heng süme, jangtso tsom püngo, naiuso gado tsom püngo, taiuküla. Apaüh ayathsüotsünhoi haove piakü taiu naiuso Ajepek nai memei poteng tsak noiküla.

⁴Yob thsosoüh ngüso tsamkhaiu pungkü nou amaohai lüko apem ha- iau sümai thaiulingkü shan, naiuso ngüsoüh ngüso nio menyiuthso süme nouso ngüsoko asaita jonhakü noi- küla.

⁵Sümai pungkü than nyapnai, Yob ahom beta chukü apa thsoso losioau ngüso pungkü thaiutha Goa hau aloat chaithio nouso kiukü noi- küla. Apaüh nung asaita chhikü noi tiautenai apa thsoso ongko tsaküh lüko tsüngeankü Goa lochitsün tsangkü angei sunhe-iu sao ta apaüh yang.

⁶Nyitso Goa ün thsoso tilai APAOU khako kamshin, Biya nou lüko ngüso ongko shihan.

⁷APAOU nou apatü sangkü ngiom, “Ni ti ainou shin?” Biya nou thalan, “Goumchi nai akhu ashi naiuso asung asao ta tsakeitsün ainou shin.”

⁸APAOU nou sangkü ngiom, “Ni jütsamki Yob ngesan mo?” “Goumchi ko apalu mein naiuso amongtsam- tsün amaohai tsaktso tsünoi. Apaüh ngo amkhamji naiuso tsümeikün tsüchhisiyaau tsaloukü noin.”

⁹Biya nou thalakü ngiom, “Apaüh nungko nou ti tsüepkünai Yobüh, ni amkham-e süne?

¹⁰Ni apa tsam- khaiu naiuso apaüh taiutsün alum kipsankü taium. Apaüh chhisiyatsün alum nai oukkiuji, naiuso ni apa hau goumchi athum thameankü jangtso saiukü kiutaium.

¹¹Lüko lo apaüh taiutsün alum ni kankü khuwan nai-apaüh akhako ni athesan kiu-e!”

¹²APAOU nou Biya tü ngiom, “Apem me-in,” “apaüh taiutsün alum a-ou- kong khemko noin, lüko ni Yob pem tsütawaikiu-au noin.” Nungtiphe Biya nou APAOU ainou pungekü khu.

¹³Nyitso Yob thsoso ngüso dei yamchongting nou tsamai sümai kamkü noiküla,

¹⁴nungai ngiongem kantsün tsak Yob dongai jingkü shikü ngiom, “Samüh jangtso nouso hakü eiu ah-kü noiküla, naiuso gado nouso thsanyan nouso shimkü noiküla.

¹⁵Alekta Sabea hai shipokü nungso chikü kaulokü khuwan. Ngüsoüh ngolu poitaiukü atsamkiso apem loatkü waniu. Ni hau chiteau thakhutsün ngo linlin noin.”

¹⁶Apaüh nung ngio chite mothathonkün khako, amao tsamki tsak shikü ngiom, “Ahsalap nou onnemok hoi naiuso onnemok jimhoi ta shiuh naiuso ngüso chikü loataniu. Ni hau chiteau thakhutsün ngo linlin noin.”

¹⁷Apaüh nung ngio chite mothathonkün khako tsamki tsak shikü ngiom, “Kaldia hai hoi süme hau thekü sam tü shipou, küta ngolu poitaiukü atsamkiso chikü loatkü wan naiuso ut nouso chikü kankü khuwaniu.”

¹⁸Apaüh nung ngio chite mothathonkün khako amao tsamki tsak shikü ngiom, “Athsoso thsoyamchong nou tsamai sümai saohekü noiküla,

¹⁹naiuso liutsa ainou ahthe ahsheih tsak shin. Nungüh tsam nou thioloian naiuso ngüso chikü loataniu. Ni hau chiteau thakhutsün ngo linlin poisankü noin.”

²⁰Nungai Yob tsakü chuküta amongsaiu nai apa neshe chipekkan. Apaüh apa khaiu iuwan naiuso apa kha goh ai thaokü nap.

²¹Apaüh ngiom, “Ngo titso kankü tsüchet, naiuso ngo tsosa eane. APAOU nou kium, naiuso lo apaüh kankü khuwaniu. Apa nianlom lüthe!”

²²Nung alum thawaokü shilüko, Yobüh Goa lochikü angei tsüsun- lou.