Read Khiamniungan Naga Yob 10 Bible Online

Yob 10 - Khiamniungan Naga bible

Yob 10

¹Ngo aakih nou thathsüluwa- niu. Jü akhosak namnamtü anglu.

²Aphio nai ngo lataiu, Goa. Ngo ti aphio noin? Ngo hau achite!

³Ni apemüh shantaiutsün lochilotsao au, Ni nungti khosakkü hau ni ayam thakü noin süne? Naiuso loüh akausai nouso mongyang nai monglengau ayam süne?

⁴Aakihlaiu sam aakihlaiu khekkü süne?

⁵Sam aakih lüko letkü süne?

⁶Nungaito jü angei nousotü hoilutkü jü aphio nouso chikü thaloutsün nung tiau?

⁷Ngo aphio tsünoi naiuso apha mong ainou ngo kipsanau sau tsünoi ta ni ngeji.

⁸Apaüh ngo shankü khemkiu, naiuso lo nung apha noulu ngo lotheji.

⁹Ni ngo puja ainou shan ta ayangshi; loüh ni ngo pukhaoli noipekshi-e süne?

¹⁰Ngo nyimsanau jüpo hau ni oukong kium; jü nyiu thaimongai ni ngo sungjikan-in.

¹¹Ni jünyih ou nouso ko mongkü yaplutkiu naiuso nung ou nouso tsah naiuso khun nousoüh lopok kium.

¹²Ni ngo hau aa nou naiuso asai atsüojin kium, naiuso ni apaotsang nou ngo aa taiukiu.

¹³Lüko nung atao chikü ni ngo tawaiau akauai ayangtaiu noiküla ta ngü lo ngeji.

¹⁴Ni awankiutsün nannanau ngü angei sun naito ta thapkü ni jiokü noiküla.

¹⁵Ngü angei sunhe si sunhe, ngo niko atsonjek nai noiküla, lüko tilai ngo thakü chhiji, ngo ti amai tsüepji. Ngo akuothe naiuso amiam nou meankü noin.

¹⁶Ngo tso tsak ashioloutsün noi naito, ni ngo chongkhao tsak khekkü homatji; ngo tawaiau to ni ii athanga chhisiya lüko chhiji.

¹⁷Ni jü thako asaita mitha ajantso taiuji; jü thako ni mongmattsün asonglu sungji; ni asaita ngo tü poshiau ayam ajantso yangkü noiji.

¹⁸Goa, ni ngo tiau chetsanha-in? Khaiunia sauüh ngo mo-epkün khako ngo ean-iau noiküla.

¹⁹Thaimong ainou etamkhan nai saitha khutsün likoto tilaitso tsükihatengkü noiaubao chenela.

²⁰Jü aakihlaiu yankü khuwanji tsüdeso? Ngo pemsa awanan! Ngü poitaiu nou ataoko ngo amongling-i.

²¹Ngo liukü khuwanji naiuso tilaitso laokü tsüshi shi-e- anyakhem naiuso amaosang goumchi tsakai khuwanji.

²²Tiai awon pem nou lüko anyakhem noin, nung anyakhem, ah-khemsoh, naiuso apülaitsün goumchi tsakai khuwanji. Zofar: