Read Khiamniungan Naga Yob 11 Bible Online

Yob 11 - Khiamniungan Naga bible

Yob 11

¹Nung ayang tsünapkün ngio nousotü sauüh tsüthashi-e süne? Ngio piakü chitetsün nou khaiunia tsak apen eppe süne?

³Yob, samüh nitü thalaau tsüshio-e ta yangji süne? Ni nou alochi ngio nousoüh sam ngio chiteau tsünoikü wanane ta yangji süne?

⁴Ni ti ngioji nung ngiotsüo ta ni ngioji; Goa khako ni sanglingkü noin ta ni ngioji.

⁵Ngüto Goa nou ni ta thalaau ya ta yangjila!

⁶Mongyang ngio ayam piakü noin; khaiunia ange thaiutha au ayam thatü aokü noin, ta apaüh ni hau chite-e. Goa nou nihau angja kiutsünto ni epau maikü noitsün tsüthasao.

⁷Goa ün oukong naiuso asong nou athon alao ni epsanau shio-e süne?

⁸Goa thaiutha maou nou alaothang tsünoi lüko nung aniothapüh tsüyapkü nai noin. Goa nou eanhai goumchi ngeji, lüko nito nung tsünge.

⁹Goa ün asong to goumchi atham nou tü naiuso, khiamnok nou tü punkü noin.

¹⁰Goa nou ni kelokü atheluau kankü shinai, nungko apa lolaoau sau noin?

¹¹Goa nou yaangting khaiuniahoi ngeji; apaüh ngüso tsümeikün chhisiya nouso chikü epji.

¹²Tilai ajeting gado thso angio angkü bon-e Angela tsünoikün khaiunia nou angela au tsalou-e.

¹³Amongpem thakü lütaiu Yob, küta Goa dongai apha lüchinphu.

¹⁴Atsamkhaiu ainou tsümeikün naiuso aphio nouso lüwanan.

¹⁵Küta mongkü naiuso mongnyankü goumchiko jam lüwao-e.

¹⁶Nungaito khiamthe shiküta loto tsüyangshi shikü yankü khuwantsün khekkü ni angjatsün peanlükhunane:

¹⁷Apim aakih nou nung anyiwem aje ou noutü tekkü oushikü noi-e, naiuso aa nai anyakhemteng atao nouso ashiothsanli je-e.

¹⁸Ni aalu meikü naiuso ayang nou meankü kih-e; Goa nou ni kiplo-e naiuso ni hau aalo kiu-e.

¹⁹A-ehoisoko ni hatatkü tsünoi-e; khaiunia piakü nou ni tü ahachu sao-e.

²⁰Lüko akausaihoi nou ahattat nai lemkü thape lüko nungko asoloau ayam ti tsü eppe. Ngüso ayang tsak nou nung ee nou shi-e. Yob